Isaia 55 - ÎVUKU RÎA ÛVORO MWARO

Gwîtwa ûvonokiorî wa Ngai-Mûnene

¹ Ngai-Mûnene arauga atîrî, “Mue muonthe arîa anyondu ûkani mûnyue manjî! Ûkani, wanamue mûtarî na mbeca, gûrani irio mûrîe! Ûkani! Gûrani ndivei na îriia, mûtarî na mbeca na mûtarî kîndû!

² Nîndûî gîtûmaga mûtûmîre mbeca na kîndû gîtangîvaithia mûndû? Nîndûî gîtûmaga mûrutîre wîra kîndû gîtangîvaithia mûndû? Nthikîrîriani na kinyi na mûrîcage kîndû kîrîa Kîamro, na mwîkenagie na indo irîa noru.

³ “Tegani matû menyu, na mûke kûrî nie; nthikîrîriani na nî mûgûtûûra mwoyo! Nîngûrûtha namue kîrîkanîro gîa gûtûûra tene na tene, na nîngaamûva wendo wakwa ûtathiraga ûrîa nerîîre Daudi.

⁴ Nama, nînamûtuire mûira kûrî andû a ndûrîrî, mûtongoria na mûnene wa andû.

⁵ Nama nîmûgeta ndûrîrî irîa mûtaicî, na andû a ndûrîrî irîa itagwîcî nîmagaaûka kûrî we mavinyûrîte! Nie Ngai-Mûnene Ngai wenyu Ûrîa Mûtheru wa Isiraeli, nînie ndûmîte maûndû mau monthe mekîke, nînie ndûmîte ûvewe riiri.”

⁶ Cariani Ngai-Mûnene vîndî îrîa angîoneka, mwîteni vîndî îrîa arî vakuvî.

⁷ Andû arîa aganu nîmatigane na mîthiîre îo yao, nao andû arîa matarî athingu matigane na meciria mao macûku. Nîmacokerere Ngai-Mûnene nîguo ameguîre ntha, na macokerere Ngai wetû nîûndû nîakîragîrîria kwovanîra.

⁸ Nîûndû Ngai-Mûnene arauga atîrî, “Meciria makwa tîmo meciria menyu, na njîra ciakwa tîcio njîra cienyu.

⁹ Nîûndû wata ûrîa îgûrû rîrî kûraca na nthî, nwaguo njîra ciakwa irî kûraca na cienyu, na nwaguo meciria makwa makîrîte menyu.

¹⁰ “Wata ûrîa mbura yuraga nthî na mbaravu îkagwa nthî kuuma îgûrû, na iticokaga kuo nwatî itûmaga nthî îgîe manjî, na igatûma mîmera îmere na îgakûra, na ikava mûvandi maketha na ikava andû irio,

¹¹ nwaguo ciugo irîa mbaragia ikeethîrwa ciîkariî; itikaanjokerera wa ûguo mana, nwatî nîikaavingia wîra wakwa, na irute wîra ûrîa naaitûmire.

¹² “Mûkaauma Babuloni mûkenete; na mûthiîcage mûtongoretue nî thayû. Irîma na tûrîma nîikaaina irî mbere yenyu, nayo mîtî yonthe ya kîthaka nîkaamûvûrîra mvî.

¹³ Îthenya rîa kûmere mîgua gûkaamera mîvondo; îthenya rîa kûmere nthaugû gûkaamera mîandathi. Rûu nîruo rûkethîrwa rûrî rûûri rwa kûririkanagia andû maûndû marîa nie Ngai-Mûnene mbîkîte, na rûgaatûûra tene na tene.”