Gûco 1 - ÎVUKU RÎA ÛVORO MWARO

Mîario ya Musa kûrî andû onthe a Isiraeli

¹ Îvukuurî rîîrî nîkuo kûrî na mîario ya Musa îrîa aarîrie andû a Isiraeli vîndî îrîa maarî werûrî mwena wa îrathîro wa rûnjî rwa Jorodani. Maarî Kîamndarî Kîam Jorodani kwerekera Sufi, gatagatî ka îtûûra rîa Parani mwena ûmwe na matûûra ma Tofeli, Labani, Hozerothu na Dizahabu mwena ûcio wîngî.

² Mûndû aumîte kîrîmarî gîa Sinai athiîte Kadeshi-barinea avîtûkîrîrîte vûrûrirî ûrîa ûrî irîma wa Edomu, aathiîcaga rûgendo rwa mîthenya îkûmi na ûmwe (11).

³ Mûthenya wa mbere mweri wa îkûmi na ûmwe mwaka wa mîrongo îna kuuma andû a Isiraeli mauma Misiri, Musa nîwerire andû a Isiraeli maûndû monthe marîa Ngai-Mûnene aamwathîte ameere.

⁴ Eekire ûguo arîkia kûvoota Sihoni, mûthamaki wa Amori ûrîa wathanaga arî îtûûrarî rîa Heshiboni, na Ogi, mûthamaki wa Bashani ûrîa wathanaga arî matûûrarî ma Ashitarothu na Edirei.

⁵ Vîndî îo nî rîrîa andû a Isiraeli maarî mwena wa îrathîro wa rûnjî rwa Jorodani vûrûrirî wa Moabu, na nîrîo Musa aambîrîrie gûtaarîria andû watho wa Ngai. Nîwaugire atîrî,

⁶ “Rîrîa twarî kîrîmarî gîa Sinai, Ngai-Mûnene, Ngai wetû nîwatwîrire atî, ‘Mûrî ekaru kîrîmarî gîkî îvinda rîganu.

⁷ Ambûrani magema na mûthiî na mbere na rûgendo nginya mûkinye vûrûrirî ûrîa ûrî irîma wa Aamori, na icunjî cionthe irîa ithiûrûrûkîrrîtie vûrûri ûcio: na nîkuo Araba, vûrûri ûrîa ûrî irîma, nthî ya irîma, na Negebu. Mûthiîni vûrûrirî wa Kanaani na mûvîtûke irîma cia Lebanoni mûkinye rûnjîrî rûnene rwa Farati.

⁸ Taroriani, nîngûmûva vûrûri ûyû wonthe mûrona ûrîa Nie, Ngai-Mûnene nerîîre methe menyu ma tene: Iburahimu, Isaka na Jakovu vamwe na njiarwa ciao na mwîvîtwa atî nîngaamava. Thiîni mwînyitîre guo.’ ”

Musa nîwathuurire atongoria a vûrûri

⁹ Musa nîwerire andû atîrî, “Vîndî îrîa twarî kîrîmarî gîa Sinai, nînaamwîrire atî, ‘Wîra ûyû wa kûmûtongoria nî mûrito mûno kûrî nie. Ndingîûvota nienga.

¹⁰ Ngai-Mûnene, Ngai wenyu nîatûmîte mwîngîve ta njata cia îgûrû.

¹¹ Ngai-Mûnene, Ngai wa methe menyu ma tene, arotûma mwongerereke maita ngiri makîria ya ûguo mwîgana, na amûrathime wata ûrîa aamwîrîîre!

¹² Nwatî nîngîvota atîa kûruta wîra ûyû mûrito ûguo wa kûthiria ngucanio gatagatîrî kenyu nîrî nienga?

¹³ Nthuurîrani andû aûgî, marî na ûmenyo wa maûndû, na mecîkene kuuma kûrî wa mûvîrîga, na nîngaamatua atongoria enyu.’

¹⁴ Mue nîmwetîkîrire na mûkîona ûndû ûcio ûrî mwaro.

