Ciîko 21 - ÎVUKU RÎA ÛVORO MWARO

Paûlo nîwathiîre Jerusalemu

¹ Rîrîa twarîkirie kûmaugîra ûvoro, nîtwatwîre merirî na tûkîthiî tûrûngîrîrîtie tûgîkinya gîcîgîrîrarî gîa Kosi. Naguo mûthenya ûcio wîngî nîtwakinyire gîcîgîrîrarî Kîam Rodesi, na kuuma kûu tûkîthiî îtûûrarî rîa Patara.

² Na kûu nîtwethîrîrie meri yathiîte vûrûrirî wa Foenike, kwoguo nîtwamîtwîre na tûkîthiî.

³ Natue nîtwakinyire vakuvî mûno na gîcîgîrîra gîa Kuporo. Nîtwavîtûkire tûgîkîonaga kîrî mwena wa rûgûrû na tûkîthiî tûgîkinya Sîria. Natue nîtwatiramire îtûûrarî rîa Turo kûrîa meri yathiîte kûrutwa mîrigo.

⁴ Rîrîa twacaririe arutwa kûu Turo na tûkîmona, nîtwekaranirie nao kuo mîthenya mûgwanja. Nao monetue nî Roho Mûtheru nîmeerire Paûlo ndakathiî îtûûrarî rîa Jerusalemu.

⁵ Na rîrîa kavinda getû ga gwîkarania nao kaathirire, nîtwaumire kuo tûkîthiî na mbere na rûgendo rwetû. Nao arutwa onthe vamwe na aka ao na ciana, nîmaatumagaririe magîtûkinyia nja ya îtûûra rîu. Tuonthe nîtwaturirie maru vau rûtererî rwa îria na tûkîvoya.

⁶ Na rîrîa twarîkirie kuganîra ûvoro, o nîmaacokire mîciî kwao, natue tûgîtwa merirî tûkîîthiîra.

⁷ Nîtwathiîre na mbere na rûgendo rwetû tûrî merirî, na tûkiuma Turo tûgîkinya îtûûrarî rîa Pitolemai, kûrîa twakeethirie ariû na aarî a îthe wetû na tûgîkarania nao mûthenya ûmwe.

⁸ Naguo mûthenya ûcio warûmîrîrîte nîtwaumire kûu Pitolemai na tûkîthiî îtûûrarî rîa Kaisarea. Kûu nîtwatonyire nyomba kwa Filipu ûrîa warî ûmwe gatagatîrî ka andû mûgwanja arîa maathuurîtwe matuîke atethereria kûu Jerusalemu.

⁹ Nake aarî na erîtu ana mataarî aviku na maarî na kîveo Kîam ûrathi.

¹⁰ Na vuva wa gwîkara kûu mîthenya mînini, mûrathi ûmwe wetagwa Agabo nîwakinyire aumîte Judea.

¹¹ Nake nîwaûkire kûrî tue, agîoca mûcivi wa Paûlo, akîîova naguo njara ciake na magûrû, na akiuga atîrî, “Roho Mûtheru arauga atîrî: ‘Mwene mûcivi ûyû akoovwa wata ûguo nî Ayahudi arîa marî Jerusalemu na macoke mamûnenganîre kûrî andû a Ndûrîrî.’ ”

¹² Rîrîa twegwire ûguo, tue na andû arîa engî maarî vo nîtwathaithire Paûlo tûkîmwîra ndakathiî Jerusalemu.

¹³ Nwatî nîwatûcokerie atîrî, “Mue mûreka atîa? Mûrarîra methori na mûkambûraga ngoro nîkî? Nie nînîvarîrîtie kwovwa njeera wana gûkua nîrî kûu Jerusalemu nîûndû wa rîîtwa rîa Mwathani Jesû.”

¹⁴ Tûtiavota kûmwîguithia ndakathiî Jerusalemu. Kwoguo nîtwatigire kûmûthaitha na tûkiuga atîrî, “Wendi wa Mwathani nî wîkwe.”

