Jeremia 37 - ÎVUKU RÎA ÛVORO MWARO

Zedekia nîwaûririe Jeremia ûtaaro

¹ Nebukadinezarû mûthamaki wa Babuloni nîwathuurire Zedekia mûvîcî wa Josia atuîke mûthamaki wa Juda vandûrî va Konia mûvîcî wa Jehoiakimu.

² Nwatî Zedekia, ndungata ciake, vamwe na andû a Juda matiathikîrîria ciugo cia Ngai-Mûnene irîa aririe kûvîtûkîra mûrathi Jeremia.

³ Mûthamaki Zedekia nîwatûmire Jehukali mûvîcî wa Shelemia, na mûthînjîri-Ngai Zefania mûvîcî wa Maaseia kûrî mûrathi Jeremia akîmwîra atîrî, “Tûvoere kûrî Ngai-Mûnene Ngai wetû.”

⁴ Vîndî îo Jeremia aarî na wîathi wa gûcera kûrî andû nîûndû ndaarî mwove njera.

⁵ Athigari a mbaara a Akalidei nîmaacîgîrîrîtie îtûûra rîa Jerusalemu marîtharîkîre, na rîrîa meegwire athigari a mbaara a mûthamaki wa Misiri nîmaakîrîte mûvaka maumîte Misiri, athigari a mbaara a Akalidei namaaûrire makiuma kuo.

⁶ Nakîo kiugo Kîam Ngai-Mûnene nîgîakinyîre mûrathi Jeremia akîrwa atîrî,

⁷ “Ngai-Mûnene Ngai wa Isiraeli augîte atî: nîûkera mûthamaki wa Juda ûrîa wagûtûmire ûmvoye vandûrî vake, athigari a mûthamaki wa Misiri arîa maûkîte gûgûtethia marî vakuvî gûcoka vûrûrirî wao.

⁸ Nao Akalidei nîmagaûka na matharîkîre îtûûra rîîrî, nîmakaarîoca na marîvîvie na mwaki.

⁹ Nie Ngai-Mûnene nîrauga atî mûtikeveenie mûkîîraga atî athigari a Akalidei nîmakûthiî; nama tîmathiî.

¹⁰ Nîûndû wana ethîrwa nwa mûvoote athigari onthe a mbaara a Akalidei arîa mûrarûa nao, matigare amwe ao marî agurarie, wa mûndû arî îgemarî rîake, athigari acio nîmagaûka mavîvie îtûûra rîîrî na mwaki.”

Jeremia nîwanyitirwe na akîovwa

¹¹ Na rîrîa athigari a Akalidei maumire Jerusalemu makîûra nî athigari a mbaara a mûthamaki wa Misiri arîa maamarûmîrîrîte,

¹² Jeremia nîwaumire Jerusalemu na akîthiî vûrûri wa Benjamini, nîguo akamûkîre gîcunjî gîake Kîam mûgûnda rîrî îgai rîake.

¹³ Na rîrîa akinyire mwîrîgarî wa Benjamini mûrangîri ûmwe wetagwa Irija mûvîcî wa Shelemia, Shelemia mûvîcî wa Hanania, nîwanyitire mûrathi Jeremia na makîmwîra atîrî, “We ûrenda kûûra ûthiî gwa Akalidei!”

¹⁴ Nake Jeremia nîwamûcokerie atîrî, “Mau nî maveeni! Nie ndiraûra nthiî kwa Akalidei.” Nwatî Irija ndaamûthikîrîria. Kwoguo nîwanyitire Jeremia na akîmûvira kûrî anene.

¹⁵ Anene acio nîmaarakarire mûno nîûndû wa Jeremia na nîmaamûrivire na makîmwova, na makîmwiga nyomba kwa Jonathani îrîa yagarûrîtwe îgatuîka njeera.

¹⁶ Rîrîa Jeremia athiririe mîthenya mîîngî kûu njeera,

¹⁷ mûthamaki Zedekia nîwatûmanire athiî etwe, na akîmûgwata ûgeni gwake. Nîmaathiîre vandû keverirî kûu gwake mûciî na akîmûria atîrî, “Kûrî na ndûmîrîri ûrî nayo kuuma kûrî Ngai-Mûnene?” Jeremia nîwamûcokerie atîrî, “Kûrî nayo.” Jeremia nîwacokire akiuga atîrî, “Nîûkaanenganîrwa kûrî mûthamaki wa Babulonia.”

¹⁸ Jeremia nîwacokire akîûria mûthamaki Zedekia atîrî, “Nî ûndû ûrîkû mbîkîte mûcûku kana ngavîtîria ndungata ciaku kana andû aya, atî nîguo ûmvingîrithie njeera?

¹⁹ Marî kû arathi arîa maarathire magîkwîra atî, ‘Mûthamaki wa Babulonia ndagaakûtharîkîra kana atharîkîre vûrûri ûyû?’

²⁰ Rîu nîrakûvoya ûnthikîrîrie, we mwathi wakwa mûthamaki. Nîrakûthaitha mûno ûthikîrîrie mathaithana makwa. Wenda tu ndûkanjokie njeera rîngî, kûu nyomba ya Jonathani nîguo ndigakuîre kuo.”

²¹ Kwoguo mûthamaki Zedekia nîwathanire Jeremia aigwe kûrîa arangîri mekaraga. Nake nîwavecagwa mûgate wa mûthenya kuuma kûrî andû arîa marugaga mîgate nginya mîgate îkîthira yonthe kûu îtûûrarî. Kwoguo Jeremia eekaraga kwa arangîri.