Alawi 3 - ÎVUKU RÎA ÛVORO MWARO

Matega ma ngwatanîro ya mûndû na Ngai

¹ Rîrîa mûndû akûrutîra Ngai-Mûnene nyamû kuuma ndîthiarî yake îrî îgongoona rîa ngwatanîro, nwanginya îthagîrwe îrî ndegwa kana mori îtarî na wonje.

² Mûndû ûcio nîakaaigîrîra njara yake kîongorî Kîam nyamû îo na amîûragîre mûromorî wa îgema rîa Ngai-Mûnene. Nao athînjîri-Ngai a nyomba ya Aroni maminjaminje nthakame mîenarî yonthe ya metha ya kîgongoona.

³ Mûndû ûcio nîakaarutîra Ngai-Mûnene îtega rîa kûvîvua rîa mathunya monthe marîa marî mararî na,

⁴ mbigo cioîrî vamwe na mathunya marîa mairigicîrîtie, na gacunjî karîa karo mûno ga îtema.

⁵ Athînjîri-Ngai a nyomba ya Aroni nîmakaavîvîria indo icio cionthe îgûrû rîa metha ya kîgongoona vamwe na matega mau mengî ma kûvîvua. Mûtararûko wa îtega rîu nîûkenagia Ngai-Mûnene.

⁶ Ethîrwa mûndû arenda kûrutîra Ngai-Mûnene mbûri kana ng'ondu ya nûme kana ya nga îrî îgongoona rîa ngwatanîro, akaaruta îtarî na wonje wanarî ûrîkû.

⁷ Ethîrwa mûndû ûcio nîaruta ng'ondu, akaamîvira mbere ya Ngai-Mûnene.

⁸ Nîakaaigîrîra njara yake kîongorî Kîam nyamû îo na amîûragîre mbere ya îgema rîa Ngai-Mûnene. Athînjîri-Ngai a nyomba ya Aroni nîmakaaminjaminja nthakame ya nyamû îo mîenarî yonthe ya metha ya kîgongoona.

⁹ Mûndû ûcio nîagaacoka oce mathunya ma ng'ondu îo, kînyanya Kîamyo kîonthe Kîam mathunya gîtinîrîtue vakuvî na mûrukuthu, mathunya monthe marîa marigicîrîtie mara na airutîre Ngai-Mûnene rîrî îtega rîa kûvîvua. Agooca vamwe na

¹⁰ mbigo cioîrî na mathunya marîa mairigicîrîtie, na gacunjî karîa karo mûno ga îtema.

¹¹ Ûmwe wa athînjîri-Ngai nî akaavîvîria indo icio cionthe îgûrû rîa metha ya kîgongoona irî îtega rîa kûvîvua kûrî Ngai-Mûnene.

¹² Ethîrwa mûndû nîaruta mbûri, nîakaamîvira mbere ya Ngai-Mûnene.

¹³ Nî akaaigîrîra njara yake kîongorî Kîamyo na amîûragîre mbere ya îgema rîa Ngai-Mûnene. Athînjîri-Ngai nî makaaminjaminja nthakame ya yo mîenarî yonthe ya metha ya kîgongoona.

¹⁴ Mûndû ûcio nîakaarutîra Ngai-Mûnene mathunya monthe marîa marigicîrîtie mara rîrî îtega rîa kûvîvua. Nîagooca vamwe na

¹⁵ mbigo cioîrî na mathunya marîa mairigicîrîtie, na gacunjî karîa karo mûno ga îtema.

¹⁶ Mûthînjîri-Ngai nî akaavîvîria indo icio cionthe îgûrû rîa metha ya kîgongoona irî irio irutîrîtwe Ngai-Mûnene irî îtega rîa kûvîvua rîrî na mûtararûko wa kûmûkenia. Mathunya monthe ma nyamû irîa itegagîrwa Ngai-Mûnene nî ma Ngai-Mûnene.

¹⁷ Watho ûyû nî ûtûûra ûrûmagîrîrwa nî njiarwa cia Isiraeli, atî gûtirî Mûisiraeli ûkaarîa mathunya kana anyue nthakame kûrîa kuonthe magaatûûra.