Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Ciîko 15 - ÎVUKU RÎA ÛVORO MWARO


Mûcemanio ûrîa warî Jerusalemu

1 Nao andû amwe nîmaanyûrûrûkire Antiokia maumîte Judea na makîambîrîria kûthomithia etîkia makîmeeraga atîrî, “Mue mûtingîvonoka ethîrwa tî mûrua wata ûrîa Watho wa Musa ugîte.”

2 Nao Paûlo na Baranaba nîmaakararanirie mûno na andû acio, na îgûrû rîgiî ûvoro ûcio. Kwoguo nîgwatuîkire atî Paûlo na Baranaba na etîkia amwe a Antiokia, nwa nginya matûmwe Jerusalemu nîguo mathiî maranîrie na atûmwa na athuuri îgûrû rîa ûvoro ûcio.

3 Kwoguo kanitha nîyamaugîre ûvoro, nao makîvîtûkîrîra mavûrûrirî ma Foenike na Samaria makîvecaga andû ûvoro wîgiî ûrîa andû a ndûrîrî maagarûrûkîte. Naguo ûvoro ûcio nîwatûmire etîkia onthe makene mûno.

4 Na rîrîa maakinyire Jerusalemu, nîmaagwatirwe ûgeni nî kanitha, atûmwa na athuuri. Nao Paûlo, Baranaba na andû acio engî nîmaavecanire ûvoro wîgiî maûndû monthe marîa Ngai eekîte kûvîtûkîra kûrî o.

5 Nwatî etîkia amwe arîa maarî a gîkundi Kîam Afarisai, nîmaarûngamire na makiuga atîrî, “Andû a ndûrîrî nwa nginya marwithue na meerwe mathîkîre Watho wa Musa.”

6 Nao atûmwa na athuuri nîmaagomanire vamwe nîguo marîrîrie ûndû ûcio.

7 Na Vuva wa kwarîrîria ûndû ûcio kwa îvinda îraca, Petero nîwamerire atîrî, “Ariû na aarî a îthe wetû, mue nîmwîcî atî vingo ya tene Ngai nîwanthuurire kuuma gatagatîrî kenyu, nîguo mvunjie Ûvoro Mwaro kûrî andû a ndûrîrî. Nao nîmegwire Ûvoro Mwaro kuuma kûrî nie na magîtîkia.

8 Nake Ngai ûrîa ûmenyaga meciria ma andû onthe, nîwametîkîre. Ke nîwonanirie ûndû ûcio na njîra ya kûmava Roho Mûtheru wata ûrîa eekîte kûrî tue.

9 Ngai nîwonanirie atî gûtirî ngûrani gatagatîrî getû nao. Ke nîwamovere mevia mao nîûndû nîmeetîkirie.

10 Kwoguo rîu mue nîndûî kîratûma mûgerie Ngai? Mue mûreka ûguo na njîra ya kwigîrîrwa etîkia mîrigo mîrito îrîa tue wana kana methe metû ma tene matangîavotire gûkuua.

11 Nwatî nîtwîtîkîtie atî tue wana o nîtûkaavonokua na njîra ya wega wa Mwathani Jesû.”

12 Nao andû acio onthe maarî mûcemaniorî ûcio nîmaakirire kivi na makîthikîrîria Paûlo na Baranaba makîvecana ûvoro wîgiî ciama cionthe na morirû marîa Ngai eekîte kûvîtûkîra kûrî o gatagatîrî ka andû a ndûrîrî.

13 Na rîrîa o maarîkirie kwaria, Jakuvu nîwaugire atîrî: “Tanthikîrîriani mue aariû-na-aarî-a-Îthe-wetû!

14 Simioni nîwatwîra ûrîa Ngai mbere onanirie ûmenyereri wake kûrî andû a ndûrîrî. Ke eekire ûguo na njîra ya gwîta andû amwe kuuma gatagatîrî kao nîguo matuîke ake.

15 Wana nginya ciugo irîa ciarirue nî arathi nîciîtîkanîtie viû na ûvoro ûcio. Wa ta ûrîa mandîko matheru maugîte atîrî:

16 ‘Vuva wa maûndû mama nie nîngaacoka, na ndume rîngî gîîkaro kîrîa kîgwîte Kîam Daudi. Nie nîgwoca ngooca matigari ma gîîkaro kîu, nîgîtume na nîkîrûngamie rîngî.

17 Kwoguo andû arîa engî onthe nîmakaanjaria wana andû a ndûrîrî onthe, arîa nie mbîtîte matuîke akwa.

18 Ûguo nîguo Mwathani augîte. Ke nîke watûmire maûndû mau mamenyeke kuuma tene.’

19 “Kwoguo woni wakwa nî atî tue tûtiagîrîrwe nî kûthînia andû a ndûrîrî arîa maragarûrûkîra Ngai.

