Ezira 7 - ÎVUKU RÎA ÛVORO MWARO

Ezira nîwakinyire Jerusalemu

¹ Vuva wa ûguo, vîndî îrîa Aritakiserikise arî mûthamaki wa Perisia, kwarî na mûndû wetagwa Ezira. Mûndû ûcio aarî mûvîcî wa Seraia, Seraia aarî mûvîcî wa Azaria, Azaria mûvîcî wa Hilikia.

² Hilikia aarî mûvîcî wa Shalumi, Shalumi aarî mûvîcî wa Zadoku, Zadoku aarî mûvîcî wa Ahitubu.

³ Ahitubu aarî mûvîcî wa Amaria, Amaria aarî mûvîcî wa Azaria, Azaria aarî mûvîcî wa Meraiothi,

⁴ Meraiothi aarî mûvîcî wa Zerahia, Zerahia, aarî mûvîcî wa Uzi. Uzi aarî mûvîcî wa Buki,

⁵ Buki aarî mûvîcî wa Abishua, Abishua aarî mûvîcî wa Finehasi. Finehasi aarî mûvîcî wa Eleazaru, Eleazaru aarî mûvîcî wa Aroni ûrîa warî Mûthînjîri-Ngai mûnene.

⁶ Ezira aarî mûthomi na mûndû warî na ûûgî ûvororî wîgiî watho ûrîa Ngai-Mûnene, Ngai wa Isiraeli aaveete Musa. Ezira nîwaumire Babuloni. Ngai-Mûnene, Ngai nîwamûrathimîte. Kwoguo mûthamaki nîwavere Ezira kîndû kîonthe kîrîa eetîrie.

⁷ Mwakarî ûcio wa mûgwanja Aritakiserikise arî mûthamaki, Ezira nîwaumire Babuloni na akîthiî Jerusalemu. Maathiîre marî na andû amwe a Isiraeli, na nîo athînjîri-Ngai amwe na Alawi, aini a nyîmbo, arangîri a kîvingo na ndungata cia hekarû.

⁸ Nao nîmaakinyire Jerusalemu mûthenya wa mbere wa mweri wa gatano.

⁹ Rûgendo rwao rwa kuuma Babuloni maarwambîrîrîtie mûthenya wa mbere wa mweri wa mbere mwakarî wa mûgwanja Aritakiserikise arî mûthamaki. Nake Ngai aarî vamwe nao.

¹⁰ Ezira nîwevecanîte ûtûûrorî wake kûthoma watho wa Ngai-Mûnene, na gwîka ûrîa watho ûcio ugîte, na kûthomithia andû a Isiraeli mawatho, kîrîra kîgiî watho ûcio, na maûndû megiî mûtûûrîre.

Ezira nîwaverwe maarûa nî mûthamaki Aritakiserikise

¹¹ Ezira aarî mûthînjîri-Ngai na mûndû mûûgî wa watho ûrîa Ngai-Mûnene avete andû a Isiraeli. Mûthamaki Aritakiserikise Nîwamûvere maarûa yandîkîtwe atîrî:

¹² “Kuuma kûrî Aritakiserikise mûthamaki ûrîa mûnene nînakwandîkîra we Ezira mûthînjîri-Ngai na mûndû mûgî ûthomete watho wa Ngai wa îgûrû.

¹³ “Nînathana atî mûndû wa wonthe wa andû a Isiraeli, athînjîri-Ngai, na Alawi arîa marî vûrûrirî ûrîa mbathanaga nwamûthiîcanie nao ethîrwa mûndû nîekwenda kûthiî Jerusalemu.

¹⁴ Nie tûrî na andû mûgwanja arîa mandaaraga, nînagûtûma ûthiî Jerusalemu na Juda ûgatuîrie ûmenye kana Watho wa Ngai wenyu ûrîa wanengerwe ûûmenyagîrîre nîûrarûmîrîrwa.

¹⁵ Ûkîthiî ûgaakua thaavu na sîlûva irîa nie mûthamaki na andû arîa mandaaraga twarutîra Ngai wa Isiraeli na njîra ya kwîyendera. Ngai ûcio nî ûrîa hekarû yake îrî Jerusalemu.

