Ezek 46 - ÎVUKU RÎA ÛVORO MWARO

Mûnene na mîthenya ya irugo

¹ Ngai-Mûnene nîwambîrire atîrî, “Kîvingo gîa kîvaro Kîam ndarî kîrîa kîerekerete na mwena wa îrathîro nwanginya kîthagîrwe kîrî kîvinge mîthenya yonthe îtandatû îrîa îrutagwa wîra. Nwatî kîrugûragwe mûthenya wa thavatû na vîndî ya kîrugo gîa karûngamo ka mweri.

² Mûnene ûrîa ûrathana akaumaga kîvarorî Kîam nja na agatonyera kanyombarî ga gûtonyerwa ga kîvingo kîu, na atonya akarûngama vakuvî na gîtugî gîa kîvingo. Athînjîri-Ngai nîmakaaruta îgongoona rîake rîa kûvîvua na rîa thayû na nîakagooca Ngai-Mûnene arî vau kîvingorî kîu na agacoka akauma nja rîngî. Kîvingo kîu gîtikaavingwa nginya kîvwaî.

³ Mîthenya yonthe ya thavatû na mîthenya ya irugo cia karûngamo ka mweri, andû onthe makaagoocaga Ngai-Mûnene marî kîvingorî kîu.

⁴ “Mûthenya wa thavatû, mûnene akaretaga kûrî Ngai-Mûnene îtega rîa kûvîvua rîa tûtûrûme tûtandatû tûtarî na wonje na ndûrûme îmwe, cionthe itarî na wonje.

⁵ Varî ndûrûme îo îmwe akaaruta îtega rîa mûtu wa Efa îmwe, nwatî varî wa gatûrûme nîakaaruta îtega wa rîrîa angîvota. Na kûrî Efa îmwe ya mûtu nîakaaruta lita îthatû cia maguta.

⁶ Vîndî ya kîrugo gîa karûngamo ka mweri mûnene akaarutaga îtega rîa karegwa, tûtûrûme tûtandatû, na ndûrûme îmwe cionthe itarî na wonje.

⁷ Nîûndû wa îtega rîa irio cia mûgûnda wa varî ndegwa akaarutaga Efa îmwe ya mûtu na Efa îmwe ya mûtu varî wa ndûrûme. Na varî tûtûrûme akaarutaga kûringana na ûrîa angîvota. Kûrî îtega rîa irio cia mûgûnda akaarutaga lita ithatû cia maguta kûrî wa Efa îmwe ya mûtu.

⁸ “Mûnene agatonyagîra kanyombarî ga kîvingo na akaumîrîra wa varîa atonyerere.

⁹ Rîrîa andû maûka kûgooca Ngai-Mûnene vîndî ya irugo irîa nyamûre, mûndû ûrîa ûtonyerere kîvingorî Kîam mwena wa rûgûrû akaaumîrîra kîvingo Kîam mwena wa îveti, nake ûrîa ûtonyerere kîvingo Kîam mwena wa îveti akaaumîrîra kîvingo Kîam mwena wa rûgûrû. Gûtirî mûndû ûkaumîrîra kîvingorî kîrîa atonyerere, akaaumagîra kîvingorî kîrîa kîrî mbere yake.

¹⁰ Mûnene agatonyaga rîrîa andû magûtonya na akauma rîrîa makuuma.

¹¹ Mîthenya ya kîrugo na mîthenya ya ciathî irîa nyamûre, matega ma irio cia mûgûnda makarutagwa Efa îmwe ya mûtu varî wa ndegwa na Efa îmwe varî wa ndûrûme. Na varî tûtûrûme ûrîa ûkûruta akaarutanagîria na wa kîrîa angîvota. Na wa Efa ya mûtu îkaarutanagîrua na lita ithatû cia maguta.

¹² Mûnene angîenda kûrutîra Ngai-Mûnene îtega na njîra ya kwîyendera rîa kûvîvua kana rîa thayû, akaavingûragîrwa kîvingo Kîam mwena wa îrathîro. Arîkia kûruta îgongoona rîake wata ûrîa arutaga mûthenya wa thavatû akauma na kîvingo gîgîcoka gîkîvingwa rîngî.”

Matega ma wa mûthenya

¹³ Ngai-Mûnene augîte atîrî, “Wa mûthenya wa mûthenya kîraûko mûkaamûrutagîra îtega rîa kûvîvua rîa gatûrûme ga ûkûrû wa mwaka ûmwe gatarî na wonje.

¹⁴ Gakaarutanagîrua na îtega rîa mûtu wa kilo igîrî na nuthu.

¹⁵ Gatûrûme, mûtu na maguta ma ndamaiyû nîitûûra irutagîrwa Ngai-Mûnene kîraûko wa kîraûko nginya tene na tene.”

Mûnene na vûrûri

¹⁶ Ngai-Mûnene nîwaugire atîrî, “Mûnene angîgaîra ûmwe wa avîcî ake mûgûnda kîrî kîveo, mûgûnda ûcio ûgaatuîka wa mûvîcî ûrî wa îgai rîa mûciî wake tene na tene.

¹⁷ Nwatî angîgaîra ûmwe wa ndungata ciake mûgûnda kîrî kîveo, ndungata îo îkavûthagîra mûgûnda ûcio nginya rîrîa îkaarekererua. Mûgûnda ûcio nîûgaacokerua mûnene, nîûndû nîke na avîcî ake magîrîrwe nî gûtuîka ene mûgûnda ûcio tene na tene.

¹⁸ Mûnene ndagîrîrwe nî gûcuuna mûndû wa wonthe îgai rîake. Agîrîrwe nî kûgaîra ciana ciake mîgûnda kuuma mûgûndarî wake ûrîa aagaîrwe. Kwoguo ndagîrîrwe nî kûvinyîrîria andû akwa na njîra ya kûmacuuna indo ciao.”

Kûndû gwa kûrugîra hekarûrî

¹⁹ Mûndû ûrîa nîwambîtûkîrîrie vandûrî va gûtonya nyombarî irîa ciavûthagîrwa nî athînjîri-Ngai na irî vakuvî na kîvingo kîrîa kîroretie na mwena wa rûgûrû. Mwena wa cio wa îthûîro nîwamonirie vandû.

²⁰ Nake nîwambîrire atîrî, “Ava nîvo athînjîri-Ngai makarugagîra nyama cia magongoona ma kûrîvîria mevia na cia magongoona ma kûthiria mevia, na gûkandîra mûtu wa matega ma irio cia mûgûnda. Matiagîrîrwe nî kûthiî na indo icio kîvarorî Kîam nja nîûndû nî nyamûre na nwaicûkie andû maivutia.”

²¹ Nîwacokire akîmbira kîvarorî Kîam na nja akîmonia mîena yakîo yonthe îna. Mîena yonthe îna wa mwena warî na kavaro kanini,

²² kwoguo kwarî na tûvaro tûna wa kavaro ka ûraca wa mita mîrongo îîrî (20) na wariî wa mita îkûmi na ithano (15).

²³ Wa kavaro kathiûrûrûkîrîtue na rûthingo rwa mathiga. Mwena wa ndarî wa kavaro kwarî na mariko maatumîtwe nthî manyitanîte na rûthingo wa ûguo rwathiûrûrûkîrîtie kavaro.

²⁴ Mûndû ûcio nîwacokire akîmbîra atîrî, “Mama nîmo mariko kûrîa andû arîa matungataga hekarûrî makarugagîra magongoona marîa andû makaarutaga.”