Ciîko 17 - ÎVUKU RÎA ÛVORO MWARO

Paûlo na Sailasi marî Thesalonike

¹ Nao Paûlo na Sailasi nîmaavîtîkîrîre Amufipolisi na Apolonia na magîkinya Thesalonike kûrîa kwarî na îvoero rîa Ayahudi.

² Nake Paûlo nîwathiîre îvoerorî wata ûrîa aamenyerete gwîka. Na kwa îvinda rîa ciumia ithatû, nîwaranîrie na Ayahudi ûvoro wîgiî mandîko matheru.

³ Nîwamataarîrie mandîko na kuuma kûrî mo akîmonia na ma atî nîkwarî na wagîrîru wa Mesaya athînue na acoke ariûke. Nake Paûlo nîwamerire atîrî, “Jesû ûcio nie nîramwîra ûvoro wake, nîke Mesaya.”

⁴ Nao Ayahudi amwe, aka arîa maarî îgweta na gîkundi kînene Kîam Angiriki maagoocaga Ngai, nîmeetîkirie na makînyitanîra na Paûlo na Sailasi.

⁵ Nwatî Ayahudi amwe nîmegwire wîru, makîrete vamwe andû aganu arîa maaûrûraga thokorî, na makîthondeka gîkundi. Nao nîmaambîrîrie gacagaca kûu îtûûrarî rîu rîonthe na makîtharîkîra nyomba ya mûndû ûmwe wetagwa Jasoni. Andû acio maacaragia Paûlo na Sailasi, nîguo mamavire nja kûrî andû.

⁶ Nwatî rîrîa maaregire kûmona, nîmaakururirie Jasoni na etîkia amwe makîmavira mbere ya athani a îtûûra na makiugîrîria atîrî, “Andû aya nîmatûmîte kûgîe na thîna kûndû kuonthe! Na rîu nîmaûka îtûûrarî rîetû,

⁷ na Jasoni amaigîte gwake nyomba. Nao onthe nîmarauna mawatho ma mûthamaki wa Roma, makiugaga atî nîkûrî na mûthamaki wîngî wîtagwa Jesû.”

⁸ Na rîrîa andû na athani a îtûûra rîu meegwire ûndû ûcio, nîmaagîre na gacagaca.

⁹ Nao athani acio nîmaaugire Jasoni na andû acio engî mambe marîve mbeca irîa ciendekaga mbere ya kûrekererua. Nao nîmaacokire magîtîkîria etîkia acio mathiî.

Paûlo na Sailasi marî Berea

¹⁰ Na gwatuka wa rîo, etîkia nîmaatûmire Paûlo na Sailasi mathiî Berea Na rîrîa maakinyire nîmaatonyire îvoerorî.

¹¹ Ayahudi arîa maarî Berea nîmeendaga kûmenya maûndû gûkîra arîa maarî Thesalonike. Nao nîmaathikîrîrie ndûmîrîri îo marî na wendi mwîngî, na wa mûthenya wa mûthenya nîmaatuîragia Mandîkorî Matheru nîguo mone kana maûndû marîa Paûlo aaragia maarî ma ma.

¹² Eengî ao nîmeetîkirie. Aka maarî îgweta na athuuri eengî Angiriki, nîmeetîkirie.

¹³ Nwatî Ayahudi arîa maarî Thesalonike nîmaamenyire atî Paûlo nîwavunjagia kiugo Kîam Ngai wana Berea. Na kwoguo nîmaathiîre kuo, makiunjuga kîrîndî na gûkîgîa gacagaca.

¹⁴ Na wa rîo, etîkia nîmaatûmire Paûlo athiî rûtererî rwa îria, nwatî Sailasi na Timotheo nîmeekarire kûu Berea.

¹⁵ Na andû arîa maaumagaririe Paûlo nîmaamûkinyirie Athene. Mbere ya andû acio macoke Berea nîmaathirwe nî Paûlo makeere Sailasi na Timotheo mathiî kûrî ke narua wata ûrîa mangîvota.

Paûlo arî Athene

¹⁶ Na rîrîa Paûlo eetererete Sailasi na Timotheo kûu Athene, nîwarakarire mûno nîûndû wa kwona ûrîa îtûûra rîu rîecûrîte mîvuanano.

¹⁷ Kwoguo arî îvoerorî nîwaranîrie na Ayahudi na andû a ndûrîrî arîa meetîkîtie Ngai mûno. Na wa mûthenya wa mûthenya ke nîwaranagîria na andû arîa methagîrwa marî kûu thokorî.

