Ayubu 33 - ÎVUKU RÎA ÛVORO MWARO

¹ Rîu we Ayubu, tega matû waro, wîgue maûndû monthe marîa ngûkwîra.

² Ta roria, nîngûtumûra kanyua gakwa, mbarie ûrîa ûrî mecirarî makwa.

³ Ciugo irîa mbaragia ciumbûraga wagîrîru wa ngoro yakwa, maûndû marîa mbîcî nîmo mbaragia.

⁴ Roho wa Ngai nîguo wanyûmbire, mîruke ya Mwene Vinya wonthe nîyo îndûragia mwoyo.

⁵ Njokeria ethîrwa nwa ûvote, varîrîria ciugo ciaku waro; wîtetere.

⁶ Methorî ma Ngai nie nawe twîkariî ûndû ûmwe, wana nie naûmbirwe na yûmba.

⁷ Kwoguo ndwagîrîrwe nî kûnîîtigîra, nie ndingîkûvinyîrîria.

⁸ Nama, waria ngîgucaga, na nînegua mûgambo waku ûkîaria.

⁹ We wauga atî nîrî mûtheru, na ndirî na mavîtia, nîrî mûtheru, na ndirî na mevia.

¹⁰ Nwatî Ngai nîacaragia kanya ga kûmverithia, ke anducaga nthû yake.

¹¹ Nîanjovete magûrû na nyororo, na nîatuîragia mîthiîre yakwa yonthe.

¹² Nwatî we Ayubu, nîrakwîra wî mûvîtiu, Ngai nî mûnene gûkîra mûndû.

¹³ Ûrakararania nake nîkî, ûkiugaga atî ndacokagia ciûria cia andû.

¹⁴ Nîûndû Ngai aragia na njîra îmwe, agacoka akaria na njîra îngî, nwatî mûndû ndataûkagîrwa.

¹⁵ Ngai aragîria andû na njîra ya iroto na cioneki, ûtukû rîrîa mamamiî toro mûnene.

¹⁶ Nîatûmaga mathikîrîrie ûrîa arauga, na amakaania, nîmagîcaga na guoya.

¹⁷ Amekaga ûguo nîguo matige kwîvia, na agatûma matigane na mwîtîîo.

¹⁸ Nîagiragia andû matikagwe îrimarî, na akamavonokia kuuma kûrî gîkuû.

¹⁹ Ngai nîaverithagia mûndû na njîra ya mîrimû, na agatûma mwîrî wake wonthe wîcûrwe nî ruuo.

²⁰ Mûndû ûcio ndegucaga angîrîa irio, wana nîagîcaga na kîîria ngoro nîûndû wa irio irîa endete.

²¹ Mwîrî wake ûgînjîte, ûgatigara mavîndî matheri.

²² Ke arî vakuvî gûkua, na ûtûûro wake ûrî vakuvî na kwa arîa akuû.

²³ Nwatî mûraika angîthîrwa vakuvî nake mûraika ûmwe gatagatîrî ka araika ake ngiri, wa kûmûririkanagia ûrîa agîrîrwe nî gwîka.

²⁴ Mûraika ûcio nîamwîgucagîra ntha na akera Ngai atîrî, “Mûvonokie ndakathiî gwa akuû, nîrî na kîndû gîa kûmûkûûra ndakathiî kuo.”

²⁵ Mwîrî wake ûrogîa na vinya rîngî, arogîa na vinya ta wa mûndû mwîthî.

²⁶ Rîrîa mûndû ûcio avoya, Ngai nîamwîgucaga, nîagocaga Ngai akenete, nake Ngai nîatûmaga maûndû make mavue.

²⁷ Ke ainaga arî mbere ya andû akauga atîrî, “Nînevirie na ngîregana na maûndû marîa maro, nwatî Ngai ndaamverithia nîûndû wa wîvia ûcio.

²⁸ Nîavonoketie mwoyo wakwa kuuma kûrî gîkuû, na nîngûtûûra mwoyo.”

²⁹ Taroria, Ngai nîekaga mûndû maûndû mama monthe, nîamekaga maita meengî kûrî mûndû.

³⁰ Nîavonokagia mûndû ndakathiî mbîrîrarî, nîguo atûûre mwoyo.

³¹ We Ayubu, tega matî ûnthikîrîrie, kira kivi, mbarie.

³² Nwatî ethîrwa ûrî na ûndû ûrenda kuga, mbîîra, aria, nîûndû nîrenda kwonania ndûrî na mavîtia.

³³ Ethîrwa tîguo, nthikîrîria, kira ûnthikîrîrie, na nîngûkûthomithia ûûgî.