Alawi 15 - ÎVUKU RÎA ÛVORO MWARO

Gîko kuuma mwîrîrî wa mûndûmûrûme

¹ Ngai-Mûnene nîwerire Musa na Aroni meere

² andû a Isiraeli atîrî, “Vîndî îrîa mûndûmûrûme arwarîte ciîga ciake cia ûciari na mavira makethîrwa makiuma ciîgarî icio, mavira mau tî matheru,

³ wana ethîrwa mavira makîthiî na mbere kuuma kana marî matigu kuuma, mûndû ûcio tî mûtheru.

⁴ Kîndû wa kîonthe mûndûmûrûme ûcio akaamamîra kana ekarîre gîkethîrwa gîtarî kîtheru.

⁵ Mûndû wa wonthe ûkaavutia ûrîrî wa mûndûmûrûme ûcio nwanginya akaathambia nguo ciake na ethambie, na agekara atarî mûtheru nginya kîvwaî.

⁶ Mûndû ûrîa ûgekarîra kîndû wa kîonthe mûndûmûrûme ûcio ekarîrîte, nwanginya akaathambia nguo ciake na ethambie na agekara atarî mûtheru nginya kîvwaî.

⁷ Mûndû ûrîa ûkaavutia mûndûmûrûme arwarîte ciîga ciake cia ûciari na mavira makiumaga ciîgarî icio, nwanginya akathambia nguo ciake na ethambie na agekara atarî mûtheru nginya kîvwaî.

⁸ Mûndûmûrûme ûcio ûrauma mavira angîtuîra mûndû wa wonthe mûtheru mata, mûndû ûcio watuîrwa mata nwanginya akathambia nguo ciake na ethambie na agekara atarî mûtheru nginya kîvwaî.

⁹ Kîndû wa kîonthe mûndûmûrûme ûcio ûrauma mavira agekarîra atûîte gîkaarirî kana mbarathi gîkethîrwa gîtarî kîtheru.

¹⁰ Mûndû wa wonthe ûkaavutia kîndû wa kîonthe kîrekarîrîtwe nî mûndûmûrûme akiumaga mavira ciîgarî ciake cia ûciari, akethîrwa atarî mûtheru nginya kîvwaî. Mûndû wa wonthe ûgaakuua kîndû wa kîonthe kîrekarîrîtwe nî mûndûmûrûme akiumaga mavira, nwanginya akaathambia nguo ciake na ethambie, na agekara atarî mûtheru nginya kîvwaî.

¹¹ Mûndûmûrûme akiumaga mavira angîrega kwîthambia njara na avutie mûndû wîngî wa wonthe, mûndû ûcio wavutua nwanginya athambie nguo ciake na ethambie, na agekara atarî mûtheru nginya kîvwaî,

¹² Nyûngû wa yonthe ya yûmba mûndûmûrûme ûcio akaavutia nwanginya îkaaûragwa. Mûndûmûrûme ûcio angîkaavutia kîndû wa kîonthe gîtumîtwe na mîtî nwanginya kîndû kîu gîkaathambua.

¹³ “Rîrîa mûndûmûrûme ûcio akaatherua, nwanginya ageekara îvinda rîa mîthenya mûgwanja ya kûtherua, acoke athambie nguo ciake na ethambie na manjî matheru matavîtwe vandû varîa matherûkaga, na nîakaathera.

¹⁴ Mûthenya wa kanana mûndûmûrûme ûcio nîagooca ndutuura igîrî kana macîa maîrî na athiî nacio mûromorî wa îgema rîa Ngai-Mûnene na ainenganîre kûrî mûthînjîri-Ngai.

¹⁵ Mûthînjîri-Ngai nîakaaruta îmwe yacio îrî îtega rîa kûtheria mevia nayo îo îngî arute îrî îtega rîa kûvîvua. Ûguo nîguo mûthînjîri-Ngai akaarûtha mambura ma kûtheria mûndûmûrûme arwarîte mûrimû wa kuuma mavira ciîgarî ciake cia ûciari.

¹⁶ “Vîndî îrîa mûndûmûrûme etûrûra vinya wake wa ûciari, nwanginya akethambia mwîrî wake wonthe, na nîagekara atarî mûtheru nginya kîvwaî.