¹⁵ Kwoguo nînoocire andû acio mwathuurîte aûgî na mecîkene kuuma mîvîrîgarî yenyu, na ngîmatua atongoria enyu. Amwe naamatuire atongoria a andû makiri, amwe atongoria a andû magana, na engî atongoria a ikundi cia andû mîrongo îtano na engî atongoria a makûmi ma andû. Na nînathuurire atongoria engî mîvîrîgarî yonthe yenyu.

¹⁶ “Nînathire atongoria acio ngîmeera, ‘Thikagîrîriani maciira monthe marîa andû enyu makaamûretagîra, na mûtucage maciira monthe na kîvooto, marî ma andû enyu, wana kana marî ma ageni arîa mûtûûranagia nao.

¹⁷ Mûtikathurûkanagie andû rîrîa mûkûmatuîra ciira. Thikagîrîriani ciira wa itonga na athîni ûndû ûmwe. Mûtigetigagîre mûndû, nîûndû îtua rîenyu nîrîo îtua rîa Ngai. Ciira ûrîa mûkaaremagwa nî gûtuithania, mûkaandetagîre ngaûtuithania.’

¹⁸ Vîndî wa îo nînaamwîrire maûndû monthe marîa mwagîrîrwe nî gwîka.

Athigani nîmaatûmirwe kuuma Kadeshi-barinea

¹⁹ “Nîtwekire wa ûrîa Ngai-Mûnene, Ngai wetû aatwathire twîke. Nîtwaumire kîrîmarî gîa Sinai na tûkîthiî tûvîtûkanîrîtie werûrî mûnene warî na guoya ûrîa mwonire na vûrûrirî ûrîa ûrî irîma wa Aamori, na tûgîkinya Kadeshi-barinea.

²⁰ Na rîrîa twakinyire Kadeshi-barinea, nînaamwîrire atî, ‘Rîu nîmwakinya vûrûrirî ûrîa ûrî irîma wa Aamori ûrîa Ngai-Mûnene, Ngai wetû atûvete.

²¹ Taroriani, nîguo ûûrîa, thiîni mûkegwatîre guo wata ûrîa Ngai-Mûnene, Ngai wa methe menyu aamwîrire. Mûtigetigîre kana mûmake.’

²² “Nwatî nîmwaûkire kûrî nie na mûkîmbîîra atî, ‘Tiga tûtûme andû mathiî mbere yetû nîguo magatûthiganîre vûrûri ûcio na macoke matwîre ûvoro wa njîra îrîa mbaro mûno twagîrîrwe nî kûthiîra na wa matûûra marîa tûkethîrîria.’

²³ Nînoonire ûndû ûcio wî mwaro wa gwîka, na nînathuurire andû îkûmi na aîrî, wa mûvîrîga mûndû ûmwe.

²⁴ Andû acio nîmaathiîre na magîtonya vûrûri ûrîa ûrî irîma, na magîkinya Kîamndarî Kîam Eshikoli magîkîthigana.

²⁵ Nao nîmaatûretere matunda kuuma vûrûrirî ûcio na magîtwîra atî vûrûri ûcio Ngai-Mûnene, Ngai wetû atûvete nî mwaro.

²⁶ “Nwatî nîmwaregire ûrîa Ngai-Mûnene, Ngai wenyu aamwathîte na mûkîrega gûtonya vûrûrirî ûcio.

²⁷ Nîmwambîrîrie kûnuguna mûrî kûu magemarî menyu mûkiugaga atî, ‘Ngai-Mûnene nî mûtûmenu. Aatûrutire Misiri nîguo atûrekererie kûrî Aamori matûûrage.

²⁸ Tûngîthiî kûu nîkî? Tue nî tûretigîra. Andû arîa twatûmire makathigane, maatwîrire atî vûrûri ûcio ûrî na andû araca na marî na vinya gûtûkîra, na andû acio matûûraga matûûrarî manene marî mairigîre na nthingo ikinyîte îgûrû matuurî, na nîmoonire avîcî a Anaki kuo arîa megana ta marimû!’

²⁹ “Nwatî nînaamwîrire atî, ‘Mûtigetigîre andû acio kana mûmake.

