Alawi 22 - ÎVUKU RÎA ÛVORO MWARO

Matega marîa Ngai amûkagîra

¹ Ngai-Mûnene nîwerire Musa atîrî,

² “Îra Aroni na avîcî ake, atî nwanginya matîîage matega matheru marîa andû a Isiraeli manyamûrîrîte, nîguo athînjîri-Ngai acio matigaconorithie rîîtwa rîakwa rîtheru. Nie nînie Ngai-Mûnene.

³ Mûndû wa wonthe kuuma njiarwarî ciaku ûrîa ûgaakuvîrîria matega matheru marîa andû a Isiraeli manyamûrîrîte atarî mûtheru, mûndû ûcio ndakaandungatîra arî mûthînjîri-Ngai rîngî. Watho ûyû nîûtûûra ûrûmagîrîrwa. Nie nînie Ngai-Mûnene.

⁴ “Gûtirî mûndû wa njiarwa cia Aroni ûrî na mûrimû mûcûku wa ngothi kana arwarîte ciîga ciake cia ûciari na mavira makethîrwa makiuma ciîgarî icio, wagîrîrwe nî kûrîa matega matheru nginya vîndî îrîa akaathera. Mûthînjîri-Ngai wa wonthe ûkaavûrûria kîndû wa kîonthe kîvûrûrîtie kimba kana mûndûmûrûme etûrûrîte vinya wake wa ûciari,

⁵ kana avûrûrie nyamû îrî na gîko kana mûndû arî na gîko, akethîrwa atarî mûtheru.

⁶ Mûthînjîri-Ngai wa wonthe ûngîvûrûria kîndû wanarî kîmwe gîa icio nîakethîrwa atarî mûtheru nginya kîvwaî na ndagîrîrwe nî kûrîa matega marîa matheru atambîte kwîthambia.

⁷ Riûa rîarîkia kûthûa, nîakethîrwa arî mûtheru, na vîndî îo nwa arîe matega marîa matheru nîûndû icio nî irio cia athînjîri-Ngai.

⁸ Mûthînjîri-Ngai ndagîrîrwe nî kwîgwatia gîko na njîra ya kûrîa nyama cia nyamû wa yonthe îkuîte mûvûvû kana yûragîtwe nî nyamû cia kîthaka. Nyamû ta icio nwa imûgwatie gîko. Nie nînie Ngai-Mûnene.

⁹ “Athînjîri-Ngai onthe nwanginya mamenyerere mawatho marîa nîmavete. Nwatî mangîrega gwîka guo makethîrwa marî na mevia na nîmagaakua, nîûndû wa kûrega kwathîkîra mawatho makwa. Nie nînie Ngai-Mûnene na nînie ntheragia athînjîri-Ngai.

¹⁰ “Mûndû wa mbarî ya athînjîri-Ngai tu nîke wagîrîrwe nî kûrîa matega marîa matheru; gûtirî mûndû wîngî wagîrîrwe nî kûmarîa, wana angîthîrwa arî mûgeni wa mûthînjîri-Ngai kana arî mûndû andîkîtwe nî mûthînjîri-Ngai kûmûrutîra wîra.

¹¹ Nwatî ngombo ya mûthînjîri-Ngai, amîgûrîte na mbeca kana îciarîrîtwe gwake mûciî nwa îrîe irio irîa mûthînjîri-Ngai arîcaga.

¹² Mwarî wa mûthînjîri-Ngai ûrîa ûkaavikua nî mûndû wîngî ûtarî wa mbarî ya athînjîri-Ngai ndagîrîrwe nî kûrîa matega marîa matheru.

¹³ Nwatî ethîrwa mwarî wa mûthînjîri-Ngai nî mûka wa ndigwa kana nî matiganîte na mûrûme, na ethîrwa atarî na ciana nwa arîe irio irîa îthe arîcaga. Gûtirî mûndû wîngî ûtarî wa mbarî ya athînjîri-Ngai wagîrîrwe nî kûrîa irio icio.

¹⁴ “Nake mûndû ûtarî wa mbarî ya athînjîri-Ngai angîrîa irio irîa ntheru atakûmenya nwanginya akaarîva mûthînjîri-Ngai irio icio na ongerere tûcunjî mîrongo îîrî îgûrû rîa îgana.