20 Vandû va ûguo, tue nîtwagîrîrwe nî kwandîka maarûa kûrî o tûmere maûndû mama. Matikarîcage irio irîa irî na mûgiro nîûndû nîciîthagîrwa itegeretwe mîvuanano: matigekage ciîko cia ûmaraa: matikarîcage nyama cia nyamû irîa ciîthagîrwa ithioretwe ngingo itagwîtûrûra nthakame; na matikaarîcage nthakame.

21 O matiagîrîrwe nî gwîka maûndû mama nîûndû Watho wa Musa nîwîthîrîtwe ûkîthomithanua matûûrarî monthe kwa îvinda îraca. Watho ûcio nwa ûthomagwa mavoerorî mûthenya wa wonthe wa thavatû.”


Maarûa kûrî andû a ndûrîrî arîa metîkîtie

22 Kwoguo atûmwa, athuuri, na kanitha yonthe îrî vamwe, nîyatwire atî nîmakûthuura andû kuuma gatagatîrî kao nîguo mamatûme Antiokia marî na Paûlo na Baranaba. Nîmaathuurire andû aîrî arîa maatîîtwe mûno nî etîkia. Nao andû acio maarî Judasi ûrîa wetagwa Barasaba na Sailasi,

23 na makîmatûma, na maarûa îrîa yandîkîtwe atîrî: “Tue atûmwa na athuuri, ariû na aarî a îthe wetû nîtwamûkethia mue ariû na aarî a îthe wetû andû a ndûrîrî arîa mûrî Antiokia, Sîria na Cilicia.

24 Tue nîtwîguîte atî andû amwe arîa maaumire gîkundirî gîetû nîmaûkîte kûrî mue na makamwîra maûndû ma kûmûthînia na kûmûrakaria mûno. Nwatî tue tîtue twamataarîte meke ûguo.

25 Kwoguo tue tuonthe nîtwatûngana na twetîkania atî nîkwa tûkûthuura anjaama na tûmatûme maûke kûrî mue. O nîmaûkania na arata etû ende Baranaba na Paûlo,

26 arîa mevecanîte viû wana nginya makevaarîria kûûragwa nîguo matungatîre Mwathani wetû Jesû Kristû.

27 Kwoguo nîtwamûtûmîra Judasi na Sailasi, arîa makamwîra na tûnyua twao maûndû mama twamwandîkîra.

28 Tue vamwe na Roho Mûtheru nîtwonete atî tî waro tûmwigîrîre mîrigo îngî îkîrîte maûndû marîa marî na vata.

29 Mue mûtiagîrîrwe nî kûrîa irio wa cionthe irîa itegeretwe mîvuanano; mûtiagîrîrwe nî kûrîa nthakame; wana kana nyama cia nyamû irîa ciîthagîrwa ithioretwe ngingo ikaûragwa itagwîtûrûra nthakame; mûtiagîrîrwe nî kûvûûra ûmaraa. Mue mûgeeka waro ethîrwa mûkathengutagîra maûndû mama. Tigwani na waro.”

30 Kwoguo anjaama acio nîmaaugîrwe ûvoro na makînyûrûrûka Antiokia kûrîa maacokanîrîrie gîkundi kîonthe Kîam etîkia vamwe, na makîmava maarûa îo.

31 Na rîrîa andû acio maamîthomire, nîmecûrirwe nî gîkeno, nîûndû wa ndûmîrîri îo ya kûmaûmîrîria.

32 Nao Judasi na Sailasi, arîa maarî arathi, nîmaaririe maûndû meengî ma kûmîrîria etîkia na kûmekîra vinya.

33 Na vuva wa gwîkara kuo kwa îvinda, Judasi na Sailasi nîmaaugîrwe ûvoro nî etîkia magîcoka kûrî arîa maamatûmîte. [

34 Nwatî Sailasi nîwatwire ekare kûu.]

35 Nwatî Paûlo na Baranaba nîmeekarire kwa îvinda kûu Antiokia, na marî vamwe na andû engî eengî nîmaathomithanirie na makîvunjia kiugo Kîam Mwathani.


Paûlo na Baranaba nîmaatiganire

36 Na vuva wa îvinda, Paûlo nîwerire Baranaba atîrî, “Tiga tûcoke matûûrarî monthe marîa marî kûrîa twavunjirie kiugo Kîam Mwathani, tûthiî tûkone etîkia tûkîmenyaga ûrîa marathiî na mbere.”

37 Nake Baranaba nîwendaga mathiîcanie na Johana ûrîa wetagwa Maariko.

38 Nwatî Paûlo eeciragia tî waro mathiîcanie nake, nîûndû Maariko nîwaregete kûrutithania wîra nao na akîmatiga Pamufilia.

39 Nake Paûlo na Baranaba nîmaakararanirie na vinya mûno magîtigana Baranaba nîwocire Maariko na makîthiî na meri kinya Kuporo.

40 Nake Paûlo nîwathuurire Sailasi nîguo mathiîcanie nake. Nao etîkia nîmaaigire Paûlo na Sailasi wegarî wa Mwathani.

41 Nake Paûlo nîwavîtûkîrîre Sîria na Cilicia agîkagîra makanitha vinya.

©Bible Society of Kenya, 2019

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