Hosea 2 - ÎVUKU RÎA ÛVORO MWARO

¹ Kwoguo îtani aa mûrwanyûkwe, “andû akwa,” na aa mwarwanyûkwe, “Arîa meguîrîrwe ntha.”

² Tetiani nyûkwe mûtetieni, nîûndû rîu ke tî mûka wakwa, nanie tînie mûthuuriwe. Mwîreni aume atigane na ûtharia wake, mwîreni atigane na ûraa wake.

³ Ethîrwa tî ûguo nîngûmûruta nguo atigwe arî njaga, nîngatûma ekare ta ûrîa aaciarirwe. Nîngatûma ekare ta werû, nîngatûma ekare ta nthî nyûmû. Nîngamûraga na nyonda.

⁴ Wana ndikeguîra ciana ciake ntha, nîûndû nî ciana iciarîrîrtwe ûraarî.

⁵ Ng'ina watuo nîmûvûru ûmaraa, ûrîa wamagîre nda nîmwîku ciîko cia ûûra nthoni. Nîwaugire atî; “Nîngarûmîrîra anyanya akwa, arîa mamvecaga irio na manjî nguo ya guoya na ya goro, maguta na ndivei.”

⁶ Kwoguo nîngavinga njîra yake na mîgua, na ndume rûthingo rwa kûmwirigîra, nîguo ndakone gwa kuumîrîra.

⁷ Nîakaarûmîrîra arata ake, nwatî ndakamoona; nîakaamacaria; nwatî ndakamoona. Nake nîagaacoka auge atîrî, “Nîngûcoka kwa mûthuuri wakwa wa mbere; nîûndû vîndî îo narî mwaro gûkîra rîu.”

⁸ Ke ndamenya atî nînie namûveere irio ndivei na maguta, na ngîmûva sîlûva na thaavu na wîngî, irîa ategeere Baali.

⁹ Kwoguo vîndî ya maketha nîngoca maketha ma irio, na vîndî ya kûviva ndivei ndute ndivei yakwa. Nîngamûcuna nguo ciakwa cia guoya na îrîa ya goro, irîa ciatûmagîrwa gûkunîkîra njaga yake.

¹⁰ Ngamûruta nguo atigwe arî ndûûrû mbere ya arata ake, na gûtirî mûndû ûkangiria.

¹¹ Nîngarûgamia mambura make monthe, irugo ciake cia mwambîrîrio wa mweri na cia thavatû, na magongoona marîa mengî monthe matuîtwe.

¹² Nîngacûkangia mîthavibu yake na mîkûyû yake, irîa augaga atî arîvirwe nî arata ake, Nîngaamîtua mûtitû îrîcagwe nî nyamû cia kîthaka.

¹³ Nîngamûverithia nîûndû wa gûkûngûîra mîthenya ya irugo cia Baali, mîthenya îrîa aavîvîrie ngai icio ûbani, na akîîgemia na mbete ciake na mathaga, na akîthiî kûrî arata ake, na akînariganîrwa nînie, ûguo nîguo Ngai mûnene arauga.

Wendo wa Ngai-Mûnene kûrî andû ake

¹⁴ Kwoguo ta roria, nîngûmûgucîrîria nîngûmûvira werûrî mbarie nake kavora.

¹⁵ Kûu nîkuo ngamûcokeria mîgûnda yake ya mîthavibu, nîngatua Kîamnda Kîam Akori mûromo wa kîîrîgîrîro. Akanûmagîrîra atakûringîrîrua ta ûrîa ekaga arî mwîthî, ta rîrîa aarî vûrûri wa Misiri.

¹⁶ Nie Ngai-Mûnene nîrauga atîrî: “Mûthenya ûcio we ûkambîta ‘Mûthuuri wakwa’ na ndûkambîta ‘Baali yakwa’ rîngî.

¹⁷ Nîûndû ndigetîkîra marîtwa ma ngai cia Baali magwetwe kanyuarî gake.

¹⁸ Nîngarûtha kîrîkanîro na nyamû cia kîthaka, iconi cia rîerarî, vamwe na tûgunyû tûrîa tûkurumaga, na nîngathengutia ûta, rûviû, na indo cia mbaara vûrûrirî, na ndûme ûtûûre ûrî mûgitîre.

¹⁹ Nîngagûtua mûka wakwa tene na tene; ûtuîke wakwa na njîra ya ûthingu na kîvooto, na njîra ya wendo ûtathiraga na ntha.

²⁰ Ta roria, na njîra ya wîvokeku nî ngakûvikia na nîûkaamenya atî nînie Ngai-Mûnene.”

²¹ Ngai-Mûnene arauga atîrî, “Mûthenya ûcio nîngacokia mavoya ma kûu matuurî ma kuuria mbura, namo matu nîmakavingia mavoya ma nthî.

²² Nayo nthî nîkaagîa na ngano, ndivei, na maguta ma mûtî wa mûtamaiyû. Nacio nîikaavingîria Jezireeli maavata make.

²³ Nîngatûma andû akwa vûrûrirî ûcio mevande na mathatûkwe. Nîngeguîra ntha, ‘Ûrîa ûtegucagîrwa ntha,’ nao arîa metirwe ‘Tî akwa,’ nîngamera, ‘Mue mûrî andû akwa.’ Nao nîmakaauga, ‘We nîwe Ngai wetû.’ ”