Ciîko 19 - ÎVUKU RÎA ÛVORO MWARO

Paûlo arî Efeso

¹ Na vîndî îrîa Apolo aarî Korinitho, Paûlo nîwavîtûkîrîre mwena wa rûgûrû na agîkinya Efeso. Nake nîwethîre arutwa amwe kuo

² na akîmaûria atîrî, “Mue nîmwamûkîre Roho Mûtheru vîndî îrîa mwatuîkire etîkia?” Nao nîmaamûcokerie atîrî, “Tue wana tûtianegua atî kûrî Roho Mûtheru.”

³ Nake Paûlo nîwamaûririe atîrî, “Mue mwavatithirue na ûvatithio ûrîkû?” Nao nîmaamûcokerie atîrî, “Tue twavatithirue na ûvatithio ûrîa Johana aavunjirie.”

⁴ Nake Paûlo nîwaugire atîrî, “Johana aavatithagia andû arîa merirîte. Ke nîwerire andû a Isiraeli metîkie ûrîa warî aûke vuva wake, na nîke Jesû.”

⁵ Na rîrîa arutwa acio meegwire ûguo, nîmaavatithirue na rîîtwa rîa Mwathani Jesû.

⁶ Nake Paûlo nîwamaigîrîre njara na Roho Mûtheru akîmanyûrûrûkîra. Nao nîmaambîrîrie kwaria na nthiomi ng'eni na kûva andû ndûmîrîri îrîa yumîte kûrî Ngai.

⁷ Nao andû onthe arîa maarî vo maarî kîndû ta îkûmi na aîrî.

⁸ Na kwa îvinda rîa mîeri îthatû, Paûlo nîwathiîcaga îvoerorî na akavecanaga ûvoro arî na ûmîrîru. Nîwaranagîria na Ayahudi na akageragia kûmeguithia nîguo metîkîre maûndû marîa ke aaragia megiî Ûthamaki wa Ngai.

⁹ Nwatî Ayahudi amwe nîmaaûmirie ngoro ciao makîrega gwîtîkia na magîcambîrîria Njîra ya Mwathani andû onthe makîgucaga. Kwoguo Paûlo nîwamatigire, agîoca arutwa makîthiî nao nyombarî ya kûthomithîria andû ya mûndû wetagwa Tairano. Na wa mûthenya wa mûthenya Paûlo nîwaranagîria na andû kuo

¹⁰ kwa îvinda rîa mîaka îîrî. Na nîûndû wa ûguo, Ayahudi onthe na andû a ndûrîrî onthe arîa maarî kûu vûrûrirî wa Asia, nîmegwire kiugo Kîam Mwathani.

Aariû a Sikeva

¹¹ Ngai nîwaringire ciama cia mwanya mûno na njîra ya Paûlo.

¹² Andû amwe nîmoocire itambaa na nguo irîa ke aatûmîrîte na makîivira kûrî arwaru. Nao andû acio meka ûguo, arwaru nîmaavonire na maroho macûku makîrutûrûrwa kuuma kûrî o.

¹³ Nao Ayahudi amwe nîmaaûrûraga na makarutûrûraga maroho macûku kuuma kûrî andû. Ayahudi acio wa nao nîmaageririe gûtûmîra rîîtwa rîa Mwathani Jesû kûrutûrûra maroho macûku kuuma kûrî andû. Nao nîmeraga maroho macûku atîrî, “Na rîîtwa rîa Jesû ûrîa Paûlo avunjagia, nie nîrakwatha ume ndaarî ya mûndû ûyû!”

¹⁴ Ariû mûgwanja a Sikeva nî meekaga guo. Sikeva aarî Mûyahudi warî Mûthînjîri-Ngai ûrîa mûnene.

¹⁵ Naguo roho mûcûku nîwamerire atîrî, “Nie nîmbîcî Jesû, na nîmbîcî ûvoro wîgiî Paûlo; nwatî mue mûrî a?”

¹⁶ Nake mûndû ûcio warî na roho mûcûku nîwamatharîkîre na vinya mûno. Na nîûndû mûndû ûcio nîwakîririe Ayahudi acio onthe vinya, nîmaaumire kûu nyomba na makîvinyûra maûrîte marî njaga na mativangîtue.

¹⁷ Nao Ayahudi onthe na andû a ndûrîrî onthe arîa maatûûraga kûu Efeso nîmegwire ûvoro ûcio, magîcûrwa nî guoya na magîkumia rîîtwa rîa Mwathani Jesû.

¹⁸ Andû eengî etîkia nîmaambîrîrie kumbûra cararûkû maûndû macûku marîa o meekîte.

¹⁹ Amwe gatagatîrî ka andû arîa maarutaga wîra wa kûragûranîra nîmaaûnganirie mavuku mao ma ûragûranîri na makîmavîvia andû onthe makîonaga. Mavuku mau maarî na thogora wa sîlûva ngiri mîrongo îtano.

²⁰ Na nîûndû wa maûndû mau ma vinya meekîkîte, andû eengî nîmegwire kiugo Kîam Mwathani na magîtîkia.

Gacagaca îrîa yarî Efeso

²¹ Na rîrîa maûndû mau maarîkirie gwîkîka, Paûlo atongoretue nî Roho nîwatwire îtua atî ke nîakûthiî Jerusalemu avîtûkanîrîrîtie Makedonia na Akaia. Nake nîwaugire atîrî, “Nie narîkia kûthiî Jerusalemu, nîngûcoka kûthiî gûcera Roma.”

²² Paûlo nîwatûmire Timotheo na Erasito, atethia ake aîrî, akîmeera mathiî Makedonia, nwatî ke mwene nîwekarire kûu Asia kwa îvinda.

