Jeremia 12 - ÎVUKU RÎA ÛVORO MWARO

Jeremia nîwaûririe Ngai-Mûnene ciûria

¹ We Ngai-Mûnene wî mûthingu, wana ethîrwa nînîrakûretera mateta makwa, kûnarî ûguo nwa mende kwîyarîrîria mbere yaku. Nîndûî gîtûmaga andû arîa aganu mathatûkwa? Nîndûî gîtûmaga andû matarî evokeku mathiî na mbere?

² Nîwe wamavandire na makîgîa mîri, makûraga na makagîa na maciaro, maragia ûrîa ûrî mwaro, nwatî ngoro ciao ciîthagîrwa irî kûraca nawe.

³ Nwatî we Ngai-Mûnene nîûmbicî, we nîûnduîrîtie na ûkoona ûrîa ngwîciragia. Maguucie ta ng'ondu îvirîtwe kîthînjîrorî, maige nginya mûthenya ûrîa makaûragwa.

⁴ Nî nginya rî vûrûri ûgwîkara ûgîcakayaga, na nyaki yonthe îrî nyûmû mîgûndarî. Nyamû na iconi nîkwa irakua, nîûndû wa waganu wa andû acio, marauga atî: “Ngai ndarona ûrîa tûreka.”

⁵ Ngai-Mûnene arauga atîrî, “Ethîrwa nîûcindanîte na arîa mathiîcaga na magûrû na ûkanoga, nwa ûvote gûcindana na mbarathi? Na ethîrwa we ûgûcaga kûrîa gûtarî na kîndû gîa gûkûvînga, ûgeka atîa mûtitûrî wa Jorodani?

⁶ Nîûndû wana aa mûrwanyûkwe na andû a mûciî wenyu, nîmagwîkîte maûndû macûku, maragûtetia matagwîtigîra. Ndûkametîkie wanarî vanini, wana ethîrwa nîmarakwarîria ciugo mbaro mûno.”

Ngai-Mûnene nîweguire kîeva nîûndû wa andû ake

⁷ Ngai-Mûnene arauga atîrî, “Nîndiganîrîtie andû akwa a Isiraeli, nîndeete andû akwa kîûmbe, nîndekereretie mwenda wakwa njararî cia nthû ciake.

⁸ Andû akwa nîmambûkîrîrîte, nîmarandaramîra ta mûnyambû kîthakarî, na kwoguo nînîmamenete.

⁹ Andû arîa nthurîte mekariî ta iconi mbaro, irîa itharîkagîrwa na mbarî cionthe nî nderi. Thiî ûnganie nyamû cionthe irîa mbaganu, nîguo ciûke kîrugorî.

¹⁰ Arîthi eengî nîmacûkangîtie mûgûnda yakwa ya mîthavibu, nîmakinyangîte mîgûnda yakwa, nîmatûmîte vûrûri wakwa ûrîa mwaro ûtuîke werû.

¹¹ Nîmatûmîte ûtuîke îganjo, ûrandîrîra ûrî maganjo, vûrûri wonthe watuîkire werû, nwatî gûtirî mûndû ûtindanagîra naguo.

¹² Îgûrû rîa irîma cionthe werûrî, andû arîa manjûkangagia nî akinyu, nîûndû rûviû rwa Ngai-Mûnene nîrûgûcûkangia vûrûri wonthe, kuuma mwena ûmwe wa vûrûri nginya ûrîa wîngî, gûtirî mûndû ûgaatûra na thayû.

¹³ Andû akwa maavandire ngano, maakethire mîgua, marutaga wîra na vinya, nwatî mationaga umithio. Nîmagaconoka moona kîrîa maketha, nîûndû wa marakara manene ma Ngai-Mûnene.”

Kîranîro kîa Ngai-Mûnene kûrî andû arîa mariganîtie na andû a Isiraeli

¹⁴ Ngai-Mûnene arera andû arîa aganu arîa mariganîtie na vûrûri ûrîa Ngai-Mûnene aaveere andû a Isiraeli ûrî îgai rîao atîrî, “Nama nîngûkûûra andû akwa maume vûrûrirî wao, na ngûûre vûrûri wa Juda ume gatagatî kao.

¹⁵ Narîkia kûmakûûra nîngameguîra ntha rîngî, na nîmacokie wa mûndû vûrûrirî wake kûrîa aagaîrwe.

¹⁶ Na nîgûgakinya atî ethîrwa nîmagetîkîra na kinyi kûrûmîrîra wîtîkio wa andû akwa na mevîte na rîîtwa rîakwa, ‘Wata ûrîa Ngai-Mûnene atûûraga mwoyo,’ ta ûrîa vîndî îmwe mathomithîtie andû akwa kwîvîta na Baali, nîmagacoka mathereme marî gatagatîrî ka andû akwa.

¹⁷ Nwatî ethîrwa kûrî vûrûri ûtakanthikîrîria nîngaûkûûra viû na nîûcûkangie. Ûguo nîguo nie Ngai-Mûnene nîrauga.”