Ciîko 27 - ÎVUKU RÎA ÛVORO MWARO

Paûlo nîwakuuirwe na meri akîvirwa Roma

¹ Nakuo nîgwatwirwe atî nîtwagîrîrwe nî gûtwa meri tûthiî Italia. Nake Paûlo na andû amwe arîa maarî ove njeera nîmaanenganîrwe kûrî Juliasi ûrîa warî mûnene wa mbûtû ya athigari a Roma îrîa yetagwa “Mbûtû ya Mûthamaki.”

² Natue nîtwatwîre merirî îrîa yaumîte Adiramîtu na yagerie kûthiî matûûrarî mwanya mwanya ma marîa maarî na irûngamo cia meri gîcunjîrî Kîam Asia. Nake Arisitariko ûrîa warî wa kuuma îtûûrarî rîa Thesalonike vûrûrirî wa Makedonia, nîwathiîcanirie natue.

³ Na mûthenya ûcio wîngî nîtwakinyire Sidoni. Na tûrî kûu Juliasi nîwatugire Paûlo waro mûno na a akîmwîtîkîria athiî kûrî arata ake nîguo avewe kîrîa aavatarîte.

⁴ Nîtwaumire kûu Sidoni tûtwîte meri na tûkîthiî tûrî mwena wa îrathîro wa gîcîgîrîra gîa Kuporo, nîûndû rûkûngi nîrwavurutanaga rumîte na kûrîa twathiîte.

⁵ Natue nîtwaringire îria tûrî vakuvî mûno na mavûrûri ma Kilikia na Pamufilia na tûgîkinya îtûûrarî rîa Mura kûu Lukia,

⁶ nîtwaumire merirî îrîa twarî na tûgîtwîthua merirî îngî îrîa mûnene ûcio wa athigari ethîîre kuo. Meri îo yaumîte Alekisandiria na yathiîte Italia.

⁷ Na kwa îvinda rîa mîthenya mîîngî, nîtwathiîre kavora tûrî merirî. Na vuva wa kûrîa thîna mûno nîtwakinyire vakuvî na îtûûra rîa Kinidu. Nîtwaremirwe nî kûthiî na mbere nîûndû rûkûngi rwavurutanaga rumîte na kûrîa twathiîte. Kwoguo nîtwathiîre tûrî merirî na tûkîthiî mwena wa îveti wa gîcîgîrîra gîa Kirene tûkîvîtûkîrîra Salomone.

⁸ Nîtwathiîre rûgendo rwarî na thîna mûno twîgiritanîtie na rûtere rwa îria, tûgîkinya vandû vetagwa Kîrûngamo Kîaro Kîam Meri kîrîa Kîamrî vakuvî na îtûûra rîa Lasea.

⁹ Nîtwatere mîthenya mîîngî rûgendorî nginya tûkîgîa na ûgwati wa kûthiî na mbere na rûgendo rwetû tûrî merirî nîûndû mûthenya wa kwîtheria mevia nîwarîkîtie kûvîtûka. Kwoguo Paûlo nîwamataarire akîmeera atîrî:

¹⁰ “Athuuri aya, nînîrona atî rûgendo rwetû rwa kuuma gûkû kûthiî na mbere tûrî merirî nîrûkwîthîrwa rûrî na ûgwati. Nîtûkûûrwa nî mîrigo, tûrwe nî meri wana nginya tûrwe nî mîoyo.”

¹¹ Nwatî mûnene ûcio wa athigari a Roma ndetîkia ûrîa ke eerirwe nî Paûlo, nwatî etîkirie ûrîa eerirwe nî mûtwarithia wa meri na mwene yo.

¹² Na nîûndû kîrûngamo kîu Kîam meri gîtiarî Kîamro mûno gîa gwîkarwa vîndî ya mbevo, andû eengî nî meendire tuume kûu, nîguo kûngîvoteka tûkinye Foenike na twîkare kuo îvinda rîa mvevo. Foenike rîarî îtûûra rîarî gîcîgîrîrarî gîa Kirete na rîarî na kîrûngamo Kîam meri Kîamroretie mwena wa gatagatî ka îveti na îthûîro, na mwena wa gatagatî ka rûgûrû na îthûîro.

