Ciîko 28 - ÎVUKU RÎA ÛVORO MWARO

Paûlo arî gîcîgîrîrarî kîa Morita

¹ Rîrîa twakinyire nthî nyûmû wa waro, nîtwamenyire atî gîcîgîrîra kîu gîetagwa Morita.

² Nao andû arîa maatûûraga kuo nîmaatûtugire waro mûno. Na nîûndû nîkwambîrîrîtie kuura mbura na kwarî na mvevo nyîngî, nîmaakirie mwaki na magîtûnyita ûgeni tuonthe.

³ Nake Paûlo nîwaunire mûrigo wa ngû. Na vîndî îrîa eekagîra ngû icio riiko, njoka nîyaumire kûu ngûrî icio nîûndû wa ûrugarî na îkîrigicîria njararî yake.

⁴ Rîrîa andû arîa maatûûraga kuo moonire njoka îo îîrigicîrîtie njararî ya Paûlo, nîmeeranire atîrî, “Nwanginya mûndû ûyû ethîrwe nî mûûragani. Wana ethîrwa ndanakuîra îriarî, ûma ndûngîmwîtîkîria atûûra mwoyo.”

⁵ Nwatî Paûlo nîwerivarivire njoka îo na akîmikia kûu mwakirî îtamwîkîte ûndû mûcûku.

⁶ Nao andû nîmeeterere Paûlo aimbe kana agwe nthî wa rîmwe akînakua. Nîmeeterere îvinda îraca nwatî mationa akîthînua nî ûndû wana ûrîkû. Kwoguo nîmaagarûrire meciria mau mao na makiuga atîrî, “Ke nî ngai!”

⁷ Navo vandû varî vakuvî mûno na varîa twarî vaarî na mîgûnda ya mûnene ûmwe wa gîcîgîrîra kîu wetagwa Pubulio. Ke nîwatûnyitire ûgeni na agîtûtuga arî na ûtaana mwîngî mûno kwa îvinda rîa mîthenya îthatû.

⁸ Nake îthe wa Pubulio aarî gîtandarî amamîte nîûndû aarî mûrwaru mûrimû wa kûviûva mwîrî na kûvarwa. Paûlo nîwathiîre gwake nyomba, akîvoya na akîmwigîrîra njara na akîmûvonia.

⁹ Rîrîa ûndû ûcio wekîkire, andû arîa engî onthe maarî arwaru kûu gîcîgîrîrarî kîu nîmaathiîre na makîvonua.

¹⁰ Nao andû acio nîmaatûvere indo nyîngî. Na rîrîa twevarîrie kuuma kûu, nîmeekîrire indo nyîngî merirî irîa twavatarîte nîûndû wa rûgendo.

Paûlo nîwaumire Morita akîthiî Roma

¹¹ Vuva wa mîeri îthatû nîtwaumire kûu Morita tûkîthiî tûrî merirî ya kuuma Alekisandiria. Meri îo yetagwa “Ngai cia Mathatha”, îrîa yekarîte kûu gîcîgîrîrarî Kîam Morita vîndî ya mvevo.

¹² Rîrîa twakinyire îtûûrarî rîa Sirakusi, nîtwekarire kuo îvinda rîa mîthenya îthatû.

¹³ Kuuma kûu nîtwatwîre meri na tûkîthiî tûgîkinya îtûûrarî rîa Regiumu. Na mûthenya ûcio wîngî rûkûngi nîrwambîrîrie kûvurutana kuuma mwena wa îveti. Na mûthenya wa kaîrî nîtwakinyire îtûûrarî rîa Puteoli.

¹⁴ Natue nîtwethîre amwe a ariû na aarî a îthe wetû marî kûu. Nao nîmaatûririe twîkaranie vamwe nao kwa îvinda rîa mîthenya mûgwanja. Na ûguo nîguo twakinyire Roma.

¹⁵ Nao ariû na aarî a îthe wetû arîa maarî kûu Roma nîmegwire ûvoro wetû na magîûka nginya matûûrarî ma Thoko ya Apio na Mîkawa Îthatû gûtûtûnga. Na rîrîa Paûlo aamoonire, nîwagîre na ûmîrîru mwîngî na agîcokia ngatho kûrî Ngai.

Paûlo arî Roma

¹⁶ Rîrîa twakinyire Roma, Paûlo nîwetîkîrue ekare arî wenga marî na mûthigari wa kûmûrangîra.

