Ezek 25 - ÎVUKU RÎA ÛVORO MWARO

Ûrathi wîgiî Amoni

¹ Ngai-Mûnene nîwambîrire atîrî,

² “Mûndû, vûgûka ûrorie andû a Amoni na ûrathe ûvoro ûmegiî.

³ Meere Ngai-Mûnene augîte atî, mue nîmwakenire mwona hekarû yake yagwatua mûgiro, na vûrûri wa Isiraeli ûkîanangîka na andû a Juda makîvirwa îthamîriorî.

⁴ Kwoguo nie nîngûmûnenganîra kûrî andû a mwena wa îrathîro mûtuîke ao. Nîmagaatuma magema mao kûu kwenyu na matume mîciî yao vûrûrirî wenyu. Makaarîcaga matunda menyu na makanyua îria rîenyu.

⁵ Nîngaatua îtûûra rîa Raba kûndû gwa kûrîthagua ngamîîra, na ndue matûûra ma Amoni njaga cia ng'ondu. Namue nîmûkaamenya atî nie nînie Ngai-Mûnene.”

⁶ Nie Ngai-Mûnene Ngai mbugîte atîrî, “Mue nîmwavûrire mvî na mûkîrûgarûga mûkenete na mûkîmenereria vûrûri wa Isiraeli.

⁷ Kwoguo, rîu nîngûtambûrûkia njara yakwa ndûe namue na nîmûrekererie mûtavwe nî andû a mavûrûri mengî. Nîngaamûcûkangia na ndûme mûthire viû mavûrûrirî na nîmûkaamenya atî nie nînie Ngai-Mûnene.”

Ûrathi wîgiî Moabu

⁸ Ngai-Mûnene Ngai augîte atîrî, “Moabu maaugire atî nyomba ya Juda îkariî wata ndûrîrî irîa ciîngî cionthe.

⁹ Kwoguo nîngaatûma matûûra marîa matumîtwe mûvakarî wa Moabu matharîkîrwe, wa vamwe na matûûra marîa marî riiri ma Bethijeshimothu, Baali-meoni, na Kiriathaimu.

¹⁰ Vûrûri wa Moabu wa vamwe na vûrûri wa Aamoni nîngaûnenganîra kûrî andû a mwena wa îrathîro nîguo ûtuîke wao. Vûrûri wa Moabu ndûgaatuîka vûrûri rîngî.

¹¹ Nie nîngaaverithia vûrûri wa Moabu, na nîûkaamenya atî nie nînie Ngai-Mûnene.”

Ûrathi wîgiî Edomu

¹² Ngai-Mûnene Ngai arauga atîrî, “Andû a Edomu nîmeerîvîrîrie kûrî andû a Juda. Wîrîvîrîria ûcio wao warî mûcûku mûno,

¹³ kwoguo nie Ngai-Mûnene Ngai mbugîte atî nîngaatambûrûkia njara yakwa îgûrû rîa vûrûri wa Edomu na mbûrage andû onthe na nyamû cionthe. Nîngaatûma wanangîke kuuma îtûûrarî rîa Temani nginya îtûûrarî rîa Dedani. Andû onthe nîmakaaûragîrwa mbaararî.

¹⁴ Nîngaatûma andû akwa a Isiraeli mandîvîrîrie kûrî andû a Edomu na nîmakaandîvîrîria kûringana na marakara makwa. Nao andû a Edomu nîmakaamenya wîngî wa marakara makwa.” Ûguo nîguo Ngai-Mûnene Ngai arauga.

Ûrathi wîgiî Afilisiti

¹⁵ Ngai-Mûnene Ngai arauga atîrî, “Andû a Filisiti nîmeekire ûndû mûcûku mûno wa kwîrîvîrîria na marakara kûrî andû arîa matûûraga marî nthû ciao kuuma tene.

¹⁶ Kwoguo nie Ngai-Mûnene Ngai nîngaatambûrûkia njara yakwa îgûrû rîa Afilisiti na mbûrage andû onthe a Kerethi na nthirie andû arîa matûûraga rûtere rwa îria.

¹⁷ Nîngaamaverithia nîrî na marakara mûno na nîmakaamenya atî nie nînie Ngai-Mûnene.”