2Tim 4 - ÎVUKU RÎA ÛVORO MWARO

¹ Nîrakûthaitha nîrî mbere ya Ngai na ya Jesû Kristû ûrîa ûgaatuîra andû arîa marî mwoyo na arîa akuû, na nîûndû nî araûka kwathana arî mûthamaki atî:

² ûvunjagie ûvoro wa Ngai vingo cionthe vîndî îrîa mbagîrîru na îrîa îtarî mbagîrîru. Îguithagia andû, makanagie, maûmagîrîrie na ûmathomithagie vîndî cionthe ûkirîrîrîtie.

³ Mavinda nîmagaûka rîrîa andû makaarega kûthomithua maûndû marîa magîrîrîte. Nwatî nîmakeyûnganîria arimû ao kûringana na merirîria mao. Arimû acio nîmakaamakenia, nîûndû makaaragia maûndû marîa matû mao mendete kwîgua.

⁴ Andû nîmaakagarûrûka matige kûrûmîrîra ûma na macoke mathikaagîrîrie ng'ano cia gwîtungîra.

⁵ Nwatî nwanginya wîkarage wîîguîte vingo cionthe. Ûmagîrîria mathîna, rutaga wîra wa kûvunjia ûvoro mwaro na ûrutage wîra waku wonthe wa gûtungatîra Ngai.

⁶ Nie Paûlo îvinda rîakwa rîa kuuma mwoyorî na rîa kûrutwa nîrî îgongoona nîrîkinyu.

⁷ Nîndûîte mbaara mbaro, nîndîkîtie îvenya na mbîthîrîtwe menyererete wîtîkio ûrîa nthomithagia.

⁸ Kwambîrîria rîu nîmbîrîgîrîrîte nthûmbî ya ûthingu îrîa ngaavewa mûthenya wa mûthiia nî Mwathani ûrîa ûtucaga ciira na kîvooto. Tî nie nienga ngaavewa kîveo kîu nwatî nîgîkaavewa andû onthe arîa metagîrîra gûka gwake marî na wendo.

Ndûmîrîri kûrî Timotheo ke mwene

⁹ Geria mûno ûke kûrî nie narua.

¹⁰ Nîûndû Dema nîmûndiganîriu na akathiî Thesalonike nîûndû wa kwenda maûndû ma gûkû nthî. Kiresike nîwathiîre Galatia, nake Tito akîthiî