Aroma 2 - ÎVUKU RÎA ÛVORO MWARO

Îtuîro rîa Ngai

¹ Mûrata wakwa ethîrwa we nîûtucagîra andû arîa engî, ndûrî na kîîgwatio wana ethîrwa we nîwe û. Nîûndû rîrîa ûgûtuîra andû arîa engî ûgacoka ûgeka maûndû marîa maratûma ûmatuîre, nîwe mwene ûretuîra.

² Nîtwîcî atî îtua rîa Ngai nî rîa ma kûrî andû arîa mekaga maûndû ta mau.

³ We ûtucagîra andû arîa mekaga naaî, nwatî ûgacoka gwîka naaî, ûreciria nî ûkaavota kûûrîra îtua rîa Ngai?

⁴ Kana nîkwa we ûnyararîte ûtugi wake mwîngî, ûkirîrîria na wetereri. Nama we nîwîcî atî Ngai nî mûtugi nîûndû nîakwonagîrîria njîra ya kwîrira?

⁵ Nwatî we ûrî na ngoro nyûmû na nîûregete kwîrira. Kwoguo nîûreîngîvîria îvera rîaku rîrîa rîgaakinya mûthenya ûrîa marakara ma Ngai na îtua rîake rîa ma rîkaguûranîrua.

⁶ Nîûndû Ngai nîakaarîva wa mûndû kûringana na ciîko ciake.

⁷ Andû amwe nîmakîragîrîria gwîka waro, gûcaria riiri, gîtîîo na gûtûûra mwoyo. Nao nîmakaavewa mwoyo wa tene na tene.

⁸ Andû engî nî eyendi na nîmaregaga kûrûmîrîra ûma nîguo mekage maûndû marîa macûku. Nga nîakaaverithia andû acio arî na marakara.

⁹ Mûndû wa wonthe wîkaga ûndû mûcûku nîakoona thîna na ûrûrû, mbere kûrî Ayahudi na vuva kûrî andû a Ndûrîrî.

¹⁰ Nwatî Ngai nî akaava andû onthe arîa mekaga maûndû maro riiri, gîtîîo na thayû, mbere Ayahudi na vuva andû a Ndûrîrî.

¹¹ Nîûndû Ngai atucagîra andû onthe ûndû ûmwe.

¹² Andû onthe arîa mevîtie matarî wathorî makaathirua vatarî watho, nao andû arîa mevîtie marî wathorî magaatuîrwa kûringana na watho.

¹³ Ngai ndatucaga andû athingu nîûndû wa kwîgua watho, nwatî amatucaga athingu nîûndû nîmekaga ûrîa watho uugîte.

¹⁴ Andû a ndûrîrî matirî na watho. Nwatî rîrîa matongoragua nî thamiri ciao gwîka ûrîa watho uugîte, methagîrwa mekariî ta watho wana ethîrwa matirî rungu rwa watho.

¹⁵ Maûndû marîa mekaga nîmonanagia atî maûndû marîa watho ugîte nîmandîke ngororî ciao. Nacio thamiri ciao nîcionanagia ûguo nî ma nîûndû mavinda mamwe meciria mao nîmamacirithagia na mavinda meengî makamaûmîrîria.

¹⁶ Kwoguo, kûringana na ûvoro mwaro ûrîa mvunjagia ûguo nîguo gûkethîrwa gwîkariî mûthenya ûrîa Ngai na njîra ya Jesû Kristû agaatua ciira wa maûndû ma nthitho marîa marî ngororî cia andû.

Ayahudi na watho

¹⁷ Ûvoro ûkwîgiî nî atîa? We wîîtaga Mûyahudi na nîwîvokete watho na nîwîtîaga nîûndû nîmûkonenie na Ngai.

¹⁸ We nîwîcî ûrîa Ngai endaga wîke na nîûthomete kuumana na Watho kûthuura ûrîa wagîrîrwe nî gwîka.

¹⁹ Nîwîcî nama atî we wî mûtongoria wa andû arîa atumumu na ûtheri wa andû arîa marî ndumarî.

²⁰ We nî ûtaaraga andû arîa matarî aûgî na nî ûthomithagia arîa irimû. Wîciragia atî wathorî kûrî na ûmenyo wonthe na ûma.

²¹ We nîûthomithagia arîa engî, nwatî nîwîthomithagia we mwene? We wîraga andû, “Mûtikaîe,” nwatî we mwene nîwîaga?

²² Wîraga andû arîa engî, “Mûtikaatharie,” nwatî we mwene nîûtharagia? We nîûmenete mîvuanano, nwatî nîwîaga indo cia hekarû.

²³ We nîwîtîaga nîûndû wa kwîthîrwa ûrî na watho wa Ngai, nwatî nîûconorithagia Ngai na njîra ya kûrega kwathîkîra watho wake.

²⁴ Mandîko matheru maugîte atîrî: “Nîûndû wenyu mue Ayahudi, rîîtwa rîa Ngai nîrîcambîtue nî andû a Ndûrîrî.”

²⁵ Ethîrwa nîwathîkagîra watho kûrua gwaku kûrî na gîtûmi, nwatî ethîrwa ndwathîkagîra watho kûrua gwaku gûtirî na gîtûmi.

²⁶ Ethîrwa mûndû wa ndûrîrî ûrîa ûtarî mûruu nîwathîkagîra watho, na kinthî ke ndagaatucagwa ta arî mûruu?

²⁷ Kwoguo andû a Ndûrîrî arîa matarî aruu mwîrî nwatî nîmathîkagîra watho, nîmakaamûtuîra ciira mue Ayahudi arîa mûrî na watho mwandîke na nîmûruaga nwatî mûtiathîkagîra watho ûcio.

²⁸ Mûyahudi wa ma tî ûrîa wonekaga na îgûrû atî nî Mûyahudi, nakuo kûrua kwa ma tî kûrua mwîrî.

²⁹ Mûyahudi wa ma nî ûrîa Mûyahudi ndaarî, nakuo kûrua kwa ma nî kûrua ngoro na njîra ya Roho na tî na njîra ya watho ûrîa mwandîke. Mûndû ta ûcio nîakumagua nî Ngai nwatî tî andû.