Ciîko 20 - ÎVUKU RÎA ÛVORO MWARO

Paûlo nîwathiîre Makedonia na Akaia

¹ Na vîndî îrîa înegene rîathirire, Paûlo nîwetire arutwa vamwe. Nake arîkia kûmava ciugo cia kûmaûmîrîria, nîwamaugîre ûvoro na akîmatiga akîthiî Makedonia.

² Paûlo nîwaririe maûndû meengî ma kûmîrîria arutwa a kûndû kuonthe kûrîa ke aavîtûkîrîre akîthiî Makedonia. Nake nîwacokire akîthiî Ngiriki,

³ kûrîa ke eekarire kwa îvinda rîa mîeri îthatû. Nwatî vîndî îrîa ke evaaragîria gûtwa meri athiî Sîria, nîwamenyire atî Ayahudi amwe nîmaavangaga kûmûûraga. Kwoguo Paûlo nîwatuire acoke akîvîtûkîra Makedonia akîthiî Sîria.

⁴ Nao andû arîa maathiîcanirie nake maarî Sopateri mûrû wa Pirasi wa kuuma îtûûrarî rîa Berea; Arisitariko na Sekundu a kuuma îtûûrarî rîa Thesalonike; Gayo wa kuuma îtûûrarî rîa Deribe; Tukiko na Tirofimo a kuuma vûrûrirî wa Asia; na Timotheo.

⁵ Nao andû aya nîmaathiîre mbere yetû na magîtweterera Turoasi.

⁶ Natue nîtwatwîre meri tûkiuma Filipi vuva wa kîrugo Kîam Mîgate Îrîa îtarî mîkîre ndawa ya kwimbia. Na vuva wa mîthenya îtano nîtwamethîre Turoasi, kûrîa tue twekarire kwa îvinda rîa mîthenya mûgwanja.

Paûlo nîwathiîre Turoasi riita rîa mûthiia

⁷ Na Jumamosi kîvwaî, nîtwacemanîtie vamwe nîûndû wa ngwatanîro ya kwenyûrana mîgate. Nake Paûlo nîwarîrie andû nginya ûtukû gatagatî nîûndû nîwavangîte nîakuuma kûu mûthenya ûcio wîngî.

⁸ Nakuo nyomba ya îgûrû kûrîa tue twacemanîte, nîkwarî na taa nyîngî ciaakanaga.

⁹ Mwanake ûmwe wetagwa Eutîko nîwekarîte ndiricarî. Na wa ûrîa Paûlo aathiîcaga na mbere kwaria nwaguo Eutîko athaagîrîrua nî toro. Na mûthiiarî ke nîwanyitirwe nî toro viû na akîgwa nthî kuuma ngorovarî ya kathatû. Rîrîa maamwocire, aarî mûkuû.

¹⁰ Paûlo nîwanyûrûrûkire kûrî Eutîko, akîînamîrîria varî ke, akîmûkumbatîria na akiuga atîrî, “Tigani kûmaka! Ke arî mwoyo!”

¹¹ Nake Paûlo nîwacokire akiunûkia nyomba ya îgûrû, akîenyûra mûgate na akîrîa. Ke nîwamaarîrie gwa kavinda karaca nginya gûgîkîa na agîcoka akîmatiga.

¹² Nao nîmeenûkirie mwanake ûcio arî mwoyo, na ûndû ûcio ûgîtûma maûmîrîrie mûno.

Rûgendo rwa Paûlo rwa kuuma Turoasi kûthiî Mileto

¹³ Tue nîtwatwîre meri na tûkîthiî Asosi mbere ya Paûlo, nîûndû ke nîwatuîte athiî kuo na magûrû. Kûu Asosi nîkuo twarî tûmûkuîre na meri.

¹⁴ Na rîrîa ke aatwîthîrîrie Asosi, nîtwamûkuuire na meri na tûkîthiî îtûûrarî rîa Mitîlini.

¹⁵ Tue nîtwathiîre tûrî merirî kuuma Mitîlini na mûthenya ûcio wîngî tûgîkinya kûndû kwarî gûkuvî na gîcîgîrîra gîa Kiosi. Vuva wa mûthenya ûmwe nîtwakinyire gîcîgîrîrarî gîa Samosi, na mûthenya ûcio warûmîrîrîte tûgîkinya Mileto.

¹⁶ Paûlo nîwatuîte athiî avîtûkanîtie Efeso, nîûndû ke ndeendaga gwîkara kavinda karaca kûu vûrûrirî wa Asia. Eevîkîte ûguo nîguo kûngîvoteka akinye Jerusalemu mûthenya wa Pentekosto.

Mîario ya Paûlo akiugîra athuuri a Efeso ûvoro

¹⁷ Kuuma Mileto Paûlo nîwatûmanire Efeso akiuga atûngwe nî athuuri a kanitha.