Nîkwagîre na rûvuvo rûnene mûno îriarî

¹³ Rîrîa rûkûngi rûnini rwambîrîrie kûvurutana rumîte mwena wa îveti, andû arîa maarî merirî nîmeciririe atî nwa mathiî na mbere na mûvango wao. Kwoguo nîmaagucirie icuuma ndito irîa inyûrûrûkagua îriarî nthî nîguo inyitîrîre meri nîguo îrûngame. Nîmaatwîre meri na makîthiî megiritanîtie na rûtere rwa gîcîgîrîra Kîam Kirete.

¹⁴ Nwatî wa rîo rûkûngi rûnene mûno rwetagwa “Rûkûngi rwa kuuma gatagatî ka rûgûrû na îrathîro” nîrwavurutanire rûkînyûrûrûka rumîte gîcîgîrîrarî.

¹⁵ Nayo meri nîyaremirwe nî kûthiî na mbere nîûndû rûkûngi rwavurutanaga rumîte na kûrîa meri yathiîte. Kwoguo nîtwonire atî tîkûvoteka na tûkîrekereria meri îo îtwarwe nî rûkûngi rûu.

¹⁶ Natue nîtwathiîre twîgiritanîtie na rûtere rwa îveti rwa gîcîgîrîra gîetagwa Kauda. Na vuva wa thîna nyîngî, nîtwavotire kûvonokia gatarû karîa kethagîrwa karî merirî.

¹⁷ Rîrîa maagucirie gatarû kau na magîgatwîthia merirî, nîmoovire meri na mîkanda nîguo mamînyinyanie vamwe nîguo ndîkambûranue nî rûvuvo. Andû nîmeetigagîra atî meri yavota kwîînjîra mûthangarî ûrîa warî manjîrî rûtererî rwa îria rîa Lîbia, kwoguo nîmaanyûrûrûkirie gîtambaa gîa gûtwarithia meri na makîrekereria meri îkuuwe nî rûkûngi.

¹⁸ Rûkûngi rûu nîrwavurutanaga mûno na kwoguo mûthenya ûcio wîngî andû nîmaambîrîrie gwocania mîrigo îrîa yakuuîtwe nî meri makîmikagia manjîrî.

¹⁹ Mûthenya wa kathatû, nîmaaikirie indo imwe kûu îriarî.

²⁰ Na rîrîa riûa wana njata ciaregire kuumîra kwa îvinda rîa mîthenya mîîngî, na rûkûngi rûgîkara rûkîvurutanaga na vinya mûno, nîtwatere mwîrîgîrîro wonthe wetû wa kûvonoka.

²¹ Nao andû arîa maarî merirî nîmeekarîte îvinda îraca mûno matakûrîa wa naarî kîndû. Nake Paûlo nîwarûngamire vau mbere yao na akîmeera atîrî, “Athuuri aya, mue mûngîranthikîrîrie, tûtingîraumire Kirete na indo cietû itingîcûkangîtue wana kana ikaûra.

²² Nwatî rîu nîramûthaitha mwîyûmîrîrie! Gûtirî mûndû wana ûmwe gatagatîrî kenyu ûkûrwa nî mwoyo wake. Meri tu nîyo îkûûra.

²³ Ûtukû wa îgoro mûraika wa Ngai, Ngai ûrîa nîrî wake na ngoocaga, nîaranyumîrîre

²⁴ na ambîra atîrî, ‘Tiga kwîgua guoya, Paûlo! We nwanginya ûrûngame mbere ya mûthamaki wa Roma. Ngai nîûndû wa wega wake akaavonokia mîoyo ya andû onthe arîa mûthiîcanîtie nao mûrî merirî.’

²⁵ Kwoguo athuuri aya ûmîrîriani! Nie nînîvokete Ngai na nîrî na ma atî maûndû monthe nîmagûtuîkîka wata ûguo nîrerirwe.

²⁶ Nwatî nwanginya tûkaavirwa rûtere rwa gîcîgîrîra kîmwe.”

²⁷ Na kavinda ga ciumia igîrî, twacûgagua nî rûkûngi tûrî îriarî rîa Mediterania. Na kîndû ta ûtukû gatagatî amenyereri a meri nîmaambîrîrie kwona takwa twakuvagîrîria nthî nyûmû.

²⁸ Kwoguo nîmaanyûrûrûkirie kîthimi manjîrî na makîmenya atî manjî maarî na ûrikîru wa mita mîrongo îna. Vuva wa kûthiîcathiîca vanini, nîmaanyûrûrûkirie kîthimi kîu manjîrî wa rîngî na makîmenya atî manjî maarî na ûrikîru wa mita mîrongo îthatû.

