Alawi 12 - ÎVUKU RÎA ÛVORO MWARO

Kwîtheria kwa mûndûmûka arîkia gûciara

¹ Ngai-Mûnene nîwerire Musa atîrî,

² “Îra andû a Isiraeli atî: Mûndûmûka angîkaagîa îvu na aciare kaana ga kavîcî, nîakethîrwa arî na gîko îvinda rîa mîthenya mûgwanja wata ûrîa ethagîrwa ekariî vîndî îrîa arî îvindarî rîake rîa mweri.

³ Mûthenya wa kanana kavîcî kau nîgakaaruithwa.

⁴ Mûndûmûka ûcio nîagekara mîthenya îngî mîrongo îthatû na îthatû atarî mûtheru nîûndû wa nthakame îrîa îkaaura arîkia gûciara. Ndagîrîrwe nî kûvûrûria wanarî kîndû kîmwe kîrîa kîtheru, kana atonya îgemarî rîa Ngai-Mûnene îvinda rîake rîa kwîtheria rîtarî rîthiru.

⁵ Nwatî mûndûmûka angîkaagîa îvu na aciare kaana ga kamwîrîtu nîakethîrwa arî na gîko îvinda rîa mîthenya îkûmi na îna, wata ûrîa ethagîrwa ekariî vîndî îrîa arî îvindarî rîake rîa mweri. Mûndûmûka ûcio nîagekara mîthenya îngî mîrongo îtandatû na îtandatû atarî mûtheru kuuma arîkia gûciara.

⁶ “Mîthenya ya kwîtheria yathira kuuma arîkia gûciara kaana ga kavîcî kana ga kamwîrîtu, mûndûmûka ûcio nîakaaruta ng'ondu ya ûkûrû wa mwaka ûmwe îrî ya îtega rîa kûvîvua vamwe na îcîa kana ndutuura îrî ya îtega rîa kûtheria wîvia. Akaavirîra mûthînjîri-Ngai vau mûromorî wa îgema rîa Ngai-Mûnene.

⁷ Mûthînjîri-Ngai nîakaaruta îtega rîa mûndûmûka ûcio kûrî Ngai-Mûnene na amûrûthîre mambura ma kûmûtheria na nîakaathera. Ûguo nîguo mûndûmûka agîrîrwe nî gwîka arîkia gûciara.

⁸ “Ethîrwa mûndûmûka ndangîona ng'ondu, nîakaanenganîra ndutuura igîrî kana macîa maîrî. Îmwe ya îtega rîa kûvîvua nayo îo îngî ya îtega rîa kûtheria wîvia. Mûthînjîri-Ngai nîakaarûthîra mûndûmûka ûcio mambura ma kûmûtheria na nîakaathera.”