¹⁸ Rîrîa maathiîre kûrî ke, nîwamerire atîrî, “Mue ene nîmwîcî ûrîa nie natûûraga gatagatîrî kenyu mavinda monthe, kuuma mûthenya wa mbere ûrîa nakinyire gûkû vûrûrirî wa Asia.

¹⁹ Ayahudi nîmaatûmire nthînîke mûno nîûndû wa mîvango yao mîcûku. Nwatî mue nîmwicî atî nie nînatungatagîra Mwathani nîrî na wînyivia mwîngî na mavinda meengî ngetûrûraga methori.

²⁰ Mue nîmwîcî nînaamûvunjîrie na ndiamûthithaga ûndû wana ûrîkû ûrîa ûngîamûgunire. Mue nîmwîcî nînavunjirie na ngîthomithania mbere ya andû na ngîvunjia mîciîrî yenyu.

²¹ Nie nînarutire ûira kûrî Ayahudi na andû a Ndûrîrî ngîmeera merire mevia mao, macokerere Ngai na metîkie Mwathani wetû Jesû Kristû.

²² Na rîu nie nîngûthiî Jerusalemu nîguo mbathîkîre Roho Mûtheru. Na nie ndiramenya maûndû marîa mageekîka nîrî kûu.

²³ Nie ûrîa mbîcî tu nî atî îtûûrarî wa rîonthe Roho Mûtheru nîambîraga atî kûthînua na kwovwa njeera nîkûmbetererete.

²⁴ Nwatî ndionaga mwoyo wakwa ûrî na vata wana vanini. Ûndû ûrîa ûrî na vata nî kûrîkia wîra na gûkinyîra mûthiia wa ûtungati ûrîa Mwathani Jesû aamveere ndute, naguo nî kûvecana Ûvoro Mwaro wîgiî wega wa Ngai.

²⁵ “Na rîu nie nîmbîcî atî mue muonthe arîa mvunjîrîtie ûvoro wîgiî Ûthamaki wa Ngai mûtigaacoka kûmona rîngî.

²⁶ Kwoguo ûmûnthî ûyû nie nîvîta atî mûndû wana ûmwe gatagatîrî kenyu angîkaaûra, nie ndikaûrua nthakame yake,

²⁷ nîûndû nie ndianamûthitha ûndû wana ûmwe wa marîa Ngai avangîte gwîka.

²⁸ Kwoguo îîmenyagîrîreni na mûmenyagîrîreni ndîthia îrîa Roho Mûtheru amûtuîte amenyereri a yo. Îthagîrwani mûrî arîthi a kanitha wa Ngai, ûrîa ke aatwire wake na njîra ya gîkuû Kîam Mûriû wake.

²⁹ Nie nîmbîcî atî narîkia kûthiî, andû amwe mekariî ta ciathi mbaganu nîmagaaûka na matigaacaîra ndîthia.

³⁰ Wana nginya gatagatîrî kenyu nîgûkaumîra andû amwe makaaragia maveeni makîgeria kûgucîrîria arutwa nîguo mamarûmîrîre.

³¹ Kwoguo îîmenyagîrîreni! Vîndî cionthe ririkanagani kwa îvinda rîa mîaka îthatû nie ndiatiga kûmûkaania ngîtûrûraga methori ûtukû na mûthenya.

³² “Rîu nie nîramwiga njararî cia Ngai na ûvororî wîgiî wega wake. Wega ûcio wake nwa ûvote kûmûva vinya na wavota gûtûma mûgîe na îgai rîa irathimo irîa Ngai aigîrîte andû onthe ake atheru.

³³ Nie ndianacumîkîra sîlûva, thaavu kana nguo cia mûndû wana ûrîkû.

³⁴ Mue ene nîmwîcî atî nie nîndutîte wîra na njara ino ciakwa nîguo mone indo cionthe irîa nie na arîa tûrekaranagia nao tûravataraga.

³⁵ Nie nînîmwonetie maûndûrî monthe atî wata ûrîa naarutaga wîra nîrî na kîîo kîîngî wa namue nwa nginya mwîkage guo nîguo mûtethagie andû arîa matarî na vinya. Nie nînîmwîrîte mûririkanage ciugo irîa Mwathani Jesû ke mwene aaugire atîrî, ‘Nîkwîthagîrwa kûrî na gîkeno makîria mûndû akîvecana gûkîra akîvewa.’ ”

³⁶ Na vîndî îrîa Paûlo aarîkirie kuga ûguo, ke nîwaturirie maru vamwe na andû acio onthe, na makîvoya.

³⁷ Andû onthe nîmaarîrire, makîmûmumunya na makîmugîra ûvoro.

³⁸ Nîmegwire kîeva mûno nîûndû nîwamerîte atî tî macoka kûmwona rîngî. Nao nîmaamumagaririe makîmûkinyia merirî.