Aroma 9 - ÎVUKU RÎA ÛVORO MWARO

Ngai na andû ake

¹ Nie nîraria ûma nîrî ndaarî ya Kristû. Thamiri yakwa îrîa yathagwa nî Roho Mûtheru nî mûira wakwa atî ndirathaana.

² Nîrî na kîeva kîngî mûno vamwe na ûrûrû ûtarî mûthiia ngororî yakwa,

³ nîûndû wa andû a mûvîrîga wetû arîa tûciaranîrîtue nao. Nwa mende nyitwe nî kîrumi Kîam Ngai na ndigithanue na Kristû îthenya rîao.

⁴ Andû acio nî Aisiraeli na nîo Ngai aatuire ciana ciake na akîmaguûrîria riiri wake. Ke nîwathondekire irîkanîro nao na akîmava watho. Andû acio nîmamenyete kûgooca Ngai nama na nîmamûkîrîte ciîranîro ciake.

⁵ Nî a mbarî ya methe metû ma tene na Kristû ta mûndû, nwa wa rûrîrî rwao. Ngai ûrîa wathaga maûndû monthe arogoocwa tene na tene! Ameni.

⁶ Nie ndirauga atî Ngai nîwaregire kûvingia kîîranîro gîake. Nîûndû tî andû onthe a Isiraeli maathuurirwe nî Ngai.

⁷ Wana tî njiarwa cionthe cia Iburahimu ciana cia Ngai. Ngai erire Iburahimu atîrî, “Nî na njîra ya Isaka ûkaagîa na rûciaro rûrîa nakwîrîre.”

⁸ Ûguo nî ta kuga atî ciana irîa iciarîtwe na njîra ya kîîmwîrî tî ciana cia Ngai, nwatî ciana irîa ciumanîte na kîîranîro Kîam Ngai, nîcio njiarwa ciake nama.

⁹ Nîûndû rîrîa Ngai arûthire kîîranîro na Iburahimu aaugire atîrî: “Vîndî îrîa mbagîrîru yakinya nîngaacoka na Sara nîakagîa na kavîcî.”

¹⁰ Na twa ûguo tu, nîûndû ariû a Rebeka aîrî maarî a îthe ûmwe na nwake îthe wetû Isaka.

¹¹ Kûthuurwa kwa mûriû ûmwe warî mworoto wa Ngai. Ke mwene nîke wendire kûmûthuura na tî ûndû wa ciîko ciake, aamûthuurire wana mbere ya maciarwa na mbere ya mamenya maûndû maro kana macûku.

¹² Ngai nîwerire Rebeka atîrî, “Ûrîa mûkûrû nîagaatungatîra ûrîa mûnini.”

¹³ Wata ûrîa kwandîkîtwe Mandîkorî Matheru atîrî, “Nînendire Jakovu na ngîthûra Esaû.”

¹⁴ Rîu nîtuga atî Ngai ndatûmagîra kîvooto? Naarî.

¹⁵ Nîûndû Ngai nîwerire Musa atîrî, “Nie ngegucagîra ntha wa ûrîa nenda kwîguîra ntha, na ngacaagîra wa ûrîa nenda gûcaîra.”

¹⁶ Kwoguo, maûndû monthe mavotekaga nîûndû wa ntha cia Ngai na tî kwenda kwa mûndû kana kîîo gîake.

¹⁷ Nîûndû mandîkorî matheru Ngai erire mûthamaki wa Misiri atîrî, “Nie naagûtuire mûthamaki nîguo ngûtûmîre kwonania vinya wakwa na ngumo yakwa îtambe nthî yonthe.”

¹⁸ Kwoguo Ngai nîegucagîra ntha ûrîa enda kwîguîra, na ûrîa enda kûmia ngoro nîamûûmagia.

Marakara na ntha cia Ngai

¹⁹ Ûmwe gatagatîrî kenyu nî agaacoka ambûrie atîrî, “Ethîrwa ûguo nîguo Ngai ekaga angîvota atîa gûtua atî mûndû nî wîvîtie? Nû ûngîregana na wendi wa Ngai?”

²⁰ Nwatî we nîwe û mûrata wakwa atî nîguo ûcokerie Ngai? Nyûngû ya yûmba ndîagîrîrwe nî kûria ûrîa wa mîûmbire atîrî, “Wanyûmbire ûguo nîkî?”

²¹ Mûmbi wa nyûngû ethagîrwa arî na ûvoti wa kûmba wa kîrîa kîonthe akwenda kûmba na yûmba rîake. Avota kûmba nyûngû igîrî kuuma yûmbarî rîmwe; îmwe îrî ya gûtûmîrwa na njîra ya mwanya na îo îngî ya gûtûmîrwa vîndî cionthe.

²² Ûguo nwa guo Ngai ekîte. Endaga kwonania marakara make na gûtûma vinya wake ûmenyeke. Kwoguo eekarire akirîrîrîtie mûno andû arîa maarî makinyîrwe nî marakara make, na magîrîrwe nî gûcûkangua viû.

²³ Ke nwa wendaga kwonania riiri wake mwîngî kûrî andû arîa eeguîrîre ntha na nîtue aavarîrie tûgae riiri wake.

²⁴ Tue nîtue andû arîa Ngai eetire, amwe maarî Ayahudi na amwe maarî andû a Ndûrîrî.

²⁵ Wata ûrîa kwandîkîtwe nî mûrathi Hosea: Ngai aaugire atîrî, “Andû arîa mataarî akwa, nîo ngeeta, ‘Andû akwa.’ Na vûrûri ûrîa ndendeete nîguo ngeeta, ‘Mûrata wakwa.’

²⁶ Na vandû varîa meerîrwe atî, ‘Mue tîmue andû akwa,’ vandû wa vau nwa vo mageetîrwa, ‘Ariû a Ngai ûrîa ûtûûraga mwoyo.’ ”

²⁷ Nake Isaia nîwanîrîre ûvoro wîgiî Isiraeli akiuga atîrî, “Wana ethîrwa ciana cia Isiraeli nî nyîngî ta mûthanga ûrîa ûrî îriarî, nî andû anini mûno gatagatîrî kao makaavonoka,

²⁸ nîûndû Mwathani nîagaacirithia na atuîre andû onthe a nthî riita rîmwe rîa kwîgana.”

²⁹ Nwa ta ûrîa mûrathi Isaia augire vau mbere atîrî, “Tiga nîkwa Mwathani Mwene Vinya wonthe aatûtigarîrie njiarwa imwe, tûngîathirirue viû ta matûûra ma Sodomu na Gomora.”

Paûlo nîwavoere andû a Isiraeli

³⁰ Rîu ûguo nîkuga atîa? Ûguo kuga atî andû a Ndûrîrî matiageria gwîtua athingu mbere ya Ngai, nwatî Ngai nîwamatuire athingu nîûndû wa wîtîkio wao.

³¹ Andû a Isiraeli nîmaacaragia watho ûrîa mangîrûmîrîra nîguo matuîke athingu nwatî nîwaturire.

³² Waturire nîûndû maaûcaragia na njîra ya maûndû marîa meekaga nwatî tî na njîra ya wîtîkio. Kwoguo nî maavîngirwe nî, “Îthiga rîrîa rîvînganaga.”

³³ Wa ta ûrîa kwandîkîtwe Mandîkorî Matheru atîrî: “Taroriani, kûu Zayuni nî ngwiga îthiga rîrîa rîkaavînga andû, îthiga rîrîa rîgaatûma andû magûe. Nwatî mûndû wa wonthe ûmwîtîkîtie ndagaaconorithua.”