Aroma 4 - ÎVUKU RÎA ÛVORO MWARO

Ngerekano ya Iburahimu

¹ Nîtuga atîa ûvoro wîgiî Iburahimu îthe wa rûrîrî rwetû?

² Ethîrwa Iburahimu aatuirwe mûthingu nîûndû wa maûndû marîa eekaga, ke nwa agîe na ûndû wa gûtûma etîe. Nwatî ndangîîtîîa arî mbere ya Ngai.

³ Mandîko matheru maugîte atîrî, “Iburahimu nîwetîkirie Ngai, na nîûndû wa wîtîkio wake, Ngai nîwamwîtîkîre ta mûndû mûthingu.”

⁴ Mûruti wa wîra avecagwa mûcara nîûndû wa wîra ûrîa arutîte nwatî mûcara ndûtucagwa ta arî kîveo.

⁵ Mûndû ûrîa ûtevokaga ciîko ciake nwatî nîwîtîkîtie Ngai ûrîa wovanagîra mevia, nîwîtîkîrîkaga nî Ngai nîûndû wa gwîtîkia gwake.

⁶ Ûguo nî guo Daudi aamenyithanagia rîrîa aaririe ûvoro wîgiî kîrathimo kîrîa gîûkaga kûrî mûndû ûrîa ûtucagwa mûthingu nî Ngai nîûndû wa gwîtîkia nwatî tî ûndû wa ciîko ciake.

⁷ “Kûrathimwa nî arîa moveretwe mevia mao nî Ngai na magakirîrîrua maûndû mao macûku!

⁸ Kûrathimwa nî mûndû ûrîa Mwathani atataraga mevia make.”

⁹ Kîrathimo gîkî Daudi aaririe ûvoro wakîo nîkwa kîerîrwe arîa maruaga tu kana nî wana arîa mataruaga? Tugaga atî Iburahimu aatuirwe mûthingu nî Ngai nîûndû wa gwîtîkia.

¹⁰ Maûndû mama mekîkire rî? Nî mbere ya kûrua kana nî vuva? Ngai aatuire Iburahimu Mûthingu mbere ya kûrua.

¹¹ Nakuo kûrua gwake kwarî ta rûûri rwa kwonania atî nîwatuirwe mûthingu nî Ngai nîûndû wa wîtîkio wake wana mbere ya arue. Nake Iburahimu nîwatuirwe nî Ngai îthe wa Kîîroho wa arîa onthe metîkîtie, wana ethîrwa o tî aruu. Andû acio nîo Ngai atuîte athingu.

¹² Iburahimu nwake îthe wa arîa onthe aruu. Ke tî îthe wao nîûndû atî nî aruu. Nî îthe wao nîûndû matûûrîte metîkîtie Ngai wata ûrîa îthe wetû Iburahimu atûûraga etîkîtie atarî ararua.

Kîîranîro kîa Ngai kîamûkagîrwa na njîra ya wîtîkio

¹³ Rîrîa Ngai eerîre Iburahimu na njiarwa ciake atî nthî yonthe îkeethîrwa îrî yake, ekire ûguo nîûndû Iburahimu nîwetîkirie na agîtuwa mûthingu nî Ngai, nwatî tî nîûndû nîwathîkagîra Watho.

¹⁴ Nîûndû ethîrwa kîrîa Ngai eranîrîte gîkaavecagwa arîa mathîkagîra watho, wîtîkio ndûrî vata na kîîranîro Kîam Ngai nî Kîam mana.

¹⁵ Watho ûretaga marakara ma Ngai, nwatî kûrîa gûtarî watho gûtirî ûvoro wa kûregana na Watho.

¹⁶ Kwoguo kîîranîro gîûkaga na njîra ya gwîtîkia, nîguo gîtuîke kîveo nîûndû wa wega wa Ngai. Kûrî njiarwa cionthe cia Iburahimu kîîranîro gîkî twa Kîam arîa mathîkagîra Watho tu, nwatî nî Kîam wana arîa onthe metîkîtie ta Iburahimu nîûndû nîke îthe wa kîîroho wetû tuonthe.

¹⁷ Mandîkorî matheru kwandîkîtwe atîrî, “Nie nîngûtuîte îthe wa ndûrîrî nyîngî.” Kwoguo kîîranîro kîu nî Kîamro methorî ma Ngai ûrîa wetîkîtue nî Iburahimu. Ke nî Ngai ûrîa ûriûkagia akuû na ûrîa ûtûmaga kûgîe na indo irîa itatûûraga kuo.

¹⁸ Iburahimu nîwetîkîtie na akerîgîrîra wana rîrîa ataarî na gîtûmi gîa kwîrîgîrîra. Kwoguo nîwatuîkire, “Îthe wa ndûrîrî nyîngî.” Wata ûrîa Mandîko Matheru maugîte atîrî, “Njiarwa ciaku nîikengîva ta njata cia îgûrû.”

¹⁹ Vîndî îo Iburahimu aarî na ûkûrû ta wa mîaka îgana rîmwe. Nwatî ndaagîa na nganja wîtîkiorî wake wana ethîrwa eyonaga arî mûkûrû mûno; nake mûka aarî nthata.

²⁰ Nake nîwekarire etîkîtie na atarî na nganja îgûrû rîa kîîranîro Kîam Ngai. Nîûndû wa gwîtîkia nîwagîre na vinya na agîkumia Ngai.

²¹ Iburahimu nîwamenyire na ma atî Ngai nwa akaavingia ûrîa wonthe eranîrîte.

²² Kîu nîkîo gîatûmire Iburahimu atuwa mûthingu nî Ngai nîûndû wa gwîtîkia.

²³ Nacio ciugo ino atî “Nîwatuirwe mûthingu” itiandîkirwe nîûndû wake wenga.

²⁴ Nwatî ciandîkirwe wana nîûndû wetû tue arîa tûgûtuwa athingu na arîa twîtîkîtie ûrîa wariûkirie Jesû Mwathani wetû.

²⁵ Ke nî waûragirwe nîûndû wa mevia metû na agîcoka akîriûka nîguo tûtuîke athingu.