Aroma 1 - ÎVUKU RÎA ÛVORO MWARO

¹ Kuuma kûrî nie Paûlo, ndungata ya Jesû Kristû na mûtûmwa ûrîa wîtîtwe na akamûrwa nî Ngai nîguo avunjagie ûvoro mwaro wake.

² Tene Ngai nîweranîre Ûvoro Mwaro na njîra ya arathi wata ûrîa kwandîkîtwe mandîkorî matheru.

³ Ûvoro ûcio wîthagîrwa wîgiî Mûriû wa Ngai, Jesû Kristû Mwathani wetû. Na njîra ya kîîmwîrî aarî wa mbarî ya Daudi.

⁴ Îgûrû rîgiî roho ûrîa aarî naguo wa ûtheru nîwonanirue na njîra ya vinya mûno atî ke nîke Mûriû wa Ngai nîûndû wa kûriûkua.

⁵ Na njîra ya Jesû Kristû Ngai nîwatûmire ngîe na wega wake na agîtûma nduîke mûtûmwa nîguo andû a ndûrîrî cionthe metîkie na mathîke. Ndutaga wîra ûyû nîûndû wa Kristû.

⁶ Namue mûrî Roma, mûtaranîrîtue vamwe na andû arîa Ngai etîte mûtuîke a Jesû Kristû.

⁷ Kwoguo nîramwandîkîra maarûa îno muonthe arîa mûtwîre Roma, mue arîa mwendetwe nî Ngai na mwîtîtwe mûtuîke andû ake. Wega na thayû wa Ngai Îthe wetû na wa Mwathani Jesû Kristû irogîa namue.

Îvoya rîa gûcokia ngatho

⁸ Ûndû wa mbere nie nîngûcokia Ngatho kûrî Ngai na njîra ya Jesû Kristû nîûndû wenyu muonthe. Nîûndû ûvoro wîgiî wîtîkio wenyu nîwîgucagwa nî andû onthe a nthî.

⁹ Nake Ngai ûrîa ndungatagîra na ngoro yakwa yonthe na njîra ya kûvunjia Ûvoro Mwaro wa mûrû wake nî mûira atî nînîmûririkanaga

¹⁰ vîndî cionthe rîrîa nîravoya. Nie mbûragia Ngai atî ethîrwa nî wendi wake, amvotithie mbûke kûrî mue.

¹¹ Nîûndû nîmendaga mûno kûmwona nîguo nîmûgaîre kîrathimo gîa kîîroho nîguo mûgîe na vinya.

¹² Ûrîa nîrauga nî atî tuonthe tûkaaûmanagîrîria ûndû ûmwe nî wîtîkio ûrîa tûrî naguo: Mue mûgunîke nî wîtîkio wakwa na nie ngunîke nî wîtîkio wenyu.

¹³ Ariû na aarî a Îthe wetû, nîngwenda mûmenye atî mavinda meengî nanavanga gûka kûrî mue nwatî ûndû ûkaga ûkandigîrîria. Mendaga gûka nîguo ndûme andû arîa engî matuîke arûmîrîri a Jesû Kristû wa ta ûrîa nekire kûrî andû a ndûrîrî.

¹⁴ Nîûndû mbîthagîrwa ta nîrî na thirî kûrî andû onthe: Aangiriki na acenji, andû aûgî na arîa matarî aûgî.

¹⁵ Kwoguo nînîriragîria mûno kûvunjia Ûvoro Mwaro wana kûrî mue arîa mûtûûraga Roma.

Vinya ûrîa umanaga na Ûvoro Mwaro

¹⁶ Nie ndiconokaga nî Ûvoro Mwaro nîûndû nîguo vinya wa Ngai wa kûvonokia arîa onthe metîkîtie mbere Ayahudi na vuva andû a Ndûrîrî.

