Ezek 35 - ÎVUKU RÎA ÛVORO MWARO

Ngai nîwaverithirie Edomu

¹ Ngai-Mûnene nîwambîrire atîrî,

² “Mûndû, vûgûka ûrorie kîrîma gîa Seiru na ûrathe ûvoro wîgiî kîrîma kîu,

³ ûkîîre nie Mwathani Ngai-Mûnene mbugîte atî: Nîndeganîte nawe we kîrîma gîa Seiru. Nîngatambûrûkia njara yakwa ndûe nawe, na nîngaatûma gîtuîke werû.

⁴ Nîngaatua matûûra ma kuo marîa manene maganjo, na vûrûri waku ûtuîke werû, na nîûgaacoka kûmenya atî, nie nînie Ngai-Mûnene.

⁵ “We ûtûûraga ûrî nthû ya andû a Isiraeli na ûkîmaûragithia rîrîa maarî thînarî na vîndî îrîa maaverithagua nîûndû wa mevia mao.

⁶ Kwoguo, nie Mwathani Ngai-Mûnene wata ûrîa ndûûraga mwoyo, mbaara nîyûkîte na ndûkaamîûrîra. Ûrî na mavîtia ma kûûragana na nwanginya wanawe ûragwe.

⁷ Nîngatûma kîrîma gîa Seiru gîtuîke îganjo na werû, na mûndû wa wonthe ûkaathiîrîra kuo nîngaamûraga.

⁸ Nîngecûria kîrîma gîa Seiru ciimba. Nakuo tûrîmarî, ciandarî na tûrûnjîrî twenyu nîgûgecûra andû arîa maûragîrîtwe mbaararî.

⁹ Nîngaatûma ûtuîke werû tene na tene, na matûûra maku marîa manene matigaacoka gûtûûrwa nî andû rîngî. Nawe nîûkaamenya atî, nie nînie Ngai-Mûnene.

¹⁰ “Nîûndû waugire atî ndûrîrî icio igîrî, ‘Isiraeli na Juda’ nî mavûrûri maku na nîûkaamegwatîra, wana ethîrwa nie, Ngai-Mûnene ndûûraga kuo.

¹¹ Kwoguo, wata ûrîa nie, Mwathani Ngai-Mûnene ndûûraga mwoyo, ngaagwîka kûringana na marakara na wîru waku ûrîa wamonirie nîûndû wa kûmathûûra. Na rîrîa ngaamûverithia nîmakaamenya nie nîrî û.

¹² Namue nîmûkaamenya atî nie, Ngai-Mûnene nîmbîguîte irumi cionthe irîa mwarîtie ciîgiî irîma cia Isiraeli. Mwairumire mûkiugaga atî, irîma cia Isiraeli ituîkîte werû na nîmûvetwe cio mûciîgwatîre.

¹³ Nîmbîguîte ûrîa wîthîrîtwe ûgîîtîa na ûkîaria maûndû meengî mambîgiî.”

¹⁴ Mwathani Ngai-Mûnene augîte atîrî, “We Edomu nîngaagûtua werû, na mavûrûri monthe ma nthî nîmagaakena

¹⁵ wata ûrîa we wakenire rîrîa vûrûri wa Isiraeli wanangirwe. Kwoguo ûguo nîguo ngaagwîka. Kîrîma gîa Seiru nîgîgaatuîka werû, wana vûrûri wonthe wa Edomu. Nao nîmakaamenya atî, nie nînie Ngai-Mûnene.”