Isaia 63 - ÎVUKU RÎA ÛVORO MWARO

Ngai-Mûnene nîwavootire andû a Ndûrîrî

¹ “Nû ûyû ûkîte aumîte îtûûrarî rîa Bozira, rîrîa rîrî vûrûrirî wa Edomu? Nû ûyû ûkîte ekîrîte nguo ino ndune, na akathiî arî na vinya na ûvoti mwîngî?” “Nînie Ngai-Mûnene nîranîrîra ûthingu wakwa, na nîrî na vinya wa kûvonokania.”

² “Nîndûî kîratûma nguo ciake ciîthîrwa irî ndune, ciîkariî ta cia mûndû ûrîa ûkinyangaga thavibu akîviva ndivei?”

³ Nake Ngai-Mûnene nîwacokirie atîrî, “Nakinyangire andû a ndûrîrî ta thavibu nîrî nienga, na gûtirî mûndû wandethirie. Namakinyangire nîrî na marakara na mang'ûrîka, na nthakame yao îgîtîkîra nguo ciakwa cionthe.

⁴ Nînatuire na ngoro yakwa atî mûthenya wa kwîrîvîrîria nî mûkinyu, na vîndî ya gûkûûra andû akwa nî nginyu.

⁵ Nînaroririe, nwatî ndiona mûndû wanarî ûmwe ûngîndethia; nînamakire, nwatî gîtiarî na wa kûnyûmîrîria. Kwoguo nînavootanire na vinya wakwa namo marakara makwa makîmbîkîra vinya.

⁶ Nînakinyangire andû a ndûrîrî nîrî na marakara, ngîtûma manyue mang'ûrîka makwa nginya makîrîwa, na ngîtûrûra nthakame yao nthî.”

Ûtugi wa Ngai-Mûnene kûrî Isiraeli

⁷ Nîngûvecana ûvoro wa wendo ûtathiraga wa Ngai-Mûnene, na nîmûgooce nîûndû wa maûndû monthe marîa atwîkîrîte, na nîûndû wa maûndû manene na maro marîa ekîrîte nyomba ya Isiraeli, kûringana na ntha ciake na wendo wake ûtathiraga.

⁸ Ngai-Mûnene arauga atîrî, “Nama aya nî andû akwa; matikaamveenia.” Kwoguo nîwamavonokirie

⁹ kuuma mathînarî mao monthe. Tî mûraika wamavonokagia, nwatî nî Ngai-Mûnene ke mwene wamavonokagia. Aamakûûrire nîûndû wa wendo wake na ntha ciake. Aatwîre amamenyagîrîra kuuma tene.

¹⁰ Nwatî nîmaareganire nake na makîrakaria roho wake mûtheru. Kwoguo Ngai-Mûnene nîwatuîkire nthû yao na akîrûa nao.

¹¹ Nwatî nîmaacokire makîririkana mavinda ma tene, mavinda ma Musa, ndungata ya Ngai-Mûnene na makîûria atîrî, “Nîkwa ûrîa wavonokirie atongoria a andû ake kuuma îriarî arî kû? Ûrîa warekirie roho wake mûtheru gatagatîrî kao arî kû?

¹² Ûrîa wekire maûndû manene na vinya wake na njîra ya Musa, ûrîa wagaanirie manjî ma îria, na agîtongoreria andû ake manjîrî mau mariku nîguo egîîre na îgweta rîa tene na tene arî kû?”

¹³ Ngai-Mûnene aamatongorerie makîthiîra kûu kûriku ta mbarathi irî werûrî na matiavîngwa.

¹⁴ Wata ûrîa ng'ombe iviragwa ciandarî irîa noru, nwaguo Roho wa Ngai-Mûnene aanogokirie andû ake. Ûguo nîguo we Ngai watongoririe andû aku nîguo wîgîre na îgweta înene.

Îvoya rîa kwîguîrwa ntha na gûtethua

¹⁵ We Ngai-Mûnene, ûtûrorie kuuma îgûrû, kûrîa ûtûûraga na kûtheru. Ûtugi waku mwîngî na vinya waku kûrî tue irî kû? Wendo waku na ntha ciaku irî kû? Ndûgatûtiganîrie.

¹⁶ Nîûndû we nîwe Vava. Wana Iburahimu angîrega gûtûmenya, na Isiraeli auge ndatwîcî, we Ngai-Mûnene nîwe Vava, nîwe wîtagwa mûkûri wetû kuuma tene.

¹⁷ We Ngai-Mûnene, ûrekete tuume njîrarî ciaku nîkî? Ûtûmîte tûûmie ngoro cietû tûkarega gûgûtîîa nîkî? Tûcokerere we Ngai nîûndû wa ndungata ciaku, mîvîrîga îrîa arî yo îgai rîaku.

¹⁸ Tue andû aku atheru, nîtwegwatîre hekarû yaku gwa kavinda, nwatî nîtwengatirwe nî nthû cietû: nîciomomorire hekarû yaku.

¹⁹ Twîkariî ta andû matanathwa nîwe wanarî vanini, ta andû matanetanua na rîîtwa rîaku.