¹⁷ Vinya ûcio wa ûciari ûngîkaavutia nguo wa yonthe kana ngothi, nguo îo kana ngothi îo nwanginya ikaathambua, na igekara itarî ntheru nginya kîvwaî.

¹⁸ Mûndûmûrûme angîmenyana kîîmwîrî na mûndûmûka na arute vinya wake wa ûciari, andû acio oîrî nwanginya makethambia, na magekara matarî atheru nginya kîvwaî.

Gîko kuuma mwîrîrî wa mûndûmûka

¹⁹ “Rîrîa mûndûmûka arî îvindarî rîake rîa mweri, akethagîrwa atarî mûtheru îvinda rîa mîthenya mûgwanja.

²⁰ Kîndû wa kîonthe akaamamîra kana ekarîre arî îvindarî rîake rîa mweri gîkethîrwa gîtarî kîtheru.

²¹ Mûndû ûrîa ûkaavutia ûrîrî wake nwanginya akaathambia nguo ciake na ethambie, na nîagekara atarî mûtheru nginya kîvwaî.

²² Mûndû ûrîa ûkaavutia kîndû wa kîonthe kîrîa mûndûmûka ûcio agekarîra nwanginya akaathambia nguo ciake na ethambie, na nîagekara atarî mûtheru nginya kîvwaî.

²³ Mûndû ûrîa ûkaavutia ûrîrî kana kîndû wa kîonthe kîrîa mûndûmûka ûcio agekarîra, agekara atarî mûtheru nginya kîvwaî.

²⁴ Mûndûmûrûme angîmenyana kîîmwîrî na mûndûmûka vîndî îrîa mûndûmûka ûcio arî îvindarî rîake rîa mweri, mûndûmûrûme ûcio nîakaanyitwa nî gîko, na nîagekara atarî mûtheru îvinda rîa mîthenya mûgwanja, naguo ûrîrî wa wonthe akaamamîra nîûkethîrwa ûtarî mûtheru.

²⁵ “Mûndûmûka angiura nthakame mîthenya mîîngî mbere ya îvinda rîake rîa mweri rîkinya, kana îthiî na mbere kuura vuva wa îvinda rîake rîa mweri, akethîrwa atarî mûtheru mavinda marîa monthe nthakame îkethîrwa îkiura, wata ûrîa ethagîrwa atarî mûtheru îvindarî rîake rîa mweri.

²⁶ Ûrîrî wa wonthe akaamamîra na kîndû wa kîonthe agekarîra vîndî îo, gîkethîrwa gîtarî kîtheru.

²⁷ Mûndû wa wonthe ûkaavutia indo icio ivutîtue nî mûndûmûka ûcio, nwanginya akaathambia nguo ciake na ethambie, na nîagekara atarî mûtheru nginya kîvwaî.

²⁸ Nthakame yatiga kuura, nwanginya ageekara îvinda rîa mîthenya mûgwanja, na vuva wa ûguo nîakaathera.

²⁹ Mûthenya wa kanana mûndûmûka ûcio nîagooca ndutuura igîrî kana macîa maîrî na avirîre mûthînjîri-Ngai vau mûromorî wa îgema rîa Ngai-Mûnene.

³⁰ Nake mûthînjîri-Ngai nîakaaruta ndutuura îmwe kana îcîa rîmwe rîrî îtega rîa kûtheria mevia, narîo rîu rîngî arute rîrî îtega rîa kûvîvua. Ûguo nîguo mûthînjîri-Ngai akaarûtha mambura ma kûtheria mûndûmûka arauraga nthakame îrî na gîko.

³¹ “Ngai-Mûnene nîwerire Musa akaanie andû a Isiraeli gûkuvîvîria îgema rîa Ngai-Mûnene rîrîa rîarî gatagatîrî kao vîndî îrîa matarî atheru, nîûndû meka ûguo nîmagaakua nîûndû wa kûgwatia îgema rîa Ngai-Mûnene gîko.”

³² Mama nîmo mawatho megiî mûndûmûrûme ûrîa ûrwarîte ciîga ciake cia ûciari na mavira makiumaga ciîgarî icio, kana ûrîa wîtûrûrîte vinya wake wa ûciari,

³³ na ma mûndûmûka arî îvindarî rîake rîa mweri, kana mûndûmûrûme ûmenyanîte kîîmwîrî na mûndûmûka atarî mûtheru.