¹⁷ Nîûndû Ûvoro Mwaro ûguûragia ûrîa Ngai atûmaga andû matuîke athingu; na njîra ya gwîtîkia kuuma Kîammbîrîria nginya mûthiia. Wata ûrîa kwandîkîtwe mandîkorî matheru atîrî, “Mûndû ûrîa mûthingu nîagaatûûra mwoyo nîûndû wa gwîtîkia.”

Wîvia wa andû

¹⁸ Marakara ma Ngai nîmonekete kuuma îgûrû, nîûndû wa andû arîa matarî na ûngai na arîa mekaga maûndû macûku. Njîra ciao irîa njûku nîigiragia ûma ûmenyekane.

¹⁹ Ngai amaverithagia nîûndû maûndû marîa mangîmenyeka megiî Ngai nîmonanie waro kûrî o nî Ngai ke mwene.

²⁰ Kuuma rîrîa Ngai aaûmbire nthî, maûndû make marîa matoonekaga nîmamenyekete waro. Maûndû mau nî vinya wake ûrîa ûtûûraga tene na tene na ûngai wake. Andû nîmataûkagîrwa nîmo waro maroria indo irîa Ngai aaûmbire na kwoguo gûtirî na mûndû ûngîgîa na kîîgwatio.

²¹ O nîmecî Ngai, nwatî matimûvecaga gîtîîo kîrîa kîmwagîrîrîte, kana magacokia Ngatho kûrî ke. Vandû va ûguo, meciria mao maatuîkire ma mana na ngoro ciao ciîcûrîtwe nî nduma.

²² Maugaga nî aûgî nwatî nî irimû.

²³ Vandû va gûkumia Ngai ûrîa ûtûûraga tene na tene, Makumagia mîvuanano îrîa îthondeketwe îkariî ta andû arîa makucaga, iconi, nyamû, kana ta nyamû cia kîruka Kîam njoka.

²⁴ Nîûndû wa ûguo, Ngai nîmûmarekereriu mekage maûndû monthe macûku marîa ngoro ciao ciîriragîria. Nao nîmekaga maûndû ma ûûra nthoni gatagatîrî kao.

²⁵ Nîmaregete gwîtîkia ûma wîgiî Ngai na magetîkîra ûvoro wa maveeni. Magoocaga na magakumia indo irîa ciaûmbirwe nî Ngai vandû va kûgooca Ngai ûrîa waûmbire indo icio na nîke wagîrîrwe nî gûkumua tene na tene! Ameni.

²⁶ Nîûndû wa ûguo Ngai nîmûrekereriu arûme mekaga ciîko cia ûûra nthoni irîa mendaga gwîka. Wana aka nîmagarûrîte maûndû ma kîndûîre ma kûmenyana kîîmwîrî.

²⁷ Na njîra wata îo arûme nîmatiganîrîtie njîra ya kîndûîre ya kûmenyana kîîmwîrî na aka ao, arûme makarûtha maûndû ma ûûra nthoni na arûme ta o. Nîûndû wa ûguo, nîmaverithîtue wata ûrîa kwagîrîrîte nîûndû wa mevia mao.

²⁸ Nîûndû andû acio nîmaaregire kûmenya Ngai, ke nîwamarekererie magîe na meciria macûku na mekage maûndû marîa matagîrîrîte.

²⁹ Nîmecûrirwe nî waganu wa mîthemba yonthe, maûndû macûku, ûkoroku na ûthû. Mecûrîtwe nî wîru, ûragani, mbaara, maveeni na gwîcirîria andû arîa engî naaî.

³⁰ Nîmagutanaga na makaria ûcûku wa andû arîa engî. Nîmathûrîte Ngai; nî arumani na meciragia wa ûrîa mangîka naaî, nî ecaari na matiathîkagîra aciari ao.

³¹ Nî aganu, tî evokeku, matiîciragia maûndû ma andû arîa engî na matirî ntha.

³² Nîmaicî atî Watho wa Ngai ugîte atî arîa onthe mekaga maûndû ma waganu magîrîrwe nî gûkua. Nwatî nîmathiîcaga na mbere na kûmeka na kûgathîrîria andû arîa mekaga maûndû ta mau.