Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Jeremia 1 - ÎVUKU RÎA ÛVORO MWARO


Jeremia

1 Îno nî ciugo cia Jeremia mûvîcî wa Hilikia, ûmwe wa athînjîri-Ngai a îtûûra rîa Anathothi vûrûrirî wa Benjamini.

2 Ngai-Mûnene nîwaririe na Jeremia mwaka wa îkûmi na kathatû vîndî ya wathani wa Josia mûvîcî wa Amoni mûthamaki wa Juda.

3 Ndûmîrîri îo nwa yamûkinyîre rîngî, Jehoiakimu mûvîcî wa Josia arî mûthamaki wa Juda. Jeremia nîwathiîre na mbere gûkinyîrwa nî ndûmîrîri îo nginya mûthiiarî wa mwaka wa îkûmi na ûmwe Zedekia mûvîcî wa Josia arî mûthamaki wa Juda, nginya mweri wa gatano wa mwaka ûrîa andû a Jerusalemu maavirirwe îthamîriorî.


Jeremia nîwetirwe atuîke mûrathi

4 Ndûmîrîri ya Ngai-Mûnene nîyanginyîre ngîrwa atîrî,

5 “Mbere ya ngûmba îvurî rîa nyûkwe nînagwîcî, na mbere ya ûciarwe nînakwamûrire; nînakûthuurire ûtuîke mûrathi kûrî mavûrûri.”

6 Nînacokire ngiuga atîrî, “Ûûi, Mwathani Ngai-Mûnene! Taroria, nie ndiîcî kwaria na nîûndû nîrî mûndû mwîthî.”

7 Nwatî Ngai-Mûnene nîwambîrire atîrî, “Ndûkauge atî wî mûndû mwîthî; nwanginya ûthiî kûrî andû arîa ngûgûtûma kûrî o, na ûmeere ûrîa wonthe ngûkwatha.

8 Ndûkametigîre nîûndû ngethagîrwa nîrî vamwe nawe nîguo ngûgitagîre, ûguo nîguo Ngai-Mûnene augîte.”

9 Ngai-Mûnene nîwacokire agîtambûrûkia njara na akîvutia mîromo yakwa na akîmbîra atîrî, “Taroria, nînekîra ciugo ciakwa kanyuarî gaku.

10 Rîu nînakûva wathani îgûrû rîa mavûrûri na mothamaki, nîguo ûmakûûre na ûmomomore, ûmacûkangie na ûmagwîthie, ûmatume na ûmavande.”


Cioneki igîrî

11 Ngai-Mûnene nîwambîrire atîrî, “Jeremia nîndûî ûrona?” Nanie nînamûcokerie atîrî, “Nîrona rûvûa rwa mûtî wa mûrothi.”

12 Ngai-Mûnene nîwacokire akîmbîra atîrî, “Nîwona waro, nîûndû nînîraroria mone ciugo ciakwa ikîvinga.”

13 Ngai-Mûnene nîwacokire akîmbûria atîrî, “Nîndûî ûrona?” Nanie nînamûcokerie atîrî, “Nîrona nyûngû îkîtherûka înamîte mwena wakwa kuuma mwena wa rûgûrû.

14 Ngai-Mûnene nîwacokire akîmbîra atî, mûthiro nîûkaarekererua kuuma mwena wa rûgûrû ûkinyîre andû onthe arîa matûûraga vûrûrirî ûyû.

15 Rîu, nînîreta mîvîrîga yonthe ya mothamaki ma mwena wa rûgûrû. Nao athamaki a mo nîmakaaiga itî ciao cia ûthamaki mîromorî ya Jerusalemu na maciige ithiûrûkîrîtie nthingo ciarîo na matûûra monthe ma Juda.

16 Nanie nîngaverithia matûûra monthe nîûndû wa waganu wao wa kûregana nanie. Nîmarutîrîte ngai cia mûvuanano magongoona na makagooca indo irîa marûthîte na njara ciao.

17 Nwatî we Jeremia, îîvarîrie na ûthiî ûkamere maûndû monthe marîa ngûkwatha. Ndûkamakue nî o nîguo ndigatûme ûmake ûrî mbere yao.

18 Taroria, ûmûnthî nîngûgûtua îtûûra ririgîre, gîtugî gîa cuuma na rûthingo rwa gîcango, nîguo wîtîkîre atongoria onthe a vûrûri, athamaki a Juda, anene onthe, athînjîri-Ngai onthe, na andû onthe a vûrûri ûcio matigakûvoota.

19 Nîmakaarûa nawe nwatî matigakûvoota, nîûndû ngethagîrwa nîrî vamwe nawe nîguo ngûvonokagie. Ûguo nîguo Ngai-Mûnene arauga.”

©Bible Society of Kenya, 2019

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