¹⁵ Vuva wa gwîkara kûu gwa kavinda, nîtwavarîrie indo cietû na tûkiunûkia Jerusalemu.

¹⁶ Nao arutwa amwe a kuuma îtûûrarî rîa Kaisarea nîmaathiîcanirie natue na magîtûvira nyomba kwa Munasoni ûrîa twathiîte gwîkara gwake. Ke aarî wa kuuma gîcîgîrîrarî gîa Kuporo na aarî ûmwe gatagatîrî ka etîkia arîa a mbere.

Paûlo nîwacerere Jakovu

¹⁷ Rîrîa twakinyire Jerusalemu, etîkia arîa maarî kuo nîmaatûnyitire ûgeni macanjamûkîte mûno.

¹⁸ Na mûthenya ûcio wîngî Paûlo nîwathiîcanirie natue kwa Jakuvu, na athuuri onthe a kanitha maarî kuo.

¹⁹ Paûlo nîwamakethirie na akîmeera maûndû monthe marîa Ngai eekîte gatagatîrî ka andû a ndûrîrî na njîra ya wîra wake.

²⁰ Rîrîa meegwire ûguo, nîmaakumirie Ngai. Nao nîmaacokire makîra Paûlo atîrî, “Mûrû wa îthe wetû, we nîûrona atî Ayahudi ngiri nyîngî nîmatuîkîte etîkia. Nao onthe nîmarûmagîrîra Watho wa Musa marî na kîîo kîîngî mûno.

²¹ O nîmerîtwe atî we nîûrathomithia Ayahudi arîa matûûraga mavûrûrirî ma andû a ndûrîrî matiganîrie Watho wa Musa. Na nîmeguîte atî nîûrera Ayahudi acio matikaruithie ciana ciao na matikathîkîre mîtugo ya Kîyahudi.

²² Na nîûndû nwanginya megue atî we nîwakinya, nîtwîka atîa?

²³ Kwoguo nîtûgûkwîra ûrîa we ûgwîka. Gûkû kûrî na arûme ana mevîtîte.

²⁴ Thiîcania nao, ûnyitanîre nao îgongoonarî rîao rîa kwîtheria na ûrîve matûmîri mao monthe nîguo menjwe ciongo. Na njîra îno andû onthe makaamenya atî maûndû marîa maregua makwîgiî tî ma ma. Nwatî we mwene nîûtûûraga kûringana na Watho wa Musa.

²⁵ Nwatî tue nîtûrîkîtie kwandîka maarûa kûrî andû a ndûrîrî arîa matuîkîte etîkia. Nîtûmerîte atî nîtûtuîte na ma atî nwa nginya matige kûrîa irio irîa irutîrîtwe mîvuanano, kûrîa nthakame, kûrîa nyama cia nyamû irîa ciîthagîrwa citîtwe itagwîtûrûra nthakame, na atî o matiagîrîrwe nî gwîka ciîko cia ûmaraa.”

²⁶ Kwoguo mûthenya ûcio wîngî Paûlo nîwocire arûme acio ana na akînyitanîra nao îgongoonarî rîao rîa kwîtheria. Nîwacokire akîthiî hekarûrî na akîmenyithania rîrîa mîthenya ya îgongoona rîu rîa kwîtheria îkaathira na rîrîa îtega rîa mûndû wa mûndû rîkaarutwa.

Paûlo nîwanyitirwe arî hekarûrî

²⁷ Nwatî rîrîa mîthenya mûgwanja yatigarîtie vanini îthire, Ayahudi amwe a kuuma vûrûrirî wa Asia nîmoonire Paûlo arî hekarûrî. Nao nîmaaunjugire kîrîndî kîonthe na makînyita Paûlo.

