Ciîko 23 - ÎVUKU RÎA ÛVORO MWARO

¹ Paûlo nîwaroririe athuuri a Kîamma araûkîtie mûno na akiuga atîrî, “Ariû na aarî a îthe wetû, methorî ma Ngai nie nîndûûrîte nîrî na thamiri ntheru nginya mûthenya ûyû wa ûmûnthî.”

² Nake Anania ûrîa warî Mûthînjîri-Ngai ûrîa mûnene nîwathire andû arîa maarûngamîte vakuvî na Paûlo akîmeera maviûkie Paûlo rûvî rwa kanyua.

³ Nake Paûlo nîwerire Anania atîrî, “Wa nawe Ngai nwanginya akûviûkie. We wîkariî ta rûthingo rûrî rûvake rangi njerû. Wîkarîte vau nîguo ûnduîre kûringana na watho, nwatî we nîkwa ûrauna watho na njîra ya kûmeera mamviûkie rûvî!”

⁴ Nao andû arîa maarûngamîte vakuvî na Paûlo nîmaamûririe atîrî, “Nî Mûthînjîri-Ngai ûrîa mûnene ûraruma?”

⁵ Nake Paûlo nîwamacokerie atîrî, “Ariû na aarî a îthe wetû, nie ndiraicî atî ke nî Mûthînjîri-Ngai ûrîa mûnene. Nîkwandîkîtwe mandîkorî matheru atîrî, ‘Ndûkanarie ûndû mûcûku wîgiî mûnene wa andû enyu.’ ”

⁶ Nwatî vîndî îrîa Paûlo aamenyire atî andû amwe arîa maarî Kîammarî kîu maarî Asadukai na engî maarî Afarisai nîwaugîrîrie atîrî, “Arîu na aarî a îthe wetû, nie nîrî Mûfarisai na aciari akwa maarî Afarisai. Nîrî ava ngîcirithua nîûndû wa mwîrîgîrîro ûrîa nîrî naguo atî akuû nîmakaariûka!”

⁷ Rîrîa Paûlo aaugire ûguo, Afarisai na Asadukai nîmaambîrîrie gûkararania na gûkîgîa na ngaûkano kûu gîkundirî kîu.

⁸ (Kwagîîre na ngaûkano nîûndû Asadukai maugaga atî gûtirî araika kana maroho na atî andû matikaariûka; nwatî Ayahudi nîmetîkîtie maûndû mau monthe mathatû.)

⁹ Kwoguo nîkwagîre na înegene rînene. Nao arimû amwe a watho arîa maarî a gîkundi Kîam Afarisai nîmaarûngamire na makiuga meyûmîrîrîtie atîrî: “Tue tûtirona ûndû mûcûku wîkîtwe nî mûndû ûyû! Nwa kwîthîrwe roho kana mûraika nîke ûramwarîrie!”

¹⁰ Nacio ngarari nîciengîvire mûno nginya mûnene wa mbûtû ya athigari akîambîrîria kwîgua guoya akîona takwa Paûlo agûtembûranganua tûcunjî nî Ayahudi. Kwoguo mûnene ûcio wa mbûtû ya athigari nîwathire athigari ake akîmeera manyûrûrûke mathiî varîa Paûlo aarî, mamûrute vo na vinya na mamûvire kûrîa athigari maambîte magema.

¹¹ Ûtukû ûcio Mwathani nîwarûngamire vakuvî na Paûlo na akîmwîra atîrî, “Ûmîrîria! Nîûndû wata ûrîa we waruta ûira ûmbîgiî kûrî andû arîa marî gûkû Jerusalemu nwa ta guo ûkaaruta ûira ûmbîgiî kûrî andû arîa marî Roma.”

Ayahudi nîmaavangire ûrîa makûûraga Paûlo

¹² Rîrîa gwakeere, Ayahudi nîmaathondekire mûvango wa ûrîa makûûraga Paûlo. Nîmaacokire makîîvîta atî matingîrîa kana manyue kîndû matambîte kûûraga Paûlo.

¹³ Nakuo kwarî na makîria ya Ayahudi mîrongo îna arîa maathondekaga mûvango ûcio.

¹⁴ Nao nîmaathiîre kûrî anene a athînjîri-Ngai na athuuri na makîmeera atîrî, “Tue nîtwevîta tûrî vamwe atî tûtingîrîa kana tûnyue kîndû tûtambîte kûûraga Paûlo.

¹⁵ Kwoguo tûrenda mue vamwe na athuuri a Kîamma Kîam Ayahudi mûtûmane kûrî mûnene wa mbûtû ya athigari a Roma muge mûreterwe Paûlo, mwîtuîte takwa mûrenda kûmenya waro ûvoro ûmwîgiî. Nwatî nîtûkwîthîrwa twîvarîrîtie kûmûraga wana atarî mûkinyu gûkû.”

¹⁶ Nake mwanake ûmwe wa mwarwang'ina na Paûlo nîwegwire ûvoro wîgiî mûvango ûcio. Kwoguo mwanake ûcio nîwathiîre kûrîa athigari maarî na akîîra Paûlo.

