Aroma 5 - ÎVUKU RÎA ÛVORO MWARO

Gûtuwa athingu nî Ngai

¹ Na rîu, nîûndû nîtûtuîtwe athingu nî Ngai na njîra ya gwîtîkia, nîtwîgucanîte na Ngai na njîra ya Mwathani wetû Jesû Kristû.

² Nîûndû wa gwîtîkia, ke nîatûmîte tûgîe na wega wa Ngai ûrîa tûrî naguo rîu. Kwoguo nîtûkenaga nîûndû wa kîîrîgîrîro kîrîa tûrî nakîo gîa gûkagaa riiri wa Ngai.

³ Wana nîtûkenaga twona mathîna nîûndû nîtwîcî atî mathîna maretaga kûmîrîria,

⁴ nakuo kûmîrîria kûretaga gwîkindîria, nakuo gwîkindîria kûretaga kîîrîgîrîro.

⁵ Twagîa na kîîrîgîrîro tûtikucaga ngoro nîûndû Ngai nîatwîkîrîte wendo ngororî cietû na njîra ya Roho Mûtheru. Roho ûcio nî kîveo gîetû kuuma kûrî Ngai.

⁶ Nîûndû rîrîa tûtaarî na vinya na twarî evia, Kristû nîwakwire nîûndû wetû kavinda karîa Ngai oonire kagîrîrîte.

⁷ Nî ûndû wî vinya mûndû gûkua nîûndû wa mûndû ûrîa mûthingu. Nwatî nwa kûvoteke mûndû akue nîûndû wa mûndû ûrîa wîkaga ciîko mbaro.

⁸ Nwatî Ngai nîwonanîtie ûrîa atwendete nîûndû Kristû nîwatûkuîrîre vîndî îrîa twarî evia.

⁹ Ethîrwa na njîra ya gîkuû Kîam Jesû nîtûtuîtwe athingu, na kinthî ke ndagaatûvonokia makîria kuuma kûrî marakara ma Ngai?

¹⁰ Vîndî îmwe twarî nthû cia Ngai, nwatî ke nîwatûtuire arata ake na njîra ya gîkuû Kîam mûriû wake. Na rîu nîûndû tûrî arata a Ngai ke nîagaatûvonokia na njîra ya Kristû.

¹¹ Na twa ûguo tu, nwatî nîtûkenete nî Ngai nîûndû na njîra ya Jesû Kristû nîtûtuîkîte arata ake.

Adamu na Kristû

¹² Mevia maatonyire nthî na njîra ya mûndû ûmwe na makîrete gîkuû. Kwoguo gîkuû nîgîecûrire kûrî andû onthe a nthî nîûndû andû onthe nîmeevirie.

¹³ Mevia maarî kuo nthî wana mbere ya kûgîe na Watho, nwatî gûtirî na ûvoro wa kwîvia gûtarî na Watho.

¹⁴ Nwatî kuuma vîndî ya Adamu nginya vîndî ya Musa gîkuû nîkîathaga andû onthe, wana arîa matevîtie ta ûrîa Adamu eevirie rîrîa aaregire kwathîkîra Watho wa Ngai. Adamu aarî mûthemba wa mûndû ûrîa warî aûke.

¹⁵ Nwatî Adamu na mûndû ûcio methagîrwa marî na ngûrani, nîûndû kîveo Kîam Ngai tî ûndû ûmwe na mevia ma Adamu. Andû eengî nîmaakwire nîûndû wa mevia ma mûndû ûcio ûmwe. Nwatî wega wa Ngai nî mwîngî makîria, kwoguo andû eengî nîmaamûkîre kîveo kuuma kûrî Ngai na njîra ya wega wa mûndû ûmwe na nîke Jesû Kristû.

¹⁶ Kûrî ngûrani gatagatîrî ga kîveo Kîam Ngai na mevia ma mûndû ûmwe. Na njîra ya wîvia wa mûndû ûmwe Ngai nîwatuire atî andû onthe nî acûku, nwatî vuva wa mevia ma andû eengî Ngai nîwavecanire kîveo na agîtua andû athingu.

¹⁷ Ethîrwa mevia ma mûndû ûmwe nîmaatûmire gîkuû kîthamaka nîûndû wa mûndû ûcio, andû arîa makinyagîrwa nî wega ûcio na makamûkîra kîveo Kîam ûthingu, nîmakaathana na matûûre mwoyo na njîra ya Jesû Kristû.

¹⁸ Kwoguo, wata ûrîa rîvia rîa mûndû ûmwe rîatûmire andû onthe matuîrwe, na njîra wata îo gîîko Kîam mûndû ûmwe Kîam ûthingu nîgîtûmaga andû onthe matuuwe athingu na magîe na mwoyo.

¹⁹ Wata ûrîa andû eengî maatwirwe evia nîûndû wa ûremi wa mûndû ûmwe, na njîra wata îo andû eengî nîmagaatuwa athingu nîûndû wa kwathîka kwa mûndû ûmwe.

²⁰ Watho wekîrirwe nîguo andû mevie mûno. Nwatî wa ûrîa mevia mongererekaga, wega wa Ngai nîwongererekaga makîria.

²¹ Kwoguo wata ûrîa mevia maathamakire na njîra ya gîkuû, nwaguo wega wa Ngai ûthamakaga na njîra ya ûthingu na ûgatûma tûgîe na mwoyo wa tene na tene na njîra ya Jesû Kristû Mwathani wetû.