Gûco 21 - ÎVUKU RÎA ÛVORO MWARO

Ûvoro wîgiî mûndû arî mûrage

¹ “Kûngîkethîrwa kûrî na mûndû mûrage na agaikua na kûu kîthakarî vûrûrirî ûrîa Ngai-Mûnene Ngai wenyu akûmûva mûwîgwatîre, na kwîthîrwe gûtakûmenyekana ûrîa ûmûragîte,

² atongoria enyu na anene arîa matuithanagia maciira nîmakaathiî na mathime ûraca wa kuuma varîa mûndû ûcio aûragîrîtwe nginya matûûrarî marîa marî vakuvî.

³ Nao atongoria a îtûûra rîu, nîmagooca njaû îtaanaruta wîra kana îguucia gîkaari.

⁴ Nao nîmakaamîvira Kîamndarî vandû varî na rûnjî rûtavûcaga na vatanarîmwa kana vavandwa kîndû. Vau nîvo makaaunîra njaû îo ngingo.

⁵ Athînjîri-Ngai Alawi nîmakaathiî vau wanao, nîûndû Ngai-Mûnene Ngai wenyu amathuurîte nîguo mamûtungatagîre na marathimage andû na rîîtwa rîake. Nîmagaatuithanagia maciira monthe megiî ngarari na mbaara.

⁶ Nao atongoria onthe a îtûûra arîa marî vakuvî na mûndû ûcio ûragîtwe, nîmakethambîria njara îgûrû rîa njaû îo yunîtwe ngingo.

⁷ Nîmakaauga atîrî, ‘Tîtue tûragîte mûndû ûyû, wana tûtinona akîûragwa.

⁸ We Ngai-Mûnene twakûthaitha wovere andû aku Aisiraeli arîa wakûûrire kuuma Misiri. Twovere na ndûgatue atî nîtue tûragîte mûndû ûtarî na mavîtia.’

⁹ Mweka ûguo nîmûkethîrwa mûthirîtie wîvia gatagatîrî kenyu nîûndû ûguo nîguo Ngai-Mûnene endaga.

Ûvoro wîgiî aka arîa matavîtwe vîndî ya mbaara

¹⁰ “Rîrîa mwathiî mbaararî na Ngai-Mûnene Ngai wenyu aamûvotithia kûvoota nthû cienyu na mwaitava,

¹¹ na gatagatîrî ka andû acio matavîtwe, mûndûmûrûme ûmwe wenyu one mûndûmûka mûthaka na ende kûmûvikia,

¹² nîakaamûvira gwake mûciî, nake mûndûmûka ûcio nîakenja njuîrî cia kîongo gîake na atinie ngûnyû ciake.

¹³ Nîagaacoka arute nguo icio arekîrîte na ekîre ciîngî. Mûndûmûka ûcio nîagekara mûciî kwa mûndûmûrûme ûcio îvinda rîa mweri ûmwe agîcakayagîra aciari ake. Vuva wa ûguo mûndûmûrûme ûcio nîakaamûvikia atuîke mûka.

¹⁴ Vuva wa gwîkaranga nake, ethîrwa ndakûmwenda rîngî, nwa amûrekererie athiî wa kûrîa angîenda. Nwatî ndagîrîrwe nî kûmwendia kana kûmûtua ngombo, nîûndû nîamûcambithîtie.

Ûvoro wîgiî îgai rîa marikithathi

¹⁵ “Mûndûmûrûme nwa ethîrwe arî na aka aîrî, na ethîrwe endete ûmwe makîria ya ûrîa wîngî. Aka acio wa oîrî nwa mamûciarîre tûvîcî, nwatî kaana ka îrikithathi kethîrwe nî ka mûndûmûka ûrîa amenete.

¹⁶ Rîrîa mûndûmûrûme ûcio akaagaîra ciana ciake indo, ndakoonania kîmenyano na njîra ya kûva mwana wa mûndûmûka ûrîa endete îgai rîa îrikithathi rîrîa rîciarîtwe nî mûndûmûka ûrîa amenete.

¹⁷ Agîrîrwe nî kûva îrikithathi indo maita maîrî ma irîa angîva mwana ûrîa mûnini, wana ethîrwa îrikithathi tî rîa mûndûmûka ûrîa endete. Nwanginya agaîre îrikithathi rîu maita maîrî ma indo ciake kûringana na watho.

Ûvoro wîgiî mwanake mûremi

¹⁸ “Ethîrwa mûndû arî na mwana mûmû kîongo na mûremi na ûtathîkagîra îthe kana ng'ina wana mamûverithia,

¹⁹ aciari ake nî makaamûrutûrûra nyomba na mamûvire kûrî atongoria a îtûûra vau mwîrîgarî wa mûciî wake.

²⁰ Aciari acio nîmakeera atongoria a îtûûra atî: ‘Mwana wetû nî mûmû kîongo na nî mûremi. Ndatwathîkagîra, nî mûkoroku na nî mûrîu.’

²¹ Nao andû onthe a îtûûra nî makaamûraga na mathiga. Ûguo nîguo mûkaathiria wîvia gatagatîrî kenyu; nao andû onthe a Isiraeli megua ûguo nîmagetigîra.

Mawatho mwanya mwanya

²² “Ethîrwa mûndû ekîte wîvia ûngîtûma aûragwe, acoke aûragwe, na acuurue mûtîrî îgûrû,

²³ kimba gîake gîtikarare mûtîrî. Nwatî mûgaakîthika mûthenya wa ûcio nîguo gîtikagwatie vûrûri ûrîa mûkûvewa nî Ngai-Mûnene Ngai wenyu mûgiro; nîûndû mûndû arî mûcurie mûtîrî ethagîrwa arî mûrume nî Ngai.