¹⁵ Athînjîri-Ngai matiagîrîrwe nî kûgwatia matega matheru gîko, marîa andû a Isiraeli mategagîra Ngai-Mûnene

¹⁶ na njîra ya gwîtîkîria mûndû ûtarî mwîtîkîrie kûrîa irio icio. Mûndû ta ûcio angîrîa irio icio nwa ethîrwe arî na wîvia na nwa averithue.” Nie nînie Ngai-Mûnene na nînie ntheragia matega.

¹⁷ Ngai-Mûnene nîwerire Musa atîrî,

¹⁸ “Îra Aroni, avîcî ake vamwe na andû onthe a Isiraeli mawatho mama. Vîndî îrîa Mûisiraeli wa wonthe kana mûgeni ûrîa ûtûûraga kûu Isiraeli akûrutîra Ngai-Mûnene îtega rîa kûvîvua, rîrî rîa kûvingia mwîvîtwa kana rîrî îtega rîa kwîyendera,

¹⁹ nyamû ya îtega rîu yagîrîrwe nî kwîthîrwa îrî ndegwa, ndûrûme kana nthenge îtarî na wonje, nîguo îtîkîrîke.

²⁰ Nwatî mûngîruta nyamû îrî na wonje, Ngai-Mûnene ndakaamîtîkîra.

²¹ Vîndî îrîa mûndû wa wonthe akûruta îtega rîa thayû kûrî Ngai-Mûnene, rîrî rîa kûvingia mwîvîtwa kana rîrî îtega rîa kwîyendera kuuma ndîthiarî yake, nyamû ya îtega rîu nwanginya îthîrwe îtarî na wonje nîguo îtîkîrîke.

²² Mûtiagîrîrwe nî kûrutîra Ngai-Mûnene nyamû ndumumu, kîonje, îtarî na kîga kîmwe, îrî na ironda ikiumaga mavira, ûvere, kana mûtûndûko. Mûtikarutîre Ngai-Mûnene nyamû îkariî ûguo metharî ya kîgongoona îrî îtega rîa kûvîvua.

²³ Nwa mûrute ndegwa kana ndûrûme îciarîtwe îrî kîthua rîrî îtega rîa kwîyendera, nwatî nyamû ta îo ndîngîamûkîrîka rîrî îtega rîa kûvingia mwîvîtwa.

²⁴ Mûtiagîrîrwe nî kûrutîra Ngai-Mûnene nyamû wa yonthe îrî ngarambe. Ûndû ûyû tî mwîtîkîrie vûrûrirî wenyu.

²⁵ “Mûtikarutîre Ngai-Mûnene nyamû yumîte kûrî andû arîa matûûraga Kanaani. Nyamû icio tî mbaro cia kûrutwa magongoona nîûndû ene cio nîmaikarambaga.”

²⁶ Nake Ngai-Mûnene nîwerire Musa atîrî,

²⁷ “Vîndî îrîa gacaû ga karegwa kana gatûrûme kana kathenge gaciarwa, nwanginya gekaranagie na ng'ina îvinda rîa mîthenya mûgwanja, nwatî vuva wa mîthenya îo, Ngai-Mûnene nîagaagetîkîra karî îtega rîa kûvîvua.

²⁸ Mûtikarute ng'ombe îgongoona vamwe na gacaû ka yo kana ng'ondu vamwe na kaana ka yo kana mbûri vamwe na koori ka yo mûthenya ûmwe.

²⁹ Vîndî îrîa mûkûrutîra Ngai-Mûnene îgongoona rîa gûcokia ngatho, rûmagîrîrani mawatho nîguo îgongoona rîenyu rîtîkîrîke nî Ngai.

³⁰ Nwanginya mûkaarîa nyama icio mûthenya wa ûcio na mûtigatigarie ciîngî ikinyia kîraûko Kîam mûthenya ûcio wîngî itarî ndîe. Nie nînie Ngai-Mûnene.”

³¹ Ngai-Mûnene nîwaugire atîrî, “Menyagîrîrani Maathani makwa. Nie nînie Ngai-Mûnene.

³² Mûtigaconorithie rîîtwa rîakwa rîtheru. Andû onthe a Isiraeli nwanginya mandîîage nîûndû nîrî mûtheru. Nie nînie Ngai-Mûnene, ûrîa ûmûtheragia,

³³ na nînie naamûrutire vûrûri wa Misiri nîguo nduîke Ngai wenyu. Nie nînie Ngai-Mûnene.”