¹⁸ Nao arimû amwe arîa meendete mûno ûûgî wa Epikurio na Sitoiki wa nao nîmaakararanirie nake. Amwe gatagatîrî kao nîmaaûririe atîrî, “Mûvûmbûtîki ûyû arageria kuga atîa?” Nao engî gatagatîrî kao nîmaaugire atîrî, “Ke aronekana takwa arî mûvunjia wa ngai ng'eni.” O maaugire ûguo nîûndû Paûlo nîwavunjagia ûvoro wîgiî Jesû na wîgiî kûriûka.

¹⁹ Kwoguo nîmoocire Paûlo, makîmûvira Kîammarî Kîam Areopago makîmwîra atîrî, “Wenda tu tûtaarîrie ûvoro wîgiî kîthomo kîu gîcerû we ûrathomithania.

²⁰ Maûndû mamwe tue tûregua ûkîaria, tûtianamegua rîngî na kwoguo tue nîtûrenda kûmenya ûrîa maûndû mau maugîte.”

²¹ (Andû onthe a Athene na arîa engî maatûûraga kuo maumîte mavûrûrirî mageni nîmeendete mûno gûtûmîra mavinda mao monthe kûvecana na kûthikîrîria ûndû wa wonthe mûgeni.)

²² Kwoguo Paûlo nîwarûngamire mbere ya Kîamma kîrîa gîacemanîtie kîrîmarî Kîam Areopago na akiuga atîrî, “Mue andû a Athene, nie nînîrona atî mue mûrî arûmîrîri a ndini mûno maûndûrî monthe.

²³ Vîndî îrîa nie nîracerangaga îtûûrarî rîîrî rîenyu na ngîroria kûrîa mue mûgoocagîra, nînîrethîre metha ya kûrutîra kîgongoona yandîkîtwe atîrî, ‘Kûrî Ngai ûrîa Ûtaicîkene’. Na kwoguo, ngai ûcio mue mûgoocaga wana mûtamwicî, nîke Ngai ûrîa nie nîravunjia ûvoro wake kûrî mue.

²⁴ Ngai ûrîa waûmbire nthî na indo cionthe irîa irî kuo, nî Mwathani wa îgûrû na nthî, na ndatûûraga hekarûrî îrîa ithondeketwe nî andû.

²⁵ Ke mwene nîke ûvecanaga mwoyo, mîvevû na indo cionthe irîa andû mavataraga. Ke ndethagîrwa akîvatara ûtethio wana ûrîkû kuuma kûrî o, nîûndû ethagîrwa arî na indo cionthe irîa avataraga.

²⁶ Ngai aambîrîrie na kûmba mûndû ûmwe, na kuuma kûrî mûndû ûcio gûgîûka ndûrîrî cionthe cia andû ngûrani arîa matûûraga kûndû kuonthe gûkû nthî. Ngai nîke watwire wa mbererî nîrî, na nîkû o magîrîrwe nî gûtûûra.

²⁷ Ngai aamaûmbire nîguo mamûcaragie wana ethîrwa nî na njîra ya kûvutavutia kuonthe makîmûcaria nîmakûmwona. Nwatî Ngai ndarî varaca mûno na mûndû wana ûmwe wa cietû;

²⁸ wata ûrîa mûndû ûmwe augîte atîrî, ‘Ke nîke ûtûmaga tûtûûre, tûvote kûthiî na twîthîrwe tûrî kîrîa tûrî.’ Andîki amwe enyu nîmaugîte atîrî, ‘Wa natue na tûrî ciana ciake.’

²⁹ Na nîûndû tue tûrî ciana cia Ngai, tûtiagîrîrwe nîgwîciria atî Ngai nî kîndû andû meciragîria kana mathondekaga kuumana na thaavu, sîlûva kana îthiga.

³⁰ Ngai nîatuîte atî ke ndagûtara mavinda marîa andû mataamwicî. Nwatî rîu ke nîwathaga andû onthe arîa marî kûndû kuonthe merire,

³¹ nîûndû nîatuîte mûthenya ûrîa agaatuîra andû onthe a nthî arî na kîvooto. Ke ageeka ûguo na njîra ya mûndû ûrîa athuurîte, na nîwonetie andû onthe atî ûvoro ûcio nî wa ma na njîra ya kûriûkia mûndû ûcio!”

³² Na rîrîa andû meegwire Paûlo akîaria ûvoro wîgiî kûriûka, amwe gatagatîrî kao nîmaamûnyûrûririe, nwatî arîa engî makîmwîra atîrî, “Tue nîtûrenda gûkeegua ûkîaria ûvoro wîgiî ûndû ûcio rîngî.”

³³ Kwoguo Paûlo nîwaumire mûcemaniorî ûcio.

³⁴ Nwatî andû amwe nîmaatuîkire etîkia na makîmûnyita mbaru. Gatagatîrî kao kwarî Dionisio ûrîa warî ûmwe wa athuuri a Kîamma Kîam Areopago na mûka wetagwa Damari wa vamwe na andû engî.