Isaia 45 - ÎVUKU RÎA ÛVORO MWARO

Ngai-Mûnene nîwathuurire Cairasi

¹ Ngai-Mûnene arera Cairasi atîrî, “We wî mûthamaki ûrîa nthuurîte! Nîngwîkîrîte vinya nîguo ûvoote mavûrûri marîa marî mbere yaku; na kûvûrûra athamaki mavinya mao; nie nîngûkûvingûrîra ivingo cia îtûûra, na gûtirî kîvingo gîkaavingwa.

² Nie mwene nîngaagûtongoreria, ngîaraganagia irîma mbere yaku. Nîngaaunanga mîrango ya gîcango tûcunjî, na munange mîkîgo ya kuo ya cuuma.

³ Nîngaakûva indo cia vata irîa cigîtwe ndumarî; na ûtonga ûrîa ûrî kûndû gûtaicîkene, nîguo ûmenye atî nie nînie Ngai-Mûnene, Ngai wa Isiraeli ûrîa ûgwîtîte akîgwetaga rîîtwa rîaku.

⁴ Nîûndû wa ndungata yakwa Jakovu, na Isiraeli mûndû ûrîa nthurîte. Ngwîtîte na rîîtwa rîaku, ngûvete rîîtwa rîrî na îgweta wana ethîrwa ndûmbîcî.

⁵ “Nie nînie Ngai-Mûnene na gûtirî ngai îngî tiga nie. Nînie ngûmenyagîrîra, wana ethîrwa ndûmbîcî,

⁶ nîguo andû kuuma îthûîro nginya îrathîro mamenye atî nînie Ngai-Mûnene, na gûtirî ngai îngî.

⁷ Nînie ndûmaga kûgîe ûtheri na ngatûma kûgîe nduma; nînie ndûmaga kûgîe thayû na ngatûma kûgîe thîna. Nînie Ngai-Mûnene ûrîa wîkaga maûndû mau monthe.

⁸ Mbura nîyure kuuma îgûrû, namo matu nîmaurithie ûthingu nthî, nthî nîyatûke nîguo îciare ûvonokio, na îtûme kûgîe na ûthingu wanaguo. Nie Ngai-Mûnene nînie mbîkîte maûndû mau.”

Ûvoti mûnene wa Ngai

⁹ Kaî mûndû ûrîa ûgianaga na mûmûmbi nî mûrume-î, ta nyûngû ya yûmba îkîgiana na mûmîûmbi! Yûmba nîrîûragia ûrîa ûmbaga indo narîo kîrîa araûmba? Wana kana rîmwîra atîrî, “Wîra waku tî mwaro!”

¹⁰ Mûndû ûrîa wîraga îthe atîrî, “Wanjiarire nîkî? Kaî arî na thîna-î?” Kana akaûria ng'ina atîrî, “Ûrûrû ûrîa ûregua ûkîenda gûciara nî wa ndûî?”

¹¹ Ngai-Mûnene Ûrîa Mûtheru wa Isiraeli, ûrîa mûmûmbi arauga atîrî, “Nwa mûmbûrie ûvoro wa ciana ciakwa, kana mûmbathîre wîra ûrîa ndutaga nie mwene?

¹² Nînie natûmire nthî îgîe kuo na ngîûmba andû nîguo matûûrage kuo. Nînie natambûrûkirie îgûrû, na ngîatha ciûmbe cionthe ciakuo igîe kuo.

¹³ Nînie nathire Cairasi avingie ûrîa nendaga na kîvooto, na nîngaarûngaria njîra ciake cionthe. Nîagaatuma rîngî îtûûra rîakwa Jerusalemu, na arekererie andû akwa arîa marî îthamîriorî. Ageeka ûguo atakûrîvwa kana avakwa kîveo.” Ûguo nîguo Ngai-Mûnene augîte.

¹⁴ Ngai-Mûnene arera Isiraeli atîrî, “Ûtonga wa Misiri na indo cia Ethiopia ikethîrwa irî cienyu, nao andû arîa araca na îgûrû a Seba, nîmagaaûka kûrî we na methîrwe marî aku, na makûrûmîrîre. Nîmagaaûka kûrî we movetwe na mînyororo, na makwînamîrîrie mothiû mao makiugaga atî: ‘Ngai arî vamwe nawe, na gûtirî ngai îngî tiga ke.’ ”

¹⁵ Nama we wî Ngai ûrîa wîthithîte, Ngai wa Isiraeli, Mûvonokia.

¹⁶ Arîa onthe marûthaga mîvuanano nîmagaaconorithua, onthe magaaconorithua vamwe.

¹⁷ Nwatî vûrûri wa Isiraeli nîûkaavonokua nî Ngai-Mûnene, na ûvonokio wao ûgaatûûra tene na tene. Andû a kuo matigaaconorithua tene na tene.

¹⁸ Ngai-Mûnene ûrîa waûmbire îgûrû nîke Ngai! Ûrîa waûmbire nthî na agîtûma îgîe nîke wamîvandire; ndaamîûmbire îthîrwe îtarî na thayû na îtarî kîndû, aamîûmbire nîguo îtûûragwe. Nîke ûrauga atîrî, “Nie nînie Ngai-Mûnene, na gûtirî ngai îngî.

¹⁹ Nie ndiaragia nîîthithîte kana nîrî vûrûrirî wa nduma. Nie ndiera njiarwa cia Jakovu inîîvoke mana. Nie nînie Ngai-Mûnene na mbaragia ûma; Nyumbûraga maûndû ma ma.”

Mwathani wa nthî na Mîvuanano ya Babuloni

²⁰ Ngai-Mûnene arauga atîrî, “Ûnganani vamwe mûke mue andû a ndûrîrî arîa mûtigarîte, mue mûtarî na ûmenyo; mue mûthiîcaga mûkuuîte mîvuanano ya mîtî, na mûvoyaga ngai irîa itangîvota kûvonokania.

²¹ Umbûrani na mwîtetere; tigani andû maciire marî vamwe. Nû waririe maûndû mama wa tene? Anga tî nie Ngai-Mûnene? Gûtirî ngai îngî tiga nie, nînie Ngai mûthingu na Mûvonokia; gûtirî ngai îngî tiga nie.

²² “Njokererani nîguo mûvonokue, andû a nthî yonthe! Nîûndû nie nînie Ngai na gûtirî wîngî.

²³ Nie nînîvîtîte ngîgwetaga rîîtwa rîakwa, maûndû marîa nîraria nî ma ma, na ndingîgarûrûkwa. Andû onthe nîmagaaturia maru mbere yakwa, na onthe mevîte atî makaanîvokaga.

²⁴ “Vîndî îo nîgûkeerwa îgûrû rîakwa atî: Ûthingu na vinya cionekaga kûrî Ngai-Mûnene; andû arîa onthe maamûrakarîrîte, nîmagaaûka kûrî ke na maconoke.”

²⁵ Nie Ngai-Mûnene nîngaatethûra njiarwa cionthe cia Isiraeli, na nîikaavootana.