Ezek 26 - ÎVUKU RÎA ÛVORO MWARO

Ûrathi wîgiî Turo

¹ Mûthenya wa mbere wa mweri wa mbere, mwaka wa îkûmi na ûmwe kuuma twathiî îthamîriorî, Ngai-Mûnene nîwambîrire atîrî,

² “Mûndû, andû a Turo nîmaathekerere îtûûra rîa Jerusalemu makiugaga atî, ivingo ciakuo nî munange na ikavingûka. Rîu andû a Turo nîo mekûgîa na ûtonga nîûndû Jerusalemu nînjûkangie.

³ “Kwoguo rîu, nie Ngai-Mûnene Ngai mbugîte atî nîndeganîte nawe we Turo. Nîngaatûma ndûrîrî nyîngî ciûke ikûtharîkîre. Magaûka kûrî we ta makûmbî ma manjî ma îriarî.

⁴ Nîikaatharia nthingo cia Turo na ciomomore nyomba irîa ndaca na îgûrû. Nîngaang'ara mûthetu wakuo ûthire gûtigwe rûciara rûtheri.

⁵ Îtûûra rîu nîrîgaatuîka kûndû gwa kwanîkagwa neti cia gûtega nthamaki nî ategi îriarî, na nîrîgaatavwa nî ndûrîrî. Ûguo nîguo nie Ngai-Mûnene Ngai mbugîte.

⁶ Nao andû arîa marî matûûrarî marîa mariganîtie narîo na kûu mîgûndarî nîmakaaûragwa na mviû cia njûra, na andû a Turo nîmakaamenya atî, nie nînie Ngai-Mûnene.”

⁷ Ngai-Mûnene Ngai augîte atîrî, “Nîngaareta Nebukadinezarû mûthamaki wa Babuloni, mûthamaki ûrîa mûnene gûkîra athamaki arîa engî wa kuuma mwena wa rûgûrû atharîkîre Turo. Agaaûka arî na mbûtû nene ya athigari eengî, athigari matwîte mbarathi, na arî na mbarathi na ikaari cia mbarathi.

⁸ Nîagaacûkangia matûûra marîa mariganîtie na Turo vûrûrirî na acoke akûrigicîrie nîguo akûtharîkîre. Nîakaaûmba ivumbu cia mûthetu kûu nthingorî icio na akûrigicîrie na ngo akûtharîkîre.

⁹ Mûthamaki Nebukadinezarû nîakaaiga mîgogo ya kwomomora nthingo na omomore nyomba irîa ndaca na mîtarimbo.

¹⁰ Akethîrwa arî na mbarathi nyîngî mûno na nîikaaûmbûra rûkûngû rûgûkunîkîre. Nthingo cia Turo nîikaainaina nîûndû wa mîgambo ya athigari arîa mathiîcaga matwîte mbarathi, na ya ikaari irîa igucagua nî mbarathi, na ya ikaari cia gûkuua mîrigo rîrîa akaavîtûkîra ivingorî cia îtûûra. Agaatonya îtûûrarî ta mûndû ûgûtonyerera kûndû kwomomore.

¹¹ Mavûngû ma mbarathi cia mûthamaki Nebukadinezarû nîmagaakinyanga tûcîrarî tuonthe twa îtûûra. Nîakaaûraga andû aku onthe na rûviû rwa njûra, na itugî cia rîo irîa irî vinya aigwîthie nthî.

¹² Ûtonga wenyu wonthe nîûgaatavwa wa vamwe na indo ciaku. Nîmakoomomora nthingo ciaku na momomore nyomba ciaku irîa mbaro. Namo mathiga, mbaû na mûthetu wenyu ûrîa maatûmîre magîtuma nîmagaawikia îriarî.

¹³ Nîngaatûma mîgambo ya nyîmbo ciaku îthire, na mûgambo wa inanda ciaku irîa nene na ngita ndûkeguwa rîngî.

¹⁴ Turo ngaamîtua îthiga rîtheri na rîtuîke rîa kwanîkagwa neti cia gûtega nthamaki nî ategi na rîtigacoka gûtumwa rîngî; nîûndû nie Ngai-Mûnene Ngai nînie mbugîte ûguo.”

¹⁵ Ngai-Mûnene Ngai arera îtûûra rîa Turo atîrî, “Anga andû arîa matûûraga rûtererî rwa îria matikaamaka rîrîa makeegua mûrurumo waku ûkîgwa, kîrîro Kîam andû arîa mativangîtue na Kîam arîa makûragwa.

¹⁶ Athamaki onthe a mavûrûri marîa marî rûtere rwa îria nîmakaauma itîîrî ciao cia ûthamaki. Nao nîmakaaruta nguo ciao irîa ndaca wa vamwe na nguo ciao irîa ng'emie waro. Nîmakaagwatwa nî guoya na nîmagekaraga nthî makinainaga vîndî cionthe mamakîte nîûndû wa maûndû marîa mekîkîte kûrî we.

¹⁷ Nao nîmakaaina rwîmbo rwa macakaya nîûndû waku makiugaga atîrî, “We îtûûra rîrarî ngumo, ûrî mûcûkangie, meri ciarîo nîmbûrîru îriarî. Andû a îtûûra rîrî nîo maarî vinya îriarî. Andû onthe arîa matûûraga rûtere rwa îria nîmaagwîtigîrîte.

¹⁸ Rîu mavûrûri marîa marî rûtere rwa îria nîmaratetema, maratetema nîûndû wa kûgwa gwaku. Andû arîa matûûraga icîgîrîrarî cia îria, nîmamakîtue nî kûthira gwaku.”

¹⁹ Ngai-Mûnene Ngai augîte atîrî, “Nîngatua îtûûra rîa Turo kûndû kwanangîku ta matûûra marîa matatûûragwa nî andû na nîrîkunîkîre na manjî marîa maumîte îriarî rîrîa rîrikîru.

²⁰ Nîngaacoka ngûnyûrûrûkie îrimarî kwa arîa akuû nîguo mûgekarage na andû arîa maatûûraga mwoyo tene. Nîngaatûma ûtûûre kûu kwanangîku tene na tene na mûtûûrage kuo na arîa akuû. Gûtirî andû magaaûka gûtûûra kûrî we rîngî, kana ûgîe na vandû vûrûrirî wa arîa marî mwoyo.

²¹ Nîngaagûtua kîndû gîa gûtûma andû manyitwe nî guoya, na ûcio nîguo ûkethîrwa ûrî mûthiia waku. Andû nîmagaagûcaria, nwatî matigaakwona. Ûguo nîguo Ngai-Mûnene Ngai augîte.”