Ezek 19 - ÎVUKU RÎA ÛVORO MWARO

Rwîmbo rwa kîeva

¹ Ngai-Mûnene nîwambîrire mine rwîmbo rwa macakaya nîûndû wa atongoria a Isiraeli

² ngiugaga atîrî, Nyûkwe aarî û? Aarî mûnyambû wa nga. Eekaraga gatagatîrî ka mînyambû îo îngî akîrera ciana ciake.

³ Nîwarerire kaana kamwe gake na agîkaruta kûvîta, na nîgaacokire kûrîa andû.

⁴ Mavûrûri nîmegwire ûvoro wakîo na makiuga mbu, na nîgaategirwe vandû îrimarî. Nîkaarutirwe îrimarî rîu kovetwe na icûvî gakîvirwa Misiri.

⁵ Rîrîa mûnyambû ûrîa warî ng'ina weterere mûno na kîîrîgîrîro gîkîthira, nîwathuurire kaana kengî na ûgîkarera gagîtuîka mûnyambû njamba.

⁶ Kaaûrûraga vamwe na mînyambû îo îngî, na nîgaatuîkire mûnyambû mwîthî. Nîkaamenyire kûvîta nîguo kone gîa kûrîa gagîcoka kûrîa andû.

⁷ Mûnyambû ûcio nîwambîrîrie kûthiî nyombarî cia anene, na ûgîcûkangia matûûra mao. Vûrûri wonthe vamwe na andû nîmaagwatirwe nî guoya nîûndû wa mûraramo wa guo.

⁸ Mavûrûri monthe nîmaacokire makîûtharîkîra kuuma na mîena yonthe. Nîwategirwe na ûkînyitithîrua îrimarî rîrîa wategetwe.

⁹ Nîwekîrirwe icûvî na ûkîvingîrwa vandû vatumîtwe ta rûgara, na ûkîvirwa kûrî mûthamaki wa Babuloni. Nîwavingîrwe kûndû kûgitîre, nîguo mûraramo waguo ndûkeguîke rîngî irîmarî cia Isiraeli.

¹⁰ Nyûkwe eekariî ta mûtî wa mûthavibu ûrî mûgûndarî, naguo wavandîtwe rûtere rwa manjî. Warî na mvûa nyîngî na nîwaciarîte mûno, nîûndû warî vandû vaarî na manjî meengî.

¹¹ Itina cia yo irîa ciarî na vinya mûno, nîciatuîkire mîragi ya wathani. Nîwarûngamire ûkîoneka ûrî mûraca mûno na îgûrû, ûrî na mvûa nyîngî.

¹² Nwatî mûtî ûcio wa mûthavibu nîwakûûrirwe na marakara, ûgikua ûkîgwîthua nthî. Rûkûngi rûrîa rumaga na mwena wa îrathîro, nîrwaûmirie mûtî ûcio viû, na matunda ma guo nîmeetîkire na makîvova. Itina irîa ciarî na vinya nîciavovire, ikîvîvua na mwaki ikîthira.

¹³ Nwatî nîwacokire ûkîvandwa rîngî werûrî, vûrûrirî warî mûmû na ûtaarî na manjî.

¹⁴ Mwaki umîte gîtinarî Kîam mûthavibu, ûkathiî ûkavîvia mvûa ciaguo na matunda ma guo, nîguo gûtikethîrwe kûrî na gîtina kîrî na vinya, na gûtarî na mûragi wa wathani. Rûrû nî rwîmbo rwa macakaya, na rûvûthagîrwa rûrî rwa macakaya.