¹⁷ Vuva wa mîthenya îthatû Paûlo nîwetire atongoria a Ayahudi vamwe. Na rîrîa maacemanirie nîwamerire atîrî, “Ariû na aarî a îthe wetû, ndianeka ûndû wana ûmwe ûreganîte na andû etû wana kana mîtugo îrîa twakinyîrue nî methe metû ma tene. Nwatî nînaanyitirwe na ngîvingîrwa njeera nîrî Jerusalemu na ngînenganîrwa kûrî Aaroma.

¹⁸ Vuva wa kûmbûria ciûria, mationa kûrî na gîtûmi Kîam nduîrwe kûûragwa. Aaroma nîmeendaga ndekererue,

¹⁹ nwatî Ayahudi matiendaga. Kwoguo nînoonire kûrî na vata wa gûcokia ciira riiko kûrî mûthamaki wa Roma. Nwatî ndiarî na ûndû wana ûmwe nîngîathitangire andû etû naguo.

²⁰ Kîu nîkîo kîratûmire mende kûmwona na twaranîrie namue. Ûvoro wa ma nî atî, njovetwe na mînyororo îno nîûndû wa mwîrîgîrîro wa Isiraeli.”

²¹ Nao atongoria acio a Ayahudi nîmeerire Paûlo atîrî, “Tue tûtirî anyitu maarûa kuuma Judea îrî na ûvoro ûkwîgiî. Gûtirî mûndû wana ûmwe wetû wauma kuo aûka gûtûva ûvoro kana ûndû wana ûmwe mûcûku ûkwîgiî.

²² Nwatî nîtûrenda kûmenya meciria maku, nîûndû nîtwîcî atî kûndû kuonthe andû nîmaramenereria gîkundi kîu Kîam ndini kîrîa we ûrî wakîo.”

²³ Kwoguo Paûlo na atongoria acio a Ayahudi nîmaathuurire mûthenya wa gûcemania. Na rîrîa mûthenya ûcio wakinyire, andû eengî mûno a Kîyahudi nîmaathiîre kûrîa Paûlo eekaraga. Nake Paûlo nîwamaarîrie kuuma kîraûko nginya ûtukû. Ke nîwatûmîre Watho wa Musa na mandîko ma arathi akîmataarîria ûvoro wîgiî Ûthamaki wa Ngai. Nîwageririe kûmonithia metîkie ûvoro wîgiî Jesû.

²⁴ Nao andû amwe gatagatîrî kao nîmeetîkirie ûvoro ûcio Paûlo aameerire, nwatî amwe matietîkia.

²⁵ Kwoguo nîmaakararanirie na makîambîrîria kuuma kûu rîrîa Paûlo aarîkirie kûmeera ûndû ûyû ûmwe: “Roho Mûtheru nîwavere methe menyu ma tene ûvoro wa ma na njîra ya mûrathi Isaia,

²⁶ nîûndû nîwaugire atîrî, ‘Thiî na wîre andû aya atî: Mue mûkaathikagîrîria nwatî mûtigaataûkagîrwa. Mue mûkaaroragia nwatî mûtikoonaga,

²⁷ nîûndû ngoro cia andû aya nî nyûmû, na nîmakunîkîte matû mao, na makavinga metho mao. Kethîrwa tî ûguo metho mao nî mangîrona, na matû mao nîmangîregua. Namo meciria mao nîmangîrî gûtaûkîrwa, makanjokerera, nanie ngamavonia.’

²⁸ “Kwoguo nînîrenda mûmenye atî Ngai nîatûmîte ûvoro wake wa ûvonokio kûrî andû a ndûrîrî, na o nîmakûthikîrîria!”

²⁹ [Rîrîa Paûlo aarîkirie kuga ûguo, Ayahudi acio nîmaathiîre magîkararanagia na vinya mûno.]

³⁰ Paûlo nîwekarire îvinda rîa mîaka îîrî nyombarî îrîa ke mwene aakomborete, na andû onthe arîa maamûceragîra nîwamanyitaga ûgeni.

³¹ Nîwavunjirie ûvoro wîgiî Ûthamaki wa Ngai na akîthomithania ûvoro wîgiî Mwathani Jesû Kristû. Eekire ûguo arî na ûmîrîru mwîngî mûno na gûtarî na mûndû ûkûmûgiria.