Ciîko 25 - ÎVUKU RÎA ÛVORO MWARO

Paûlo nîwacokirie ciira riiko kûrî Mûthamaki

¹ Mîthenya îthatû yathira kuuma Fesito atuîka mwarîrîria wa thirikari, nîwaumire Kaisarea akiunûkia Jerusalemu.

² Anene a athînjîri-Ngai na atongoria a Ayahudi nîmaathitangire Paûlo kûrî Fesito. Nao nîmaathaithire Fesito makîmûûria

³ etîkîre Paûlo aretwe Jerusalemu nîûndû nîmaavangîte kûmûûraga arî njîrarî athiîte.

⁴ Nake Fesito nîwamacokerie atîrî, “Paûlo aigîtwe ovetwe njeera Kaisarea na nie mwene nîmvangîte gûcoka kuo vuva wa kavinda kanini.

⁵ Kwoguo tigani atongoria amwe gatagatîrî kenyu manyûrûrûkanie nanie Kaisarea nîguo mathiî makathitange mûndû ûcio ethîrwa nîekîte ûndû mûcûku.”

⁶ Fesito nîwekaranirie nao mîthenya înana kana îkûmi na agîcoka akînyûrûrûka Kaisarea. Na mûthenya ûcio wîngî, Fesito nîwatonyire îgootirî, agîkarîra gîtî arî mûtucanîri ciira na akîathana Paûlo atonyue kuo.

⁷ Rîrîa Paûlo aakinyire, Ayahudi arîa maanyûrûrûkîte kuuma Jerusalemu nîmaarûngamire mamûthiûrûrûkîrîtie na makîambîrîria kûmûthitanga na maûndû meengî macûku marîa mataavota kwonania ûma wamo.

⁸ Nwatî Paûlo ke mwene nîwetetere akiuga atîrî: “Gûtirî ûndû nie mbîkîte ûreganîte na watho wa Ayahudi, kana ûreganîte na hekarû wana kana ûreganîte na mûthamaki wa Roma.”

⁹ Nwatî Fesito nîwendaga kwîyendithia kûrî Ayahudi. Kwoguo nîwaûririe Paûlo atîrî, “We nwa wende kûthiî Jerusalemu nîguo ngagûcirithîrie kuo îgûrû rîa maûndû mama?”

¹⁰ Nake Paûlo nîwamûcokerie atîrî, “Nie rîu nûngamîte îgootirî rîa Mûthamaki wa Roma kûrîa andû matucagîrwa, na nîkuo mbagîrîrwe nî gûcirithîrua. Gûtirî ûndû mvîtîrîtie Ayahudi naguo. We mwene nîwîcî ûguo waro.

¹¹ Ethîrwa nîmunîte watho na ngeka ûndû ûngîtûma nduîrwe kûûragwa, nie ndirauga ndigatuîrwe kûûragwa. Nwatî ethîrwa maûndû mau nthitangîtwe nîûndû wamo matirî na ûma, gûtirî mûndû ûrî na kîvooto gîa kûnenganîra kûrî o. Nie nînacokia ciira riiko kûrî mûthamaki wa Roma.”

¹² Rîrîa Fesito aarîkirie kwaranîria na andû arîa maamûtaaraga, nîwacokerie Paûlo atîrî, “We nîwacokia ciira riiko kûrî mûthamaki wa Roma. Kwoguo nîûkûthiî kûrî mûthamaki wa Roma.”

Paûlo arî mbere ya Angiripa na Banîci

¹³ Mîthenya mînini yarîkia kûvîtûka, Mûthamaki Angiripa na Banîci nîmaakinyire Kaisarea mathiîte gûcerera na kûnyita Fesito ûgeni.

¹⁴ Nîwataarîrie mûthamaki ûvoro wîgiî Paûlo na akiuga atîrî: “Ava varî na mûndû watigirwe arî njeera nî Feliki.

¹⁵ Rîrîa naathiîre Jerusalemu, anene a athînjîri-Ngai na athuuri a Ayahudi nîmaaûkire kûmûthitanga kûrî nie na makîmbîra nîmûtuîre.

¹⁶ Nwatî nînameerire atî tue Aroma tûtiîthagîrwa tûrî na mûtugo wa kûnenganîra mûndû ûrîa ûthitangîtwe tûtambîte kûmwîtîkîria onane na arîa maramûthitanga. Nîtwambaga kûva mûndû ta ûcio kanya nîguo etetere kuumana na maûndû marîa athitangîtwe namo.

¹⁷ Kwoguo vîndî îrîa Ayahudi aya maaûkire gûkû Kaisarea marî vamwe, nie ndiata kavinda, nwakwa mûthenya ûcio wîngî naatonyire îgootirî, ngîkarîra gîtî kîrîa gîkaragîrwa andû magîtuîrwa na ngîathana ngiuga atonyue kuo.

¹⁸ Nao andû arîa maamûthitangaga nîmaarûngamire, nwatî matiamûthitanga wanarî na ngero îmwe ya irîa neciragîria.

¹⁹ Nwatî nîkwarî na maûndû mamwe maatûmaga makararanie nake. Nîmaakararanagia nake îgûrû rîa ûvoro wîgiî ndini yao na wîgiî mûndû ûmwe wîtagwa Jesû ûrîa wakuîte. Nwatî Paûlo nîwaugaga aûmîrîrîtie atî mûndû ûcio arî mwoyo.

²⁰ Na nîûndû nînaaremirwe nî gûtuîria ûvoro wîgiî maûndû mama nînaûririe Paûlo kana nwa ende kûthiî Jerusalemu nîguo agacirithîrue kuo îgûrû rîa maûndû mau.

²¹ Nwatî Paûlo nîwacokirie ciira riiko akiuga aigwe njeera nîguo eterere îtua rîa mûthamaki wa Roma. Kwoguo nînathanire ngiuga aigwe arangîrîtwe nginya rîrîa ngaatûmana avirwe kûrî mûthamaki wa Roma.”

²² Nake Angiripa nîwerire Fesito atîrî, “Nie mwene nwa mende kûthikîrîria mûndû ûyû.” Nake Fesito nîwamwîrire atîrî, “We nîûkaamwîgua rûyû.”

²³ Mûthenya ûcio wîngî Angiripa na Banîci nîmaakinyire na makîoneka marî andû a vata mûno. Nao nîmaatonyire kûu nyomba ya gûcemanîrua marî na anene a mbûtû cia athigari a Roma na andû arîa maarî na îgweta îtûûrarî rîu. Nake Fesito nîwathanire Paûlo atonyue kuo.

²⁴ Fesito nîwacokire akiuga atîrî, “Mûthamaki Angiripa na muonthe arîa mûrî ava vamwe natue: Mue nîmûrona mûndû ûyû, ke nîke ûtûmîte Ayahudi onthe arîa marî Jerusalemu marete mateta kûrî nie makiugagîrîria atî ke ndagîrîrwe nî gûtûûra mwoyo.

²⁵ Nwatî monire atî ke tîmwîku wa naarî ûndû ûngîtûma atuîrwe kûûragwa. Na nîûndû ke mwene nîacokirie ciira riiko acirithue nî mûthamaki wa Roma, nînthondekire îtua avirwe kûrî ke.

²⁶ Nwatî ndirî na ûndû wana ûmwe ûrîa guo wîgiî mûndû ûyû nîngîandîkîra Mûthamaki wa Roma. Kwoguo nînamûrete ava mbere yenyu muonthe na mûno makîria mbere yaku, we mûthamaki Angiripa nîguo twarîkia kûria mûndû ûyû ciûria, nwa ngîe na ûndû wa kwandîka.

²⁷ Nie ndirona kûrî na gîtûmi gîa kuga mûndû ûyû wovetwe avirwe kûrî mûthamaki wa Roma tûtakwonania waro maûndû marîa mûndû ûyû athitangîtwe nîûndû wamo.”