Alawi 10 - ÎVUKU RÎA ÛVORO MWARO

Wîvia wa Nadabu na Abihu

¹ Avîcî aîrî a Aroni, Nadabu na Abihu nîmoocire wa mûndû kanyûngû ga kûvîvîrua ûbani, magîkîra makara marî na mwaki kuo, magîkîra ûbani na makîrutîra Ngai-Mûnene. Nwatî mwaki ûcio ndwarî mwîtîkîrie nîûndû Ngai-Mûnene ndaathanîte arutîrwa guo.

² Wa rîmwe, mwaki nîwaumire kûrî Ngai-Mûnene, ûkîmavîvia na magîkua Ngai-Mûnene akîonaga.

³ Musa nîwacokire akîra Aroni atîrî, “Ûguo nîguo Ngai-Mûnene aaugire atî, ‘Andû onthe arîa mandungataga marî athînjîri-Ngai nwanginya mandîîage nîûndû wa ûtheru wakwa, na nîngoonania riiri wakwa kûrî andû onthe a Isiraeli.’ ” Nwatî Aroni ndaagamba.

⁴ Musa nîwetire Mishaeli na Elizafani, avîcî a Uzieli ûrîa warî mûrwang'ina na îthe wa Aroni na akîmeera atîrî, “Ûkani mûkuue mîîrî ya aa mûrwanyûkwe mûmîrute îgemarî rîa Ngai-Mûnene na mûmîvire na kûu nja ya gûkû tûtûûraga.”

⁵ Kwoguo Mishaeli na Elizafani nîmaathiîre na makînyita ciimba icio na nguo ciacio na makîivira nja ya kûu maatûûraga, wata ûrîa Musa aathanîte.

⁶ Musa nîwacokire akîra Aroni na avîcî ake, Eliazaru na Ithamaru atîrî, “Mûtikarege gûcanûra njuîrî cienyu kana mûtembûrange nguo cienyu atî nîguo mwonanie mûrî na kîeva. Mweka ûguo mûgaakua, na Ngai-Mûnene akaarakara nî andû onthe. Nwatî andû enyu a Isiraeli nwa macakae nîûndû wa ikuû ino ciumanîte na mwaki ûrîa umire kûrî Ngai-Mûnene.

⁷ Mûtikaume nja ya mûromo wa îgema rîa Ngai-Mûnene, mweka ûguo mûgaakua nîûndû mûrî amûrîre Ngai-Mûnene na njîra ya gwîtîrîrua maguta make.” Nao nîmeekire wata ûrîa Musa aameerire.

Mawatho megiî Athînjîri-Ngai

⁸ Ngai-Mûnene nîwerire Aroni atîrî,

⁹ “We kana avîcî aku mûtikanyue ndivei kana njovi rîrîa mûgûtonya îgemarî rîa Ngai-Mûnene. Mweka ûguo nî mûgaakua. Watho ûyû nîûtûûra ûrûmagîrîrwa nî njiarwa ciaku cionthe tene na tene.

¹⁰ Nwanginya mwîkîre ngûrani gatagatî ga kîndû kîrîa Kîammûrîre Ngai na kîrîa gîtarî Kîammûrîre Ngai, kîndû kîrîa kîrî mûgiro na kîrîa gîtarî mûgiro.

¹¹ Nwanginya mûthomithie andû a Isiraeli mawatho monthe marîa nîmwîrîte kûvîtûkîrîra kûrî Musa.”

¹² Nake Musa nîwerire Aroni na avîcî ake Eliazaru na Ithamaru arîa maatigarîte marî mwoyo atîrî, “Ocani îtega rîa irio cia mûgûnda irîa itigarîte kuuma kûrî irio irîa irutîrîtwe Ngai-Mûnene, mûrûthe mûgate ûtarî mwîkîre ndawa ya kwimbia na mûûrîre vakuvî na metha ya kîgongoona, nîûndû îtega rîîrî nî rîtheru mûno.

¹³ Mûûrîre vandûrî varîa vatheru, nîûndû nî gacunjî gaku mûrî na avîcî aku karîa mwagîrîrwe nî kûrîa kuuma kûrî matega ma kûvîvua marîa marutîrîtwe Ngai-Mûnene. Ûguo nîguo Ngai-Mûnene ambathîte.

¹⁴ Nwatî we mûrî na andû a nyomba yaku nwa mûrîe kîthûri vamwe na Kîamû gîa kûgûrû kwa vuva irîa irutîtwe irî kîveo Kîam mwanya na rîrî îtega rîa mwanya kûrî Ngai-Mûnene nîûndû wa athînjîri-Ngai. Nwa mûirîre vandû wa vonthe vatheru nîûndû matega mama manenganîrîtwe kûrî we mûrî na ciana ciaku karî gacunjî gaku kuuma kûrî matega ma ngwatanîro ma andû a Isiraeli.

¹⁵ Magaaûka na Kîamû gîa kûgûrû kwa vuva vamwe na kîthûri vîndî îrîa mathunya makethîrwa makîrutîrwa Ngai-Mûnene rîrî îtega rîa kûvîvua. Tûcunjî tûu tûkethagîrwa tûrî twaku mûrî na ciana ciaku vîndî cionthe, wata ûrîa Ngai-Mûnene athanîte.”

¹⁶ Musa nîwacokire agîtuîria waro ûvoro wîgiî mbûri îrîa yarutirwe îrî îtega rîa kûtheria mevia na akîmenya atî yarî mvîvie. Ûndû ûcio nîwatûmire arakarîre Eliazaru na Ithamaru, na nîwamaûririe atîrî,

¹⁷ “Mwaregire kûrîa îtega rîa kûtheria mevia mûrî vandû varîa vamûre nîkî? Îtega rîu nî rîtheru mûno na Ngai-Mûnene amûvete rîo rîrî rîa kûtheria wîvia wa andû.

¹⁸ Nthakame ya nyamû îo yarutîtwe ndîarî mvire îgemarî rîa Ngai-Mûnene. Kwoguo mwagîrîrwe nî kûrîa nyama ciayo mûrî vandû varîa vamûre, wata ûrîa naathanîte.”

¹⁹ Aroni nîwacokerie Musa atîrî, “Taroria, andû maarutire îtega rîa kûtheria mevia na maruta îtega rîa kûvîvua ûmûnthî kûrî Ngai-Mûnene, nwatî ciana ciakwa ciîrî nîikwire. Nîngîrarîte îtega rîa kûtheria mevia ûmûnthî, Ngai-Mûnene nîangîkenire?”

²⁰ Rîrîa Musa eegwire ûguo, nîweganîre.