Aroma 7 - ÎVUKU RÎA ÛVORO MWARO

Ngerekano ya ûvikania

¹ Ariû na aarî a îthe wetû, nama nîmwîcî ûrîa ngeerie kuga, nîûndû muonthe nîmwîcî watho. Nîmwîcî atî mûndû ethagîrwa arî rungu rwa watho rîrîa tu arî mwoyo.

² Mûndûmûka mûviku ethagîrwa ovanîtue nî watho kûrî mûthuuri rîrîa rîonthe mûthuuri wake arî mwoyo. Nwatî mûthuuri wake angîkua, mûndûmûka ûcio ndethagîrwa arî mwove nî watho ûcio.

³ Kwoguo mûndûmûka ûcio angîtuîka wa mûndû wîngî mûthuuri wake arî mwoyo, atuîkaga mûtharia. Nwatî mûthuuri wake angîkua mûndûmûka ûcio ethagîrwa atarî mwove nî watho, na angîvikua nî mûthuuri wîngî ndangîtuîka mûtharia.

⁴ Ariû na aarî a îthe wetû, ûguo nîguo maûndû mekariî wana kûrî mue. Ûvororî wîgiî watho mue wana mue nîmûkuîte nîûndû mûrî kîîga Kîam mwîrî wa Kristû. Na rîu mûrî a ûcio wariûkirue nîguo tûciarîre Ngai maciaro.

⁵ Vîndî îrîa twatûûraga tûrûmagîrîra maûndû ma mwîrî, watho wekagîra vinya merirîria marîa macûku ma mwîrî. Kwoguo maûndû marîa twekaga maatûretagîra gîkuû.

⁶ Nwatî rîu tûrî ovore kuuma wathorî na tûrî akuû maûndûrî marîa matûtucaga ngombo. Rîu tûtungatagîra Ngai tûrî na mwoyo mûcerû wa Roho, nwatî tûtimûtungatagîra tûkîrûmagîrîra watho ûrîa mwandîke wa tene.

Watho na mevia

⁷ Rîu-î, nîtuga atîa? Nîtuga atî watho guo mwene nî mevia? Naarî. Nwatî watho nîguo watûmire menye mevia nî ndûî. Watho ûtangîaugîte ndûkerirîrie kîndû Kîam mûndû, ndingîamenyire kwîrirîria nî ndûî.

⁸ Nîûndû wa rîathani rîu, mevia nîmaagîre na magîtûma nîrirîrie maûndû marîa monthe macûku. Nîûndû vatarî watho, mevia matirî vinya.

⁹ Nie nînatûûraga mwoyo wana mbere ya menya watho. Nwatî rîrîa naamenyire maathani, mevia nîmaagîre vinya,

¹⁰ na ngîkua. Narîo rîathani rîrîa rîngîatûmire ngîe na mwoyo, nîrîatûmire ngue.

¹¹ Mevia nîmaagîre na mweke na njîra ya rîathani. Namo nîmaamveenererie na makîmbûraga.

¹² Kwoguo, watho guo mwene nî mûtheru na rîathani nî rîtheru, rîrî kîvooto na nî rîaro.

¹³ Ûguo nî kuga atî ûndû mwaro wandetere gîkuû? Naarî! Nî mevia maatonyire kûrî ûndû ûrîa mwaro nîguo mandetere gîkuû. Ûndû ûyû wekîkire nîguo mevia meyonanie nama ûrîa mekariî. Kwoguo na njîra ya rîathani mevia nîmonekaga marî macûku mûno.

Mbaara îrîa îthagîrwa îrî ndaarî ya mûndû

¹⁴ Nîtwîcî atî watho uumaga kûrî Ngai, nwatî nie nîrî mûndû wî na mwîrî na wendetue agatuîka ngombo ya mevia.

¹⁵ Nditaûkagîrwa nî maûndû marîa mbîkaga, nîûndû maûndû marîa mendaga gwîka tîmo mbîkaga, nwatî mbîkaga marîa menete.

¹⁶ Na rîu ethîrwa mbîkaga maûndû marîa menete, nîngwîtîkîra atî watho nî mwaro.

¹⁷ Kwoguo tî nie mbîkaga maûndû mau, nwatî nî mevia marîa matûûraga ndaarî yakwa.

¹⁸ Nie nîmbicî atî ndaarî yakwa, ûguo nî kuga mwîrîrî wakwa ndirî na ûvoti wa gwîka waro. Nîûndû wana ethîrwa nîmendaga gwîka waro ndivotaga gûwîka.

¹⁹ Ndiîkaga maûndû marîa maro mendaga gwîka, îthenya rîa ûguo mbîkaga maûndû marîa macûku marîa nie ndendaga gwîka.

²⁰ Na rîu, ethîrwa mbîkaga maûndû marîa ndendaga gwîka, tî nie mbîkaga guo nwatî nî mevia marîa matûûraga ndaarî yakwa.

²¹ Kwoguo monaga watho ûyû ûkîruta wîra nîûndû rîrîa ngwenda gwîka waro, ûndû ûrîa nthuuraga gwîka nî ûrîa mûcûku.

²² Ngororî yakwa nîngenete nî ûndû wa watho wa Ngai.

²³ Nwatî mwîrîrî wakwa nîmonaga watho wîngî ûkîruta wîra. Watho ûcio nî ûrûaga na maûndû marîa meciria makwa monaga marî maro na ngatuîka ngombo ya watho wa mevia marîa matûûraga ndaarî yakwa.

²⁴ Kaî nîrî mûndû mûthînîku-î! Nû ûngîndethûra kuuma mwîrîrî ûyû wa gîkuû?

²⁵ Nî ngatho kûrî Ngai ûrîa ûndethûraga na njîra ya Mwathani wetû Jesû Kristû. Kwoguo, meciriarî makwa ndungatagîra watho wa Ngai, nwatî mwîrîrî wakwa, ndungatagîra watho wa mevia.