¹⁶ Thaavu na sîlûva cionthe irîa ûkaaûngania vûrûrirî wa Babuloni nîûkaathiî nacio. Wana indo irîa andû a Isiraeli na athînjîri-Ngai makaaruta nîûndû wa hekarû îrîa îrî Jerusalemu ya Ngai wao.

¹⁷ “Mbeca icio ûgaaitûmîra waro kûgûra ndegwa, ng'ondu na tûtûrûme, irio na ndivei. Indo icio ûkaairuta irî matega metharî ya Ngai-Mûnene ya kîgongoona hekarûrî ya Jerusalemu.

¹⁸ Sîlûva na thaavu irîa igaatigara, nîmûgaaitûmîra kûringana na ûrîa we na andû aku mûkoona kwagîrîrîte kûringana na wendi wa Ngai wenyu.

¹⁹ Nacio indo cia gûtûmîrwa ta thaani na mbakûri irîa ûnengeretwe nîûndû wa gûtûmîrwa hekarûrî, nîûkaaivira kûrî Ngai kûu Jerusalemu.

²⁰ Na kîndû wa kîonthe kîngî ûkenda nîûndû wa hekarû, nîûkaavewa kuuma mûthithûrî wa vûrûri.

²¹ “Nînatha anene onthe a mûthithû wa vûrûri wa mwena wa îthûîro wa Rûnjî rwa Farati atî kîndû wa kîonthe kîrîa Ezira mûthînjîri-Ngai na mûndû ûrî na ûûgî wa watho wa Ngai wa îgûrû angîvatara avewe wa rîmwe.

²² Indo irîa angîvewa ciîthîrwe itavîtûkîtie kilo 3,400 cia sîlûva, kilo 20,000 cia ngano, lita 2,000 cia ndivei, lita 2,000 cia maguta. Naguo cumbî nîavewe wa ûrîa angîenda.

²³ Kîndû wa kîonthe Ngai wa îgûrû akaavatara nîûndû wa hekarû nîgîkaavecanwa. Ûndû ûcio nîûgekwa nîguo Ngai ndakaarakare nî mûthamaki na avîcî ake.

²⁴ Wana nî tûramûmenyithia atî mûtiagîrîrwe nî gwîtia gooti kuuma kûrî athînjîri-Ngai, Alawi, aini a nyîmbo, arangîri na kîvingo, ndungata cia hekarû, kana mûndû wa wonthe ûkonenie na hekarû îno.

²⁵ “Nawe Ezira, ûgîtûmagîra ûûgî ûrîa ûvetwe nî Ngai waku, ûkaathuura atongoria na atuithania ciira a kwathaga andû onthe arîa marî vûrûrirî ûrîa ûrî mwena wa îthûîro wa Rûnjî rwa Farati. Andû acio ûkaathuura methîrwe nî andû maicî watho wa Ngai wenyu na nîmaûrûmagîrîra. Nao andû arîa mataicî watho ûcio nîmathomithue maûmenye.

²⁶ Ethîrwa kûrî mûndû ûtakaathîkîra watho wa Ngai wenyu kana watho wa vûrûri, mûndû ûcio nîakaaverithua. Akaaverithua na njîra ya kûûragwa kana kûthamua, gûcunwa indo ciake kana kwovwa njera.”

Ezira nîwakumirie Ngai

²⁷ Nake Ezira nîwacokire akiuga atîrî, “Ngai-Mûnene, Ngai wa methe metû ma tene arokumua! Nîûndû nîatûmîte mûthamaki agîe na wendi wa kûva gîtîîo hekarû ya Ngai-Mûnene îrîa îrî Jerusalemu.

²⁸ Nîûndû wa wendo wa Ngai ûtathiraga nînduîkîte mwîtîkîrîku nî mûthamaki, andû arîa mamûtaaraga, na anene onthe arîa marî vinya. Ngai-Mûnene, Ngai wakwa nîwandathimire, na ngîgîa na vinya na ngîvota kûngania anene eengî a nyomba cia Isiraeli tûgîcoka nao Jerusalemu.”