Ayubu 9 - ÎVUKU RÎA ÛVORO MWARO

¹ Ayubu nîwacokerie Ngai atîrî,

² “Nama nîmbicî atî ûguo nîguo kûrî. Nwatî kûrî mûndû ûngîtuîka mûthingu mbere ya Ngai?

³ Mûndû angîenda gûcindana na Ngai, ndangîvota kûmûcokeria wanarî kîûria kîmwe gatagatîrî ga ciûria ngiri.

⁴ Ngai nî mûûgî na arî vinya nyîngî, kûrî mûndû wanakararania nake na akavootana?

⁵ Nîke ûthengutagia irîma îtakûmenya, na akaing'aûrania arî na marakara.

⁶ Ainainagia nthî îkauma varîa îthagîrwa îrî, na itugî ciayo ikainaina.

⁷ Athaga riûa rîtikaume, rîkarega kuuma, akunîkagîra njata ikarega kwara.

⁸ Nîke wenga watambarûkirie matu, na agîkinyanga makûmbî ma manjî îriarî.

⁹ Nîke watûmire njata igîe îgûrû: Ngatûnyi, Orioni, Kîrîmîra, na njata cia mwena wa îveti.

¹⁰ Ngai nîwîkaga maûndû manene matangîmenyeka, na maûndû ma magegania matangîtarîka.

¹¹ Aia, avîtûkagîrîra varîa nîrî na ndingîmwona. Aumagarûkagîra varîa nîrî na ndingîmûmenya.

¹² Taroria, oocaga kîrîa akwenda na gûtirî mûndû ûngîmûgiria. Gûtirî mûndû ûngîmûria atîrî, ‘Ûreka atîa?’

¹³ “Marakara ma Ngai matingîgirîrîkia; arîa matethagia njûnamatu îrîa îtagwa Rahabu, nîmamwînamagîrîra.

¹⁴ Nîngîcokeria Ngai atîa? Nîngîruta ciugo cia kwaria nake kû?

¹⁵ Wana ethîrwa nie ndirî na mavîtia, ndingîcokanîria nake. Nwa nginya nîmûvoe ambîguîre ntha ûcio ûtucanagîra ciira.

¹⁶ Nîngîetire Ngai akîmbîtîka, ndingîetîkirie atî nîwanthikagîrîria.

¹⁷ Ke nîamindiûranagia na rûkûngi rûnene; nîanyongagîrîra nguraro gûtarî na gîtûmi.

¹⁸ Ndakaareka wanarî mveva, nwatî atûmaga ndûûre mbîcûrîtwe nî marakara.

¹⁹ Wana ethîrwa nî kûvirana îgootirî, nû ûngîmûthitanga, ethîrwa nî kûvirana îgootirî, nû ûngîmwîta?

²⁰ Wana ethîrwa ndirî na mavîtia, kanyua gakwa nîkanducaga mwîvia; wana ethîrwa ndirî na ûcuke, nîanducaga mwaganu.

²¹ Ndirî na ûcuke, na ndiîmakagîra, ndirî na vata na mwoyo wakwa.

²² Maûndû monthe nîûndû ûmwe, kwoguo mbugaga atî, Ngai acûkangagia andû aro wana arîa acûku.

²³ Rîrîa mûthiro waûka kûthiria andû wa rîmwe, Ngai nîathekagîrîra arîa matarî na ûcuke maûragwa.

²⁴ Andû arîa aganu nîo Ngai aaveere nthî, nîwatuire andû arîa macirithanagia ndumumu. Ethîrwa tî Ngai wîkîte ûguo, nû?

²⁵ “Mîthenya yakwa îvinyûrîte gûkîra mûvinyûri, nwakwa îthiraga na ndionaga ûndû mwaro.

²⁶ Îvinyûraga ta tûtarû twa marura, kana ta nderi îkîvûria gaciû.

²⁷ Nîngiuga atîrî, ‘Nîngûtigana na mateta makwa, ndige gûtukia kîthithi na njanjamûke.’

²⁸ Nînîtigagîra mathîna monthe marîa mbîthîrîtwe namo, nîûndû nîmbicî vîndî cionthe Ngai anducaga mwîvia.

²⁹ Nîratinda ngîthînîka nîkî? Na Ngai nîarîkîtie kûndua mwîvia.

³⁰ Wana nîngîîthambia na manjî ma mbaravu, na nthambie ngara ciakwa ithere mûno,

³¹ nwanginya ûkambikia gîcororî, nacio nguo ciakwa nîikaanjonorithia.

³² Nîûndû Ngai tî mûndû ta nie atî nwa nîmûcokerie, wana tûtingîthiî îgootirî gûciira nake.

³³ Naarî kethîrwa nîtwonire mûndû wa gûtwîguithania; ûrîa ûngîatûnyitire njara atwîguithanie.

³⁴ Ngai nthengutîria rûthanju ndûkamverithie, nthengutîria maûndû ma kûmbîguithia guoya.

³⁵ Kwoguo nîngaacoka mbaragie ndakûmwîtigîra, nîûndû thamiri yakwa ndîranjuka.”