Ezek 30 - ÎVUKU RÎA ÛVORO MWARO

Ngai-Mûnene nîakaaverithia Misiri

¹ Ngai-Mûnene nîwambîrire atîrî,

² “Mûndû, rathîra andû ûvoro ûmere nie Ngai-Mûnene Ngai mbugîte: Cakayani! Ûi nîûndû wa mûthenya ûcio!

³ Nîûndû îvinda rîrî vakuvî, mûthenya wa Ngai-Mûnene ûrî vakuvî, ûkethîrwa ûrî mûthenya wîna matu, mûthenya wa kûthirua kwa ndûrîrî.

⁴ Misiri nî îkaatharîkîrwa, na Ethiopia îkethîrwa îrî na thîna, rîrîa andû a Misiri makaaûragwa. Ûtonga wa Misiri nîûgatavwa, na mîcingi yake yomomorwe.

⁵ “Athigari a mbaara arîa maanyitanîre na andû a Misiri: athigari kuuma Ethiopia, Puti, Ludi na andû onthe kuuma Arabia, Lîbia nîmakaaûragwa marî vamwe mbaararî.”

⁶ Ngai-Mûnene arauga atîrî, “Andû arîa matiiragîrîra andû a Misiri nîmakaaûragwa, na athigari arîa njamba na marî îgweta nîmakaûragwa. Mbaara îkaambîrîria Migidoli nginya Siene na andû nîmakaûragwa. Nie Ngai-Mûnene Ngai nînie mbugîte ûguo.

⁷ Vûrûri wa Misiri nîûkaanangîka wata mavûrûri marîa mengî manangîku na matûûra mao makoomorwa wata matûûra marîa moomomorirwe.

⁸ Rîrîa ngaakia mwaki kûu Misiri na mbûrage arîa onthe mamatethagia, nîmûkaamenya atî nie nînie Ngai-Mûnene.

⁹ “Mûthenya ûcio nîngaatûma anjaama maume kûrî nie marî na meri nîguo mathiî makamakie andû a Ethiopia nîûndû meciragia nî agitîre. Nîmakaamaka mûno mûthenya ûrîa Misiri îkaagwa. Nama mûthenya ûcio nîûkîte.”

¹⁰ Ngai-Mûnene Ngai arauga atîrî, “Nîngaatûma Nebukadinezarû, mûthamaki wa Babuloni athirie ûtonga wa vûrûri wa Misiri.

¹¹ Mûthamaki Nebukadinezarû, na athigari ake arîa matarî ntha nîmakaaretwe macûkangie vûrûri. Nîmakaatharîkîra vûrûri wa Misiri na mviû cia njûra na mecûrie vûrûri ûcio ciimba.

¹² Nîngaatûma rûnjî rwa Nilo rûvwe na menderie andû aganu vûrûri wa Misiri. Nîngaatûma andû ageni manange vûrûri ûcio wana kîndû kîonthe kîrîa kîrî kuo. Nie Ngai-Mûnene nînie mbugîte ûguo.”

¹³ Ngai-Mûnene Ngai arauga atîrî, “Nîngaacûkangia mîvuanano na njûkangie ngai cia maveeni irîa igoocagwa îtûûrarî rîa Mefisi. Gûtikaagîa na mûthamaki rîngî kûu Misiri, na nîngaatûma andû a vûrûri ûcio mecûrwe nî guoya.

¹⁴ Nîngaatûma Pathirosi kwanangîke na mbakie mwaki îtûûrarî rîa Zoani na mverithie îtûûra rîa Thebesi.

¹⁵ Nîngaarîtûrûrîra îtûûra rîa Pelusiumu rîrîa rîgitîre mûno vûrûrirî wa Misiri marakara makwa na nthirie mwîngî wa Thebesi.

¹⁶ Nîngaakia mwaki vûrûri wa Misiri. Nîgûkaagîa na ruuo rûnene Pelusiumu. Thebesi nîîkomomorwa na îtûûra rîa Mefisi rîtharîkîrwe nî nthû mûthenya.

¹⁷ Anake a Oni na a Pibesethi makaaûragwa na rûviû rwa njûra, nao aka mavirwe îthamîriorî.

¹⁸ Mûthenya ûcio, Tehafinehesi nîûkaagîa nduma rîrîa ngaaunanga ûnene wa Misiri na nthirie vinya wao ûcio metîîaga naguo. Îtu nîrîgaakunîka vûrûri wa Misiri na andû a matûûra ma kuo mavirwe îthamîriorî.

¹⁹ Ûguo nîguo ngaaverithia Misiri, nao nîmakaamenya atî, nie nînie Ngai-Mûnene.”

Vinya wa mûthamaki wa Misiri nîwathirirue

²⁰ Mûthenya wa mûgwanja mweri wa mbere mwaka wa îkûmi na ûmwe kuuma twavirwa îthamîriorî, Ngai-Mûnene nîwambîrire atîrî,

²¹ “Mûndû, nîmunîte njara ya mûthamaki wa Misiri na ndîanovwa nîguo îvone na îvote kûnyita rûviû rwa njûra rîngî.

²² Kwoguo, nie Ngai-Mûnene Ngai mbugîte atî nîngûrûa na mûthamaki wa Misiri. Nîngaauna njara ciake cioîrî. Mune njara îrîa îrî na vinya na mune njara îrîa munîku, na ndûme rûviû rûrîa anyitîte rûgwe nthî.

²³ Nîngaanyagania andû a Misiri kûrî andû a ndûrîrî na ndûme maûrîre mavûrûrirî monthe ma nthî.

²⁴ Nîngaatûma njara cia mûthamaki wa Babuloni igîe na vinya na nîmûnengere rûviû rwakwa rwa njûra arûnyite na njara yake. Nwatî nîngaauna njara cia mûthamaki wa Misiri na nî agaacaa arî mbere ya mûthamaki wa Babuloni ta mûndû ûgurarîtue nguraro ya gûtûma akua.

²⁵ Nîngekîra njara cia mûthamaki wa Babuloni vinya, nwatî nîngaatûma njara cia mûthamaki wa Misiri iregere. Rîrîa ngaanengera mûthamaki wa Babuloni rûviû rwakwa rwa njûra nake arûcomore arûe na vûrûri wa Misiri nîmakaamenya atî, nie nînie Ngai-Mûnene.

²⁶ Nîngaanyagania andû a Misiri kûrî ndûrîrî ciîngî na ndûme maûrîre mavûrûrirî monthe ma nthî. Nao nîmakaamenya atî, nie nînie Ngai-Mûnene.”