Aroma 3 - ÎVUKU RÎA ÛVORO MWARO

¹ Kûrî kîndû Mûyahudi akîrîtie mûndû wa ndûrîrî? Kana nîkûrî na vata wa kûrua?

² Kûrî vata mûno! Ûndû wa mbere, Ayahudi nîo mevokeretwe ndûmîrîri nî Ngai.

³ Narîo ethîrwa amwe gatagatîrî kao matiarî evokeku, ûguo nwa ûtûme Ngai atuîke tî mwîvokeku?

⁴ Naarî! Ngai atûûraga arî mwîvokeku wana andû onthe mangîtuîka a maveeni. Kwandîkîtwe atîrî Mandîkorî matheru, Nwanginya wonanagie kîvooto rîrîa ûkwaria na rîrîa ûgûtuîrwa ciira, nwanginya ûvootanage.

⁵ Nîtuga atîa ethîrwa waganu wetû nîguo ûtethagîrîria kwonania kîvooto Kîam Ngai, nwa tuge atî Ngai nî mûvîtiu vîndî îrîa agûtûverithia? (Ava nîraria tu ûrîa andû a nthî maragia).

⁶ Naarî! Ethîrwa Ngai tî wa kîvooto, angîvota atîa gûcirithia andû onthe a nthî?

⁷ Mûndû nwa aûrie atîrî, “Narîo ethîrwa maveeni makwa nîmagocithagia Ngai, nîkî kîratûma nduîrwe ciira ta mwîvia?”

⁸ Nîtuga atîa vi? Tûthiî na mbere na kwîvia nîguo maûndû maro mongerereke? Andû amwe matûûraga matûcambagia makiugaga atî ûguo nîguo tugaga. Nao nîmagaatuîrwa ciira na kîvooto.

Gûtirî mûndû mûthingu

⁹ Rîu nîtûtua atîa? Nîkwa tue Ayahudi tûrî aro kûrî andû a ndûrîrî? Naarî! Nie nîndîkîtie kwonania atî andû onthe, Ayahudi na Andû a Ndûrîrî methagîrwa marî rungu rwa watho wa mevia.

¹⁰ Wata ûrîa mandîko matheru maugîte atîrî: “Gûtirî mûndû mûthingu.

¹¹ Gûtirî mûndû mûgî kana mûndû ûgoocaga Ngai.

¹² Andû onthe nîmagarûrûkîte makauma varî Ngai; onthe nîmevîtie. Gûtirî mûndû wîkaga ûrîa kwagîrîrîte, gûtirî wana ûmwe.

¹³ Mîmero yao nî ta mbîîrîra ngunûre, nîmî ciao ciaragia maveeni. Mîromorî yao kuumaga ndeto ndûrû ta ûrogi wa njoka.

¹⁴ Mîario yao îcûrîte irumi ndûrû.

¹⁵ Nî marî na karûgî ga gwîka naaî

¹⁶ Kûrîa kuonthe mathiîcaga matigaga kûrî gûcûkangie na kîrîro.

¹⁷ Matiîcî njîra ya thayû.

¹⁸ Matiîtigagîra Ngai.”

¹⁹ Na rîu nîtwîcî atî maûndû monthe marîa marî Wathorî nîma andû arîa marî rungu rwa Watho nîguo gûtikaagîe ciîgwatio, nao andû onthe a nthî matuîke a gûcirithua nî Ngai.

²⁰ Nîûndû gûtirî mûndû ûngîtuîka mûthingu mbere ya Ngai nîûndû wa kwathîkîra Watho. Ûrîa watho wîkaga nî kûmenyithia mûndû atî nî evîtie.

Ûrîa Ngai atûmaga andû matuîke athingu

²¹ Na rîu, njîra îrîa Ngai atucaga andû athingu nayo nîîguûrîtue wana ethîrwa watho wa Musa na arathi nîwarîtie ûvoro wayo.

²² Ngai atucaga andû onthe athingu na njîra ya gwîtîkia Jesû Kristû. Ngai ekaga ûguo kwî andû onthe arîa metîkîtie nîûndû ndathuurûkanagia.

²³ Andû onthe nîmevîtie na makanyivîrwa nî riiri wa Ngai.

²⁴ Nwatî na njîra ya kîveo kîrîa kiumanaga na wega wa Ngai, andû onthe nîmatuîtwe athingu na njîra ya Jesû Kristû ûrîa ûmakûûrîte kuuma meviarî.

²⁵ Ngai aavecanire Jesû nîguo na njîra ya gîkuû gîake andû moverwe mevia mao nîûndû wa wîtîkio wao. Ngai ekire ûguo nîguo onanie ûrîa arî mûthingu. Mbererî îo Ngai aatûîre akiragîrîria andû mevia mao.

²⁶ Nwatî rîu mavindarî mama Ngai nîwovanagîra mevia na akonania ûrîa ke arî mûthingu na nîatucaga andû onthe arîa metîkîtie Jesû athingu.

²⁷ Tue tûngîîtîîa nîkî? Gûtirî na gîtûmi! Nîûndû nîtwathîkagîra watho? Naarî! Nwatî nîûndû nîtwîtîkîtie.

²⁸ Nîûndû Ngai atucaga mûndû mûthingu nî nîûndû wa gwîtîkia, nwatî tî ûndû wa gwîka ûrîa Watho ugîte.

²⁹ Kana Ngai nî Ngai wa Ayahudi tu? Kinthî tî Ngai wa andû a Ndûrîrî wa nao? Nîma Ke nî Ngai wa andû a Ndûrîrî wa nao.

³⁰ Ngai nî ûmwe, na agaatûma Ayahudi matuîke athingu na njîra ya gwîtîkia kwao, na andû a Ndûrîrî magaatua athingu na njîra ya gwîtîkia kwao.

³¹ Ûguo nî kuga atî tûte ûvoro wa Watho nîûndû wa gwîtîkia? Naarî. Vandû va ûguo nîkwa tûnyitagia Watho.