²³ Na îvindarî rîu kûu Efeso nîkwagîre na mathîna meengî mûno nîûndû wa Njîra ya Mwathani.

²⁴ Mûndû ûmwe warî mûturi wa indo cia sîlûva, wetagwa Demetirio nîwandîkîte andû eengî nîguo maturage mîvuanano ya sîlûva yonekanaga îkariî ta ngai ya mûndûmûka îrîa yetagwa Aritemi. Nao aturi acio nîmaagîcaga na umithio mûnene mûno kuumana na wîra ûcio.

²⁵ Nake Demetirio nîwetire aturi acio ake, makîgomana vamwe na arîa engî maarutaga wîra wata ûcio wao na akîmeera atîrî, “Andû aya, mue nîmwîcî atî ûtonga wetû umanaga na wîra ûyû.

²⁶ Rîu mue nîmûreyonera na mûkeîguîra maûndû marîa Paûlo areka. Ke augaga atî ngai cia mîvuanano irîa ithondeketwe na njara cia andû tî ngai cia ma. Ke nîarîkîtie kwîgwithia na akagarûra andû eengî arîa marî gûkû Efeso na arîa marî Asia vakuvî yonthe.

²⁷ Kûronekana kûrî na ûgwati. Wîra ûyû wetû nîûkûgîa na îgweta rîcûku. Na twa ûguo wonga, andû nîmakwambîrîria gwîciiria atî hekarû ya ngai îo ya Aritemi ndîrî na vata. Ûnene wa ngai îo nîûgûcûkangua. Aritemi nîyo ngai ya mûndûmûka îrîa îgoocagwa nî andû onthe arîa marî Asia na marî kûndû kuonthe kwa nthî!”

²⁸ Na rîrîa andû acio meegwire ûguo, nîmaarakarire mûno na makîambîrîria kugîrîria atîrî, “Aritemi, ya andû a Efeso nî nene!”

²⁹ Kwoguo kûu îtûûrarî rîu rîonthe nîgwecûrire înegene. Nakîo kîrîndî nîkîanyitire Gaio na Arisitariko, andû aîrî a kuuma Makedonia arîa maathiîcanagia na Paûlo, na makîvinyûra nao nyombarî ya kwonanîrua mîthako.

³⁰ Paûlo nîwendaga kuumîra mbere ya kîrîndî nîguo akîarîrie, nwatî etîkia matiamwîtîkîria.

³¹ Wana nginya atongoria amwe a kuuma Asia arîa maarî arata a Paûlo, nîmaatûmanire ndûmîrîri kûrî ke makîmûthaitha ndagetîkîre kûthiî nyombarî îo ya kwonanîrua mîthako.

³² Andû amwe maaugagîrîria ûndû ûmwe, na amwe makaugagîrîria ûndû wîngî. Kûu mûcemaniorî ûcio nîkwagîre na kîvîngîcano kînene mûno na andû eengî gatagatîrî ka arîa maarî kuo matiamenya kîrîa gîatûmîte magomane vamwe.

³³ Nao Ayahudi amwe nîmaarûngamirie Alekisanda mbere ya andû na makîmwîra ûrîa agwîka. Nake Alekisanda nîwambararirie njara na kûrî andû akîmaveneria makire nîguo eyarîrîrie.

³⁴ Nwatî vîndî îrîa o maamenyire atî Alekisanda aarî Mûyahudi, onthe marî vamwe nîmaaugîrîrie ûndû ûmwe kwa îvinda rîa mathaa maîrî makiugaga atîrî: “Aritemi ngai ya mûndûmûka ya andû a Efeso nî nene!”

³⁵ Na mûthiiarî karani wa îtûûra rîu nîwavotire gûkiria andû. Nake nîwaugire atîrî, “Mue andû aya a Efeso! Nîkûrî mûndû wana ûmwe ûtethagîrwa aicî atî îtûûra rîa Efeso nîkuo kwîthagîrwa kwigîtwe hekarû ya Aritemi, ngai ya mûndûmûka îrîa nene na gûkaigwa îthiga rîa ngai îo rîrîa rîtheru na rîagwîre kuuma îgûrû?

³⁶ Na nîûndû gûtirî mûndû wana ûmwe ûngîvota kuga atî ûndû ûyû tî wa ma, mue mwagîrîrwe nî kûvoorera na mûtigeeke ûndû wana ûrîkû mûtagwîciria.

³⁷ Mue nîmue mûretete andû aya gûkû, nwatî o matirumîte ngai yetû ya mûndûmûka wana kana makaîa kîndû wana kîrîkû kuuma hekarûrî ciake.

³⁸ Ethîrwa Demetirio na aturi acio ake nîmarî na ûndû mangîthitanga mûndû wana ûmwe naguo, tue tûrî na acirithania na mîthenya îrîa îtuîtwe ya kûthitangana magootirî. Tiga o mathiî makathitanganîre kuo.

³⁹ Nwatî ethîrwa mue mûrî na ûndû wîngî mûrenda kwarîrîria, ûndû ûcio nîûgaatuwa mûcemaniorî ûrîa tûthiîcaga wa andû a îtûûra.

⁴⁰ Nîûndû wa maûndû marîa mekîka ûmûnthî, kûrî na ûgwati na nwa tûthitangwe nîûndû wa gûtûma kûgîe na gacagaca. Tue tûtingîvota kûvecana gîtûmi Kîam înegene rîîrî, na tûtirî na ûndû mwaro tûngîvecana nîûndû wa rîo.”

⁴¹ Nake karani wa îtûûra arîkia kuga maûndû mama, nîwerire andû mathiî.