²⁸ Nao nîmaaugîrîrie atîrî, “Andû a Isiraeli! Tûtethererieni! Mûndû ûyû nîke ûthiîcaga kûndû kuonthe akîthomithagia andû onthe maregane na andû a Isiraeli, Watho wa Musa na hekarû îno. Na rîu ke wana nîwarete amwe a andû a ndûrîrî gûkû hekarûrî na nîmekîrîte kûndû gûkû kwamûrîrîtwe Ngai mûgiro!”

²⁹ (Ayahudi acio maaugire ûguo nîûndû nîmoonire Turefimo na Paûlo kûu Jerusalemu. Turefimo aarî wa kuuma Efeso, na Ayahudi meciragia atî nî Paûlo wamûretete kûu hekarûrî.)

³⁰ Nao andû onthe arîa maarî kûu Jerusalemu nîmaaunjugîkire, magîtitimûka mathiîte na kûrî Paûlo, makîmûnyita, na makîmûruta kûu hekarûrî mamûkururîtie. Nayo mîrango ya hekarû nîyavingirwe wa rîmwe.

³¹ Na rîrîa andû acio maageragia kûûraga Paûlo, mûnene ûmwe wa mbûtû ya athigari magana matandatû a Roma, nîwamenyithirue atî kûu Jerusalemu kuonthe kwarî na gacagaca.

³² Na vîndî wa îo mûnene ûcio wa athigari nîwocire athigari amwe na anene a athigari îgana, na makîvinyûra makîthiî varîa kîrîndî kîu Kîamgomanîte. Na rîrîa andû acio maamwonire arî na athigari nîmaatigire kûriva Paûlo.

³³ Nake mûnene ûcio wa athigari nîwathiîre varîa Paûlo aarî, akîmûnyita na akîathana akiuga Paûlo ovwe na mînyororo îîrî. Nake mûnene ûcio nîwacokire akîûria atîrî, “Mûndû ûyû nû, na ekîte atîa?”

³⁴ Nao andû amwe arîa maarî kîrîndîrî nîmaaugagîrîria ûndû ûmwe, na arîa engî makaugîrîria ûndû wîngî. Na nîûndû wa înegene rîu mûnene ûcio wa athigari ndaavota kûmenya waro maûndû marîa meekîkîte. Kwoguo nîwathire athigari ake, akîmeera mavire Paûlo kûrîa athigari meekaraga.

³⁵ Rîrîa maakinyire ngathîrî, athigari nîmaakuire Paûlo nîûndû kîrîndî nîkîamwaganîrîte mûno.

³⁶ Naguo mûkuvuvu wa andû nîwamarûmîrîrîte ûkiugagîrîria atîrî, “Nîaûragwe!”

Paûlo nîwageririe kwîyarîrîria

³⁷ Rîrîa athigari maageririe gûtonyia Paûlo kûu athigari maambîte magema, Paûlo nîwaûririe mûnene wa mbûtû ya athigari atîrî, “We nîûkûmbîtîkîria ngwîre ûndû?” Nake mûnene ûcio wa mbûtû ya athigari nîwamwîrire atîrî, “Kinthî we nîwîcî Kîngiriki?

³⁸ Nie nînîciragia atî we wî Mûmisiri ûrîa îvindarî rînini rîvîtûku ûrambîrîrie thîna ya gûtûma andû maregane na thirikari. Na kinthî we tî we ûratongoririe aûragani arîa ngiri inya mwathiî nao werûrî?”

³⁹ Nake Paûlo nîwamwîrire atîrî, “Nie nîrî Mûyahudi na naaciarîrwe Tariso vûrûrirî wa Kilikia. Nie nîrî mûndû wa kuuma îtûûrarî rîu rîa vata. Nie nîrakûthaitha ûmbîtîkîrie tu mbarîrie andû.”

⁴⁰ Mûnene ûcio wa mbûtû ya athigari nîwamwîtîkîrie, kwoguo Paûlo nîwarûngamire vau ngathîrî na akîambararia njara na kûrî andû akîmeera makire. Rîrîa maakirire, Paûlo nîwamaarîrie na Kîhibirania akîmeera atîrî: