Ayubu 32 - ÎVUKU RÎA ÛVORO MWARO

Mîario ya Elihu

¹ Kwoguo arûme aya athatû: Elifazi, Bilidadi, na Zofari, nîmaaregire gûcokeria Ayubu, nîûndû eetucaga atî ke nî mûthingu.

² Nake Elihu, mûvîcî wa Barakeli wa rûciaro rwa Buzi na wa mûvîrîga wa Ramu nîwarakarire. Arakarire nîûndû Ayubu eetucaga nîke ûrî na kîvooto, na tî Ngai.

³ Wana aarî marakara manene kûrî arata a Ayubu athatû, nîûndû mationia ûndû wa gûcokeria Ayubu. Ûndû ûcio nîwatûmire kwoneke takwa Ngai aarî na mavîtia.

⁴ Elihu ekarire akirîte nginya rîrîa arîa maarî akûrû kûrî ke, maaririe na Ayubu.

⁵ Na rîrîa Elihu onire atî andû acio athatû nîmaremwa nî gûcokeria Ayubu, nîwarakarire;

⁶ na akîambîrîria kuga atîrî, Elihu “Nie nîrî mwîthî namue mûrî akûrû kwoguo nînetigîrire kûmwîra meciiria makwa.”

⁷ Neîrire na ngoro atîrî, “Tigani arîa akûrû marie; arîa marî na mîaka mîngî nîmavecane ûûgî.”

⁸ Nwatî roho wa Ngai mwene vinya wonthe, nîguo ûûkaga kûrî mûndû na akagîa na ûûgî.

⁹ Tî ûkûrû ûtûmaga mûndû agîe na ûûgî, na tîguo ûtûmaga mûndû amenye ûûma.

¹⁰ Kwoguo ta nthikîrîriani, tiga nîmwîre ûrîa nîreciria.

¹¹ Rîu-î, nîneterere mbîgue ûrîa mûkuga, nînathikîrîrie mîario yenyu ya ûgî, rîrîa mweciragia ûrîa mûkuga.

¹² Nînamûthikîrîrie waro mûno, nwatî gûtirî wanarî ûmwe wonanirie mavîtia ma Ayubu, kana wamûcokerie.

¹³ Îîmenyerereni mûtikeîre atî mue nîmue aûgî; Ngai nîke ûngîcokeria Ayubu, nwatî tî mûndû.

¹⁴ Ayubu ndaaragia ciugo imberekerete, kwoguo tînîmûcokeria ta ûrîa mwamûcokerie.

¹⁵ Matirî na ciugo mbagîrîru, Ayubu; nî amaku matirî na ûndû wa gûgûcokeria.

¹⁶ Nîngûthiî na mbere na kwaria na mûtiraria? Marûngamîte vau matarî na ûndû wîngî wa kuga.

¹⁷ Wana nie nîngûvecana macokio makwa, nîngûvecana woni wakwa.

¹⁸ Nîûndû nîrîmwîcûre nî ndeto, roho wakwa nîûraningîrîria kwaria.

¹⁹ Ngoro imbîte ta ndivei îturîte gwa kûrutîra mîruke nîndûmûka ta mbooro îcûrîte ndivei ya kûvivwa wa rîo.

²⁰ Nwanginya mbarie nîguo mvûcûke, nama nwa nginya mbarie.

²¹ Nie ndikonania kîmenyano kûrî mûndû wanarî ûrîkû, kana nyûrûria mûndû.

²² Nîûndû ndicî kûnyûrûrania; nîngîka guo mûnyûmbi nwa ambûrage warîo.