³⁰ Ngai-Mûnene, Ngai wenyu nîakûmûtongoria, na amûrûîrîre, wata ûrîa mwonire agîka rîrîa mwarî Misiri,

³¹ na mwarî werûrî. Nîmwonire ûrîa Ngai-Mûnene, Ngai wenyu aamûtongoririe nginya mûgîkinya gûkû. Aamûmenyagîrîra ta ûrîa kamwana kathiîcaga kamenyereretwe nî îthe.’

³² Nwatî wana mwegua ciugo icio, mûtietîkia Ngai-Mûnene, Ngai wenyu,

³³ ûrîa wathiîcaga amûtongoretie njîrarî akîmwonagia varîa mûkwamba magema menyu. Ngai-Mûnene nîwamûtongoragîria na kîmûrî Kîam mwaki ûtukû nîguo mwone gwa kûthiîra na akamûtongoreria na îtu mûthenya.

Ngai-Mûnene nîwaverithirie andû a Isiraeli

³⁴ “Ngai-Mûnene nîwegwire mateta menyu, akîrakara na akîîvîta akiuga atî,

³⁵ ‘Gûtirî mûndû wanarî ûmwe wa rûciaro rûrû rwaganu ûkoona vûrûri ûcio mwaro, ûcio nerîîre methe menyu na mwîvîtwa atî nîngaamava.

³⁶ Kalebu mûvîcî wa Jefune, nîke wenga tu ûgaatonya vûrûrirî ûcio. Ke ethîrîtwe arî mwîvokeku kûrî nie na nîngaamûva wa vamwe na njiarwa ciake vûrûri ûcio aathiganire.’

³⁷ Ngai-Mûnene nwa warakarire nînie nîûndû wa mevia menyu na akîmbîra atî, ‘Wa nawe ndûgatonya vûrûri ûcio.

³⁸ Nwatî Joshua mûvîcî wa Nuni ndungata yake nîke ûgaaûtonya. Kwoguo mûmagîrîrie nîûndû nîke ûgaatûma andû a Isiraeli maûgae ûtuîke wao.’

³⁹ “Ngai-Mûnene nîwacokire agîtwîra atî, ‘Ciana cienyu irîa itangîvota gûkûûrana ûndû mwaro na mûcûku, icio mwaugire nîigaatavwa nî nthû cienyu, nîcio igaatonya vûrûrirî ûcio, na nîngaaiva guo ûtuîke wacio.

⁴⁰ Nwatî mue garûrûkani mûcoke werûrî mûthiî mûroretie Îria Îtune.’

⁴¹ “Namue nîmwanjokerie atî, ‘Tue tûrî eviu mbere ya Ngai-Mûnene. Nwatî rîu nîtûkûthiî kûrûa wata ûrîa Ngai-Mûnene, Ngai wetû aatwathire.’ Kwoguo muonthe nîmwevarîrie kûthiî kûrûa, mûgîîciragia atî warî ûndû mûvûthû kûtharîkîra vûrûri ûcio ûrî irîma.

⁴² “Nwatî Ngai-Mûnene nîwambîrire atî, ‘Makaanie matikatharîkîre vûrûri ûcio nîûndû meka ûguo nîmakûvootwa nîûndû nie tîmbîthîrwa vamwe nao.’

⁴³ Nînaamwîrire ûrîa Ngai-Mûnene aaugîte, nwatî mûkîrega kwîgua. Nîmwareganire nake na mûkîthiî vûrûri ûcio ûrî irîma nîûndû wa mwîtîîo wenyu.

⁴⁴ Nao Amori arîa maatûûraga vûrûrirî ûcio ûrî irîma nîmaanyûrûrûkire kûrûa namue, na makîmûtharîkîra ta ûrîa njûkî îtharîkagîra mûndû. Nîmaamûvootire na makîmwîngata kuuma Edomu nginya Horima.

⁴⁵ Kwoguo nîmwarîrîre Ngai-Mûnene nîguo amûtethie. Nwatî Ngai-Mûnene nîwaregire kûmûthikîrîria kana kûmûtethia.

⁴⁶ Kwoguo nîtwekarire Kadeshi-barinea îvinda îraca.