Ciîko 16 - ÎVUKU RÎA ÛVORO MWARO

Timotheo nîwathiîcanirie na Paûlo na Sailasi

¹ Nake Paûlo nîwathiîre Deribe na agîcoka akîthiî Listra, kûrîa Mûkristiano ûmwe wetagwa Timotheo aatûûraga. Ng'ina, ûrîa wa nake warî Mûkristiano, aarî Mûyahudi, nwatî îthe aarî Mûngiriki.

² Nao etîkia arîa maarî Listra na Ikonia nîmaaragia waro wa Timotheo.

³ Paûlo nîwendaga mathiîcanie na Timotheo na kwoguo nîwamûrwithirie. Ke eekire ûguo nîûndû Ayahudi onthe arîa maatûûraga kûu nîmaaicî atî îthe wa Timotheo aarî Mûngiriki.

⁴ Paûlo na arîa maarî nake nîmaavîtîkîrîre matûûrarî magîkinyagîria etîkia matua marîa maathondeketwe nî atûmwa na athuuri arîa maarî Jerusalemu, na makîmeeraga mamavingagie.

⁵ Kwoguo makanitha nîmeekîrirwe vinya wîtîkiorî na nîmongererekaga wa mûthenya wa mûthenya.

Paûlo nîwagîre na kîoneki arî Toroasi

⁶ Nake Paûlo na andû arîa maathiîcanîtie nake nîmaavîtûkîrîre mavûrûrirî ma Furîgia na Galatia nîûndû Roho Mûtheru nîwamagiririe matikavunjie Ûvoro Mwaro kûu vûrûrirî wa Asia.

⁷ Na rîrîa maakinyire mûvakarî wa vûrûri wa Mîsia nîmaageririe gûtonya vûrûrirî wa Bithînia, nwatî Roho wa Jesû ndaametîkîria.

⁸ Kwoguo nîmaavîtûkîrîre Mîsia na makînyûrûrûka nginya Toroasi.

⁹ Na ûtukû ûcio, Paûlo nîwagîre na kîoneki na akîona mûndû wa kuuma Makedonia. Nake mûndû ûcio nîwarûngamire na akîmûthaitha akîmwîraga atîrî, “Ûka Makedonia ûgatûtethie!”

¹⁰ Na rîrîa Paûlo aarîkirie kûgîa na kîoneki kîu, tue nîtwevarîrie wa rîo kûthiî Makedonia, nîûndû nîtwatwire ciira atî Ngai nîwatwîtîte tûvunjîrie andû arîa maarî kûu Ûvoro Mwaro.

Lîdia nîwagarûrûkire arî Filipi

¹¹ Tue nîtwatwîre meri tûkiuma Toroasi na tûkîringa tûrûngîrîrîtie tûgîkinya Somothirake. Naguo mûthenya ûcio wîngî tûkîthiî Neapoli.

¹² Twauma kûu nîtwathiîre tûrî nthî nyûmû tûgîkinya Filipi, îtûûra rîrîa rîathagwa nî Aaroma na rîarî rînene kûu vûrûrirî wa Makedonia. Natue nîtwekarire kûu kwa îvinda rîa mîthenya mîîngî.

¹³ Naguo mûthenya wa thavatû nîtwaumire nja ya mwîrîga wa îtûûra rîu na tûkîthiî vakuvî na rûnjî, varîa tweciragia atî nîvo Ayahudi maavoyagîra. Aka amwe nîmaagomanîte vo, na kwoguo nîtwekarire nthî na tûkîmarîria.

¹⁴ Nake ûmwe wa arîa maatûthikîrîrie aarî mûndûmûka wetagwa Lîdia, warî wa kuuma îtûûrarî rîa Thîatira na warî mwendia wa nguo ciarî na rangi ya njambarawe. Ke aarî mûgooci Ngai, na Mwathani nîwavingûrire ngoro yake agîtûma îgue îkîenda kûthikîrîria maûndû marîa Paûlo aaragia.

¹⁵ Ke na andû onthe a mûciî wake nîmaavatithirue. Nîwacokire agîtûthaitha agîtwîra atîrî, “Ethîrwa mue nîmwatua atî nie na ma nîmbîtîkîtie Mwathani, ûkani vi mûgekare gwakwa mûciî.” Nake nîwageririe mûno gûtwîgwithia atî tûthiî tûgekaranie nake.

Paûlo na Sailasi nîmaaikirue njeera îtûûrarî rîa Filipi

¹⁶ Na vîndî îmwe rîrîa twathiîte vandû va kûvoera, nîtwatûngirwe nî mwîrîtu ûmwe ngombo, warî na ngoma yamûvotithagia gwîciirîria maûndû marîa maarî mekîke. Mwîrîtu ûcio nîwatûmaga ene ke moone mbeca nyîngî mûno na njîra ya gwîciirîria kûu gwake kwa maûndû marîa maarî mekîke.

¹⁷ Mwîrîtu ûcio nîwarûmîrîrie Paûlo vamwe wa natue akiugagîrîria atîrî, “Andû aya nî ndungata cia Ngai Ûrîa Ûrî Îgûrû Mûno! O nîmaranîrîra ûrîa mûngîvonoka!”

¹⁸ Mwîrîtu ûcio nîwekire ûguo kwa îvinda rîa mîthenya mîîngî. Ûndû ûcio nîwatûmire Paûlo arakare mûno, nginya akîvûgûka na akîîra ngoma îo atîrî, “Nie nîrakwatha na rîîtwa rîa Jesû Kristû ume ndaarî yake!” Na kavinda wa kau ngoma îo nîyaumire ndaarî yake.

