Ezek 4 - ÎVUKU RÎA ÛVORO MWARO

Îtûûra rîa Jerusalemu nîrîkatharîkîrwa

¹ Ngai nîwambîrire atîrî, “We mûndû, oca îtuvarî, ûrige mbere yaku na ûcoke ûcore mbica ya îtûûra rîa Jerusalemu îgûrû rîa rîo.

² Rîrigicîrie, ûtume rûthingo rwa kûrîrigicîria, na ûmbe kîvumbu Kîam mûthetu rûthingorî, ûtume kûndû gwa gwîkarwa nî athigari, na wige mîtî mînene ya kwomomora rûthingo mîena yonthe ya îtûûra.

³ Ûcoke woce kîvengere gîa cuuma gîa kûvîvîria mîgate na ûkige gîkare ta rûthingo gatagatî gaku na îtûûra rîu. Erekera îtûûra rîu rîrigicîrie, na nîwe ûrîrigicîrîtie. Kîu gîkethîrwa kîrî kîmenyithia kûrî andû a Isiraeli.

⁴ “Ûcoke ûmame na mwena wa ûmotho, na wîigîrîre mevia ma nyomba ya Isiraeli. Nîûgakuua mevia mao îvinda rîa mîthenya îrîa yonthe ûkaamama na mwena wa waku wa ûmotho.

⁵ Nîngûtuîrîrîte gûkûverithia îvinda rîa mîthenya magana mathatû ma mîrongo kenda (390) nîûndû wa waganu wa andû a Isiraeli. Mûthenya ûmwe nî ûndû ûmwe na mwaka ûmwe ûrîa ngamaverithia.

⁶ Warîkia kûthiria mîthenya îo, nîûkaamama na mwena wa ûrîo nîguo ûverithue nîûndû wa mevia ma andû a Juda îvinda rîa mîthenya mîrongo îna (40). Ngûtuîrîrîte mûthenya ûmwe ûrûngamagîrîre mwaka ûmwe.

⁷ “Nîûgacoka ûrorie îtûûra rîu rîrigicîrie rîa Jerusalemu. Wambararie njara ciaku itarî ngunîkîre ûrîrathîre.

⁸ Taroria, nîngakwova na mîkanda nîguo ndûkagarûrûke na mwena wa ûmwe kûthiî ûrîa wîngî nginya rîrîa mîthenya ya kûrigicîria Jerusalemu îkaathira.

⁹ “Oca ngano, cairi, mboco, nthoroko, mûvîa na mwere na ûitukanie vandû vamwe ûcoke wîthondekere mûgate. Mûgate ûcio nîguo ûkethîrwa ûrî irio ciaku mîthenya îo magana mathatû ma mîrongo kenda (390) îrîa ûkethîrwa ûmamîte na mwena ûmwe.

¹⁰ Irio irîa ûkaarîcaga nwanginya ikaathimagwa. Ûkaarîcaga irio cia ûrito wa ngiramu magana maîrî ma mîrongo îthatû (230) wa mûthenya. Ûkaarîcaga irio rita rîmwe wa mûthenya.

¹¹ Wana manjî ûkaanyunyaga ma kîthimi kîrîa ûvetwe gîa ikombe igîrî wa mûthenya.

¹² Ûgooca mai ma mûndû marî maûmû, wakie mwaki namo, ûkande mûgate na ûûruge na ûrîe andû makîonaga.”

¹³ Ngai-Mûnene aaugire atîrî, “Ûguo nîguo andû a Isiraeli makaarîcaga mîgate îtarî mîtîkîrie nî watho kûrîwa rîrîa makethîrwa marî mavûrûrirî mageni kûrîa ngaamavira.”

¹⁴ Nînacokire ngiuga atîrî, “We Ngai-Mûnene! Nie ndianegwatia mûgiro; kuuma nîrî mûnini ndiarîa nyama cia nyamû îkuîte mûvûvû kana yûragîtwe nî nyamû ya kîthaka, wana kana ndîa nyama cia nyamû îrî mûgiro.”

¹⁵ Ngai nîwacokire akîmbîra atîrî, “Nîngûgwîtîkîria wakie mwaki na mai ma ng'ombe îthenya rîa mai ma mûndû nîguo ûruge mûgate waku.”

¹⁶ Nîwacokire rîngî akîmbîra atîrî, “We mûndû, nama nîngûthiria irio cionthe îtûûrarî rîa Jerusalemu. Andû makaarîcaga irio cia kûthimwa na marî na guoya na manyunyage manjî ma kûthimwa magîîtigagîra.

¹⁷ Ngeka ûguo nîguo mature irio cia kûrîa na mature manjî ma kûnyua. Wa mûndû agaacûthagîrîria ûrîa wîngî amakîte na nîmakaathira vinya nîûndû wa mevia mao.”