Ezira 9 - ÎVUKU RÎA ÛVORO MWARO

Ezira nîwareganire na ûvikania wa Ayahudi na andû matarî Ayahudi

¹ Maûndû mau marîkia gwîkwa, anene a andû a Isiraeli nîmaaûkire kûrî nie na makîmbîra atî andû a Isiraeli, athînjîri-Ngai na Alawi matianeyamûrania kuuma kûrî andû arîa mariganîtie nao. Meekaga maûndû macûku wata marîa meekagwa nî Akanaani, Ahiti, Aperizi, Ajebusi, Amoni, Amoabu, Amisiri, na Amori.

² Nîûndû Aisiraeli nîmaavikagia erîtu ao na avîcî ao mageka wa guo. Kwoguo andû a Ngai nîmeetukanîtie na andû a vûrûri na magatuîka acûku. Atongoria na anene nîo methîrîtwe magîka maûndû mau mûno.

³ Rîrîa neguire ûguo, nînatembûrangire nguo ciakwa, ngîkûûra njuîrî cia kîongo na nderu nîûndû wa kûthirwa nî mwîvoko na ngîkara nthî nîrî na kîeva.

⁴ Nînekarire nthî nîrî na kîeva nginya mathaa ma kîgongoona gîa kîvwaî. Andû arîa maaumîte îthamîriorî na nîmaamakîte nîûndû ûcio nîmaagomanire manthiûrûrûkîrîtie nîûndû Ngai wa Isiraeli nîwatûkaanîtie na akiuga tûtigatukane nao.

⁵ Rîrîa kavinda gaakinyire ka îgongoona rîa kîvwaî, nînaûkîrire ngiuma varîa nekarîte nthî nîrî na kîeva. Nîrî na nguo icio ndembûkangu, nînaturirie maru nîguo mvoe na ngîûkîrîria njara ciakwa na îgûrû kûrî Ngai-Mûnene, Ngai wakwa.

⁶ Na ngîvoya ngiugaga atîrî, “Ngai wakwa, nîregua ngîconoka mûno ngîûkîrîria ûthiû wakwa mbere yaku. Mevia metû maûmbanîrîrîte na îgûrû makavîtûka ciongo cietû, nîmathiîte magakinya îgûrû.

⁷ Kuuma vîndî ya methe metû ma tene nginya ûmûnthî tue nîtwîvîtie mûno. Nîûndû wa mevia metû tue, athamaki etû, na athînjîri-Ngai etû nîtûgwîte njararî cia athamaki ageni tûkaverithua na tûkaûragwa. Tûrî atave na tûgacuunwa indo cietû na nîtûregua tûconokete mûno.

⁸ Nwatî Ngai-Mûnene, Ngai wetû, gwa kavinda kanini wîthîrîtwe ûgîtwîguîra ntha na ûgatûma amwe etû tuume ûkomborî na tûtûûre kûndû gûkû kûtheru tûrî agitîre.

⁹ Wana ethîrwa twarî ngombo, we Ngai wetû ndwatûtiganîria ûkomborî. Nîwatûmire mûthamaki wa Perisia atwonie wendo ûtathiraga na agîtîkîra tûtûûre na tûtume hekarû yaku îrîa yarî nyomomoku, na agîtûva ûgitîri tûrî gûkû Juda na Jerusalemu.

¹⁰ “Ngai wetû, rîu nîtuga atîa vuva wa gûtwîkîra maûndû mau monthe? Nîtûregete rîngî kwathîkîra maathani maku,

¹¹ marîa watûveere kûvîtûkîra ndungata ciaku arathi. Maatwîrire atî vûrûri ûrîa tûkûthiî kwînyitîra ûtuîke wetû tî mûtheru. Nîûndû andû arîa maatûûraga kuo nîmaawîcûrîtie maûndû macûku kuuma mwena ûmwe nginya mwena ûrîa wîngî.

¹² Kwoguo nîmaatwîrire atî erîtu etû matikavikue nî andû ao kana andû etû mavikie erîtu ao. Na tûtikagwatanîre maûndû ma thayû kana tûmatethia maûndûrî wa monthe ethîrwa nîtûkwenda gûtûûra vûrûrirî ûyû na tûgaûtigîra njiarwa cietû tene na tene.

¹³ Ûrîa wonthe wîkîkîte kûrî tue wîkîkîte nîûndû wa mevia na mavîtia metû. Nwatî we Ngai wetû îvera rîrîa ûtûverithîtie narîo nî rînini gûkîra ûrîa twagîrîrwe nî kûverithua, na ûgetîkîra tûtigare tûtarî athiru viû.

¹⁴ Anga nwatûthiî na mbere kuna maathani maku rîngî na andû etû mavikie erîtu ao, kana erîtu etû mavikue nî andû aya acûku û na mekaga maûndû marî magigi? Na kinthî ndûngîrakara nîtue na ûtûcûkangie viû na kwîthîrwe gûtarî mûndû ûgûtigwa arî mwoyo.

¹⁵ Ngai-Mûnene, Ngai wa Isiraeli, we ûrî mwîvokeku, nîûndû nîwîtîkîrîte tûtûûre mwoyo nginya ûmûnthî. Na rîu ava nîtûkumbûra mavîtia metû, nîûndû gûtirî mûndû mwagîrîru gatagatîrî getû wa kûrûngama mbere yaku.”