¹⁹ Nwatî vîndî îrîa ene mwîrîtu ûcio maamenyire atî mwîrîgîrîro wao wa kûgîa na umithio nîwathira, nîmaanyitire Paûlo na Sailasi na makîmakururia makîmavira kûrî anene thokorî.

²⁰ Nao nîmaamaretire kûrî acirithania na makiuga atîrî, “Andû aya nî Ayahudi, na nîmaratûma kûgîe na mathîna gûkû îtûûrarî rîîrî rîetû.

²¹ O nîmarathomithania mîtugo îreganîte na watho wetû. Tue tûrî Aaroma na tûtingîtîkîra mîtugo îno wana kana tûmîrûmîrîre.”

²² Kîrîndî wa nakîo nîkîatharîkîre Paûlo na Sailasi. Nao acirithania acio nîmaatembûrangire nguo irîa Paûlo na Sailasi meekîrîte mîîrîrî yao na makîathana marivwe na ivoko.

²³ Na rîrîa maarîkirie kûrivwa mûno, nîmaavingîrwe njeera na mûrangîri wa njeera akîathwa amarangîre waro matigatoroke.

²⁴ Na rîrîa mûrangîri ûcio wa njeera aamûkîîre watho ûcio, nîwamavingîre njeera ndaarî kûraca na akîoverera magûrû mao iting'ûûrî.

²⁵ Na vakuvî ûtukû gatagatî Paûlo na Sailasi nîmaavoyaga makinagîra Ngai nyîmbo cia kûmûkumia. Nao andû acio engî moovetwe nîmaamathikîrîrîtie.

²⁶ Na wa rîmwe nîkwagîre na kîthingithia kînene, na gîkinainia mîcingi ya njeera. Na vîndî wa îo mîrango yonthe ya njeera nîyavingûkire, na mînyororo yonthe ya andû arîa moovetwe îkîovoka.

²⁷ Na rîrîa mûrangîri ûcio wa njeera aaramûkire na akîona atî mîrango ya njeera îo yarî mîvingûku, nîweciririe atî andû acio moovetwe nîmaatorokete. Na kwoguo ke nîwacomorire rûviû rwake rwa njûra nîguo eyûrage.

²⁸ Nwatî Paûlo nîwaugîrîrie na mûgambo mûnene akiuga atîrî, “We tiga gwîîka naaî! Tue tuonthe tûrî kuo!”

²⁹ Nake mûrangîri ûcio wa njeera nîwetirie taa, agîtonya ndaarî avinyûrîte, na akinainaga nî guoya, nîwegwîthirie magûrûrî ma Paûlo na Sailasi.

³⁰ Nake nîwamarutire nja na akîmaûria atîrî, “Athuuri aya, nie mbagîrîrwe nî gwîka atîa nîguo mvonoke?”

³¹ Nao nîmaamûcokerie atîrî, “Îtîkia Mwathani Jesû, na nîûkûvonoka, we na andû onthe a mûciî waku.”

³² Kwoguo Paûlo na Sailasi nîmaavunjirie Kiugo Kîam Mwathani kûrî mûrangîri ûcio wa njeera na kûrî andû onthe arîa maarî kûu mûciî gwake.

³³ Na îthaa wa rîu rîa ûtukû ûcio mûrangîri ûcio wa njeera nîwocire Paûlo na Sailasi na akîmathambia ironda ciao. Na vîndî wa îo, ke na andû onthe a mûciî wake nîmaavatithirue.

³⁴ Na vuva wa ûguo mûrangîri ûcio wa njeera nîwavirire Paûlo na Sailasi gwake mûciî, na akîmava irio. Nake mûrangîri wa njeera vamwe na andû ake nîmecûrirwe nî gîkeno nîûndû o nîmeetîkîtie Ngai.

³⁵ Na kîraûko Kîam mûthenya ûcio wîngî acirithania nîmaatûmire athigari mathiî makeere mûrangîri wa njeera atîrî, “Tiga andû acio mathiî.”

³⁶ Kwoguo mûrangîri wa njeera nîwerire Paûlo atîrî, “Acirithania maathana mauga nîmûrekererie. Umani rîu na mûthiî mûrî na thayû.”

³⁷ Nwatî Paûlo nîwerire athigari acio atîrî, “O maratûrivire na ivoko andû onthe maroretie, na tûtatuîrîrîtwe atî nîtwîkîte naaî, na tue tûrî Aaroma! O nîmaracokire matuikia njeera, na rîu marenda gûtûrekereria na nthitho. Ûguo tîkûvoteka! Tiga maûke marî o matûrekererie.”

³⁸ Nao athigari nîmaavecanire ûvoro ûcio kûrî acirithania. Na rîrîa meegwire atî Paûlo na Sailasi maarî Aaroma, nîmaagîrwe nî guoya.

³⁹ Kwoguo nîmaathiîre kûrî Paûlo na Sailasi na makîmavoya ûkirîrîria. Nîmaacokire makîmaruta kûu njeera na makîmeera maume kûu îtûûrarî rîu.

⁴⁰ Nao Paûlo na Sailasi nîmaaumire kûu njeera na makîthiî nyomba kwa Lîdia, kûrîa methîîre etîkia na makîmava ciugo cia kûmaûmîrîria. Nao nîmaacokire makîthiî.