²⁹ Nao amenyereri acio a meri nîmeetigagîra atî meri îrîa twarî yavota kûvirwa mathigarî nî rûkûngi. Kwoguo nîmaanyûrûrûkirie cuuma inya ndito kuuma merirî vuva irîa inyûrûrûkagua îriarî nthî ciovereretwe merirî nîguo imînyitîrîre. Nao nîmaavoire gûkîe.

³⁰ Amenyereri amwe a meri îo nîmaageririe kuuma merirî maûre. Nîmaanyûrûrûkirie gatarû karîa kethagîrwa karî merirî takwa maranyûrûrûkia cuuma ciîngî ndito cia kûnyitîrîra meri kuuma mwena wa mbere.

³¹ Nwatî Paûlo nîwerire mûnene wa athigari îgana na athigari acio engî atîrî, “Ethîrwa amenyereri aya a meri tî mekara gûkû merirî, mue tîmûvonokia mîoyo yenyu.”

³² Kwoguo athigari acio nîmaarengire mîkanda îrîa yanyitîrîrîte gatarû na magîkarekereria gakîvarûka manjîrî.

³³ Rîrîa kwageerie gûkîa, Paûlo nîwathaithire andû onthe akîmeera metîkîre kûrîa. Nake nîwamerire atîrî, “Ûmûnthî nî mûthenya wa îkûmi na kana na mwîkarîte mwetererete na mûtakûrîa kîndû.

³⁴ Rîu mwenda tu îtîkîrani kûrîa irio. Mwona mwarîa, mîîrî yenyu nîkûgîa na vinya. Gûtirî mûndû wana ûmwe wa cienyu ûkaûrwa nî rûcuîrî wana rûmwe rwa kîongo gîake.”

³⁵ Rîrîa Paûlo aarîkirie kuga ûguo, nîwocire mûgate, agîcokia ngatho kûrî Ngai nîûndû waguo arî vau mbere ya andû onthe, akîwenyûra na akîambîrîria kûrîa.

³⁶ Kwoguo andû onthe nîmaagîre na ûmîrîru na makîambîrîria kûrîa wana o.

³⁷ Nayo meri îo yathiîte îkuuîte andû magana maîrî ma mîrongo mûgwanja na atandatû.

³⁸ Rîrîa andû onthe meeganirie kûrîa, nîmaaikirie ngano yonthe kûu îriarî nîguo meri îvûthavûthe.

Meri nîyaunangirwe.

³⁹ Rîrîa gwakeere, amenyereri a meri nîmoonire nthî nyûmû. Matiamenya nthî îo nyûmû yarî îrîkû, nwatî nîmoonire vandû îria rîatonyete nthî nyûmû na varî na mûthanga. Nao nîmaatuire atî nîmakûgeria kûvira meri îo rûtere rwa îria kûrîa kwarî na mûthanga.

⁴⁰ Kwoguo nîmaarengire mîkanda îrîa yanyitîrîrîte cuuma ndito irîa inyitagîrîra meri îriarî na makîirekereria ikîvorokera kûu îriarî. Na vîndî wa îo nîmoovorire mîkanda îrîa yovete itugî irîa ciambîte cuka cia kûruguta meri. Nao nîmaacokire magîcuria cuka cia mwena wa mbere nîguo ivurutwe nî rûkûngi na meri îthiî mbere. Nîtwathiîre rûtere rwa îria.

⁴¹ Nwatî meri nayo nîyaturumire nguva ya mûthanga. Naguo mwena wa mbere wa meri îo nîwaremere vo. Nwatî mwena wa vuva wayo nîwaunangirwe nî ndivû ciarî nene cia manjî.

⁴² Nao athigari nîmaavangire maûrage andû onthe arîa moovetwe nîguo gûtikanae kwonekana mûndû wana ûmwe wa ciao ûkûthambîra aume îriarî na aûre.

⁴³ Nwatî mûnene wa athigari îgana nîwendaga kûvonokia Paûlo ndakaûragwe, kwoguo ndaametîkîria mavingie mûvango ûcio wao. Vandû va ûguo nîwathire andû onthe arîa mangîavotire kûthambîra mambe marûge îriarî mathambîre mathiî nthî nyûmû.

⁴⁴ Nao acio engî maarî mamaume vuva menyitîrîrîte mbaûrî kana icunjîrî irîa ciatigarîte cia meri. Na ûguo nîguo tuonthe twavotire gûkinya nthî nyûmû waro.