Ezira 1 - ÎVUKU RÎA ÛVORO MWARO

Cairasi nîwathanire Ayahudi macoke Jerusalemu

¹ Mwakarî wa mbere Cairasi atuîka mûthamaki wa Perisia, Ngai-Mûnene nîwatûmire maûndû mavingue marîa aarîtie kûvîtûkîra mûrathi Jeremia. Ngai-Mûnene nîwatûmire Mûthamaki Cairasi aruta watho na ûkîandîkwa. Mûthamaki nîwaugire watho ûcio ûvirwe vûrûrirî wake wonthe ûrî mwandîke nîguo ûthomerwe andû.

² “Cairasi Mûthamaki wa Perisia aathanîte atî, Ngai-Mûnene Ngai wa îgûrû nîanduîte mûthamaki wa mavûrûri monthe ma nthî. Ke nîamvete wîra wa gûtuma hekarû yake Jerusalemu vûrûrirî wa Juda.

³ Ngai nîekare namue muonthe arîa mûrî ake. Thiîni Jerusalemu nîguo mûgatumîre Ngai-Mûnene, Ngai wa andû a Isiraeli hekarû rîngî. Ngai ûcio nîke ûgoocagîrwa Jerusalemu.

⁴ Ethîrwa andû ake onthe arîa matigarîte îthamîriorî nîmakenda gûcoka, andû arîa mariganîtie nao nîmakaamava ûtethio. Naguo ûtethio ûrîa makaamava nî wa sîlûva, thaavu na indo ciîngî na nyamû irîa irîthagua, wa vamwe na indo cia kûruta na njîra ya kwîyendera nîûndû wa hekarû ya Ngai îrîa îrî Jerusalemu.”

⁵ Nao atongoria a mbarî cia mîvîrîga ya Juda na Benjamini, athînjîri-Ngai na Alawi na andû onthe arîa Ngai aaveere wendi wa kûmûtumîra hekarû nîmeevarîrie kûthiî Jerusalemu kûmûtumîra hekarû rîngî.

⁶ Andû onthe arîa maariganîtie nao nîmaamavere ûtethio wa indo cia sîlûva na thaavu, na indo ciîngî nyîngî, na nyamû irîa irîthagua na indo cia goro, vamwe na indo cia matega cia hekarû.

⁷ Mûthamaki Cairasi nîwamacokerie mbakûri na ikombe irîa mûthamaki Nebukadinezarû arutîte hekarûrî ya Jerusalemu. Indo icio Nebukadinezarû aacokere agaciga hekarûrî ya ngai ciake.

⁸ Cairasi mûthamaki wa Perisia nwaugire Mithiredathi ûrîa warî mûmenyereri wa ûtonga wa mûthamaki airute agîitaraga na ainengere Sheshibazaru mûnene wa Juda.

⁹ Nacio ciarî: Mbakûri cia thaavu cia matega 30, mbakûri ciîngî cia matega cia sîlûva 1,000, mbakûri ciîngî 29,

¹⁰ tûvakûri tûnini twa thaavu 30, tûvakûri tûnini twa sîlûva 410, na indo cia mîthemba îngî 1,000.

¹¹ Rîrîa Sheshibazaru na andû amwe arîa maarî îthamîriorî maaumire Babuloni mathiîte Jerusalemu, nîmaakuire indo cia thaavu na cia sîlûva na indo ciîngî. Cionthe ciarî ngiri ithano na magana mana (5,400).