Ezira 6 - ÎVUKU RÎA ÛVORO MWARO

Ûrîa mûthamaki Cairasi aathanîte nîwamenyekire

¹ Mûthamaki Dario nîwarutire watho gûtuîrue kûrîa kwigagwa mandîko ma vûrûri wa Babuloni.

² Na rîrîa gwatuîrirue nîkwonekire îvuku rîa gîkûnjo rîrî na mûtaratara wa maûndû marîa mûthamaki Cairasi aathanire mekwe. Îvuku rîu rîarî Ekibatana îtûûrarî înene rîa vûrûri wa Media. Narîo rîandîkîtwe atîrî:

³ “Mwaka wa mbere Cairasi atuîka mûthamaki nîwathanire atî hekarû îrîa îrî Jerusalemu îgatumwe rîngî nîûndû nîkuo magongoona makaarutagîrwa na matega ma kûvîvua. Hekarû îo îkethîrwa îrî ya wariî wa mita 27 na ûraca na îgûrû wa mita 27.

⁴ Nthingo cia hekarû ikethîrwa itumîtwe na mathiga na mbaû. Mathiga nîmagaatumwa maiganîrîrîtwe mîvari îthatû macoke maigîrîrwe mûvari ûmwe wa mbaû. Wîra ûcio wonthe ûkaarîvwa, na mûthithû wa vûrûri.

⁵ Nacio indo cia thaavu na cia sîlûva irîa mûthamaki Nebukadinezarû aarutire hekarûrî ya Jerusalemu akîireta gûkû Babuloni nîigaacokua na ikaaigwa varîa ciagîrîrwe nî kwîthîrwa kûu hekarûrî ya Jerusalemu.”

Mûthamaki Dario nîwaugire wîra ûthiî na mbere

⁶ Mûthamaki Dario nîwacokire agîcokia maarûa akiuga atîrî, “Kûrî Tatenai mûnene wa vûrûri ûrîa ûrî mûringo wa Rûnjî rwa Farati mwena wa îthûîro, na kûrî Shetharu Bozenai, na anene arîa engî mûrî nao vûrûrirî ûcio. “Mwîkare varaca

⁷ na mûtigatonyerere wîra ûcio wa gûtuma hekarû ya Ngai. Tiga mûnene wa Ayahudi na atongoria ao matume hekarû ya Ngai rîngî varîa yarî mbere.

⁸ Makîria ma ûguo nîrathana ûndûrî wîgiî ûtumi wa hekarû ya Ngai rîngî atî mavûthîri monthe makaarîvagwa nî mûthithû wa vûrûri matagûcererwa. Mbeca cia kûrîva wîra ûcio ikonekaga na njîra ya gooti cia mîthemba yonthe îrîa îkaûnganagua kûu vûrûrirî ûrîa ûrî mwena wa îthûîro wa Rûnjî rwa Farati nîguo wîra ndûkarûngame.

⁹ Na mûthenya wa mûthenya vecagani athînjîri-Ngai a Jerusalemu kîrîa kîonthe makaavataraga ta tûregwa, ng'ondu, tûtûrûme, nîûndû wa matega ma kûvîvua ma Ngai wa îgûrû. Nîmavecagwe ngano, cumbî, ndivei, maguta ma mîtamaiyû îrîa îciaraga matunda. Menyererani indo icio itigature.

¹⁰ Maûndû mau nîmekagwe nîguo athînjîri-Ngai marutage magongoona marîa makenagia Ngai wa îgûrû, na mavoyagîre mûthamaki na avîcî ake.

¹¹ Wana rîngî nî ngûruta watho atî ethîrwa kûrî mûndû wa wonthe ûkaagarûra watho ûyû, mûtî nî ûkaarutwa nyombarî yake, umue ûvîge na ûcoke ûvûrîrwe ûvîtûkîrîre mwîrîrî wake. Na nîûndû wa îvîtia rîu mûciî wake ûgaatuîka kîvumbu gîa gîko.

¹² Nake Ngai ûrîa wathuurire Jerusalemu vatuîke vandû varîa akagoocagîrwa arogarûra mûthamaki kana vûrûri ûrîa ûkaarega kwathîkîra watho ûyû kana ûrîa ûngîcûkangia nyomba îno ya Ngai îrî Jerusalemu. Nie Dario mûthamaki nînie naruta watho ûcio. Naguo nwanginya wathîkîrwe wonthe.”

Hekarû nîyamûrirwe

¹³ Tatenai mûnene wa vûrûri wa Juda, Shetharu Bozenai, na anene acio engî nîmeekire kûringana na ûrîa mûthamaki Dario aathanire.

¹⁴ Nao atongoria a Ayahudi nîmaathiîre na mbere gûtuma hekarû, na nîmeekagîrwa vinya nî arathi arîa aîrî Hagai na Zakaria. Na nîmaarîkirie gûtuma hekarû wata ûrîa maathîtwe nî Ngai wa Isiraeli na ta ûrîa Cairasi, Dario, na Aritakiserikise athamaki a Perisia maavecanîte watho.

¹⁵ Mûthenya wa Kathatû mwerirî wa Adari mwakarî wa gatandatû kuuma mûthamaki Dario atuîka mûthamaki, wîra wa gûtuma hekarû ya Ngai nîwathirire.

¹⁶ Nao andû a Isiraeli, athînjîri-Ngai, Alawi na andû onthe arîa maacokire kuuma îthamîriorî nîmaakûngûîre kwamûrwa gwa hekarû ya Ngai marî na gîkeno.

¹⁷ Nîmaarutire ndegwa îgana rîmwe, ng'ondu magana maîrî, na tûtûrûme magana mana nîûndû wa îgongoona rîa kwamûra hekarû. Nîmaacokire makîruta nthenge îkûmi na igîrî nîûndû wa mevia ma andû a Isiraeli, wa mûvîrîga warutaga nthenge îmwe.

¹⁸ Nao athînjîri-Ngai na Alawi nîmaaveerwe wîra wa ûtungata wa hekarû kûu Jerusalemu wata ûrîa wandîkîtwe îvukuurî rîa Musa.

Pasaka

¹⁹ Andû onthe arîa maacokire kuuma îthamîriorî Babuloni nîmaakûngûîre pasaka mûthenya wa îkûmi na îna wa mweri wa mbere.

²⁰ Athînjîri-Ngai na Alawi nîmaagîre na mambura ma kwîtheria nîguo matuîke etîkîrîku nîûndû wa kûgooca Ngai. Kwoguo Alawi nîmaaûragire tûtûrûme nîûndû wa îgongoona rîa pasaka ya andû onthe a Isiraeli arîa maacokete kuuma Babuloni îthamîriorî, na nîûndû wao wa vamwe na athînjîri-Ngai.

²¹ Îgongoona rîu rîa pasaka nîrîarîrwe nî andû onthe a Isiraeli arîa maaumire îthamîriorî wana nî andû arîa engî maariganîtie nao na maatiganîrîtie maûndû mao marîa matarî ma kûgooca Ngai. Andû acio nîmaatuîkîte a kûgoocaga Ngai-Mûnene, Ngai wa Isiraeli.

²² Nîmaakûngûîre kîrugo Kîam mîgate îtaarî mîkîre ndawa ya kwimbia vandû va mîthenya mûgwanja marî na gîkeno. Maakenete nîûndû Ngai-Mûnene nîwatûmîte mûthamaki wa Asîria agîe na wendo nîguo amatethie gûtuma rîngî hekarû ya Ngai wa Isiraeli.