Hosea 1 - ÎVUKU RÎA ÛVORO MWARO

¹ Ndûmîrîri ya Ngai-Mûnene nîyakinyîre Hosea mûvîcî wa Beeri vîndî îrîa Uzia, Jothamu, Ahazi na Hezekia maarî athamaki a Juda, nake Jeroboamu mûvîcî wa Joashi arî mûthamaki wa Isiraeli.

² Rîrîa Ngai-Mûnene ambîrîrie kwaria na andû a Isiraeli na njîra ya Hosea nîwamerire atîrî: “Thiî ûgûre mûndûmûka mûmaraa na mûgîe ciana nake na njîra ya ûraa, nîûndû andû a vûrûri ûyû nîmareka mevia meengî mûno nîûndû wa kûndiganîria.”

³ Kwoguo Hosea nîwavikirie Gomeri mwarî wa Dibulaimu. Gomeri nîwagîre îvu na agîciarîra Hosea kavîcî.

⁴ Nake Ngai-Mûnene nîwerire Hosea atîrî, “Tuîra kaana rîîtwa ûgeete Jezireeli, nîûndû nînîvarîrîtie kûverithia nyomba ya mûthamaki Jehu, nîûndû wa andû arîa aûragîre Kîamndarî Kîam Jezireeli na nthirie ûthamaki wa Isiraeli.

⁵ Mûthenya ûcio nîngaunanga athigari a mbaara a Isiraeli kûu Kîamndarî Kîam Jezireeli.”

⁶ Gomeri nîwagîre na îvu rîngî, na agîciara mwana wa kerîtu. Nake Ngai-Mûnene nîwerire Hosea atîrî, “Tuîra mwana ûcio rîîtwa ‘Ûtegucagîrwa ntha,’ nîûndû ndikeguîra Isiraeli ntha rîngî kana nîmovere.

⁷ Nwatî nîngeguîra andû a Juda ntha na nîmavonokie. Nie Ngai-Mûnene Ngai wao nîngamavonokia, nwatî tî na vinya wa athigari a mbaara, kana rûviû rwa njûra kana mbaara, kana mbarathi, kana arîa mekaragîra mbarathi.”

⁸ Rîrîa Gomeri aatigithirie mwana ûcio wîtagwa, “Ûtegucagîrwa ntha” kwonga, nîwagîre îvu na agîciara mwana wa kaîrî wa kavîcî.

⁹ Nake Ngai-Mûnene nîwerire Hosea atuîre mwana ûcio rîîtwa “ ‘Tî andû akwa,’ nîûndû mue mûtirî akwa, na nie ndi wenyu.”

¹⁰ Nwatî andû a Isiraeli nîmakengîva ta mûthanga ûrîa ûrî îriarî ûrîa ûtangîthimîka kana ûtarîka; navo varîa Ngai-Mûnene amerire, “Mue mûtirî andû akwa” nîagaacoka ameere, “Mue mûrî ciana cia Ngai mûtûûra mwoyo.”

¹¹ Andû a Juda na Isiraeli nîmakaagomana vamwe na nîmakathuura mûtongoria wao ûmwe; nao nîmakoongereka kûu vûrûrirî wao. Mûthenya ûcio ûkethîrwa ûrî mûnene kûrî Jezireeli.