Ayubu 6 - ÎVUKU RÎA ÛVORO MWARO

¹ Ayubu nîwacokerie Elifazi atîrî,

² “Kethîrwa kîeva kîrîa nîrî nakîo nwa kîthimwe; na mathîna marîa nîrî namo mathimwe!

³ Nwa methîrwe marî mengî gûkîra mûthanga ûrîa ûrî îriarî, na kwoguo mîario yakwa îthagîrwa îtarî mûkinyo.

⁴ Nîrî mûmunde nî mîguî ya Ngai mwene vinya wonthe, na ûvai wayo wîcûrîte mwîrî wakwa wonthe. Maûndû marî na guoya kuuma kûrî Ngai nîmanginyîrîte.

⁵ Nyûmbû nîyanagia rîrîa îkûrîa nyaki, kana ng'ombe îkaania îkîrîa ria?

⁶ Kîndû gîtarî na mûcamo nwa kîrîke gîtarî cumbî? Mûruru wa îtumbî ûrî mûrîo?

⁷ Ngoro yakwa ndîriragîria irio ta icio, nîcionaga ngegua timba.

⁸ “Naarî kethîrwa nwa mvewe kîrîa nîravoya, na Ngai akamva kîrîa nîrerirîria?

⁹ Nî kava Ngai ambûragîte; na arekererie njara yake înthirie!

¹⁰ Ûndû ûcio nwa ûtûme mbîganîre, nîngîakenire wana ethîrwa naarî na ûrûrû mwîngî, nîûndû ndianaregana na ciugo cia Ûrîa Mûtheru.

¹¹ Nî vinya ûrîkû nîrî naguo wa gûtûûra mwoyo? Na nîndûûra nîkî rîrîa ndarî na kîîrîgîrîro?

¹² Nîkwa nîrî na vinya ta îthiga? Kana nîkwa mwîrî wakwa ûrî wa gîcango?

¹³ Nama ndingîvota gwîtethia; na gûtirî vandû nîngîona ûtethio.

¹⁴ “Ûrîa ûregaga kwîguîra mûrata wake ntha, aregaga gûkumia Ngai Mwene Vinya.

¹⁵ Arata akwa mamvenetie ta karûnjî, wata kamûvuro karîa kavûcaga mbura yakîa.

¹⁶ Twîthagîrwa twîcûrîte mbaravu, îra rîthithaga tûrûnjîrî tûu.

¹⁷ Vîndî ya thano nîtûthiraga, rîrîa riûa rîara nîtûvûcaga tûkaûrîra.

¹⁸ Athiî nîmaûraga magîcaria manjî. Maûrûraga werûrî na magakuîra kuo.

¹⁹ Arîa mathiîcaga kuuma Tema nîmacaragia manjî, arîa maumaga Sheba nîmagîcaga na kîîrîgîrîro.

²⁰ Nîmaarakarire nîûndû maarî na kîîrîgîrîro, makinya kuo nîmaaconokire na makîagaga meciria.

²¹ Mue mwîkariî ta tûrûnjî tûu kûrî nie, mwonaga ngînyamarîka mûkegua guoya.

²² Nanamwîra mûmve kîveo, kana mûvecane îvaki nîûndû wakwa?

²³ Nanamwîra mûndethûre kuuma kûrî nthû ciakwa? Kana mûngûûre kuuma kûrî arîa mamvinyagîrîria?

²⁴ “Nîngûkira kivi, mûnthomithie, moniani mavîtia makwa nîguo nîmamenye.

²⁵ Ciugo cia ma irî vinya mûnene. Nwatî ciugo cienyu nî cia mana itindethagia.

²⁶ Mûreciria nwa mûrute ciugo mavîtia? Ciugo cia mûndû ûtarî mwîvoko nîta rûvuvo.

²⁷ Mue wana nwa mwikîrie ciana cia ndigwa mîtî, na mwendie arata enyu.

²⁸ Nwatî rîu, ta ndoriani waro, nîûndû ndingîtîkîra kûmûveenia.

²⁹ Garûrûkani, mûtige kûmbîka naaî. Garûrûkani, nie ndirî ûndû mûcûku mbîkîte.

³⁰ Mûreciria nwa mbarie maveeni? Mûreciria ndingîvota kûmenya mathîna makwa?”