¹⁷ Paûlo nîwacokire agîîta mûnene ûmwe wa athigari îgana na akîmwîra atîrî, “Tavira mwanake ûyû kûrî mûnene wa mbûtû ya athigari nîûndû arî na ûndû arenda kûmwîra.”

¹⁸ Nake mûnene ûcio wa athigari îgana nîwavirire mwanake ûcio kûrî mûnene wa mbûtû ya athigari na akîmwîra atîrî, “Mûndû ûrîa wovetwe njeera wîtagwa Paûlo ambîtire na ambûria ndete mwanake ûyû kûrî we, nîûndû arî na ûndû arenda gûkwîra.”

¹⁹ Nake mûnene ûcio wa mbûtû ya athigari nîwanyitire mwanake ûcio njara, akîmûtongoreria makîthiî vandû vataarî na andû na akîmûria atîrî, “Ûrenda kûmbîra atîa?”

²⁰ Nake mwanake ûcio nîwamwîrire atîrî, “Ayahudi nîmarîkîtie gwîtîkanîria makûûrie wîtîkîre Paûlo akaanyûrûrûkua Kîammarî Kîamo rûyû. O maretua atî nî Kîamma Kîamo kîrenda kûmenya waro ûvoro ûmwîgiî.

²¹ Nwatî ndûgetîkîre nîûndû nîkûrî na andû makîria ya mîrongo îna makwîthitha na mamweterere. O nîmarîkîtie kwîvîta atî matingîrîa kana manyue kîndû matambîte kûûraga Paûlo. Nîmevarîrîtie gwîka ûguo na nîkwa metererete îtua rîaku.”

²² Kwoguo mûnene ûcio wa mbûtû ya athigari nîwathire mwanake ûcio atîrî, “Ndûkanere mûndû wana ûrîkû atî we nîwamenyithia ûvoro wîgiî mûvango wao.” Mûnene ûcio wa mbûtû ya athigari nîwacokire akîîra mwanake ûcio aumagare athiî.

Paûlo nîwavirirwe kûrî Mwarîrîria Feliki

²³ Nake mûnene wa mbûtû ya athigari nîwacokire agîîta anene aîrî a athigari îgana na akîmeera atîrî, “Nîrenda andû a kûthiî Kaisarea. Varîria athigari magana maîrî, na methîrwe marî vamwe na athigari mîrongo mûgwanja arîa marûaga matûîte mbarathi, na athigari magana maîrî arîa marûaga na matumû. Andû acio mevarîrie makaauma gûkû thaa îthatû cia ûtukû.

²⁴ Varîriani mbarathi irîa ikaathiî ikuuîte Paûlo nîguo mûkaamûkinyia kûrî mûnene Feliki mûmûmenyererete.”

²⁵ Mûnene ûcio wa mbûtû ya athigari nîwacokire akîandîka maarûa yaugaga atîrî:

²⁶ “Nie Kilaudio Lîsia, nînagûkethia we mûnene mûgathe Feliki.

²⁷ Ayahudi nîmaranyitîte mûndû ûyû na maratigarîtie vanini mûno kûmûûraga. Na rîrîa nîramenyire atî ke nîwa Roma, nînîrathiîre tûrî vamwe na athigari akwa na tûkîmûtigithia.

²⁸ Na nîûndû nînîrendaga kûmenya maramûthitangaga nîkî, nînîramûnyûrûrûkirie Kîamarî Kîamo.

²⁹ Nînîramenyire atî Ayahudi marathitanga Paûlo nîûndû nîaregete tûmaûndû tûmwe twa watho wao. Nwatî gûtirî ûndû wana ûmwe ekîte ûngîtûma atuîrîrwe kûûragwa kana kwovwa njeera.

³⁰ Rîrîa nîramenyire atî Ayahudi amwe nîmarenda kûmûûraga, nîratuire aretwe kûrî we wa rîmwe. Nînîracokire nera amûthitangi maûke kûrî we nîguo makwîre maûndû marîa maramûthitanga namo.”

³¹ Kwoguo kûringana na ûrîa athigari maataarîtwe, nîmoocire Paûlo ûtukû wa ûcio na makîmûvira îtûûrarî rîa Antipatirisi.

³² Na mûthenya ûcio warûmîrîrîte, athigari arîa marûaga matwîte mbarathi nîmaathiîre Kaisarea marî vamwe na Paûlo, nwatî athigari acio engî nîmaacokire kûrîa maambîte magema.

³³ Rîrîa athigari arîa marûaga matwîte mbarathi maakinyire Kaisarea, nîmaakinyirie maarûa îo kûrî mûnene Feliki na makînenganîra Paûlo kûrî ke.

³⁴ Mûnene ûcio nîwathomire maarûa îo na akîûria Paûlo atîrî, “We-î, wî wa kuuma kû?” Na rîrîa aamenyire atî Paûlo aarî wa kuuma Kilikia,

³⁵ nîwamwîrire atîrî, “Nie ngaakûthikîrîria vîndî îrîa arîa makûthitangîte magaakinya.” Nake mûnene ûcio nîwacokire akîathana akiuga Paûlo arangîrwe arî kûu mûciî ûrîa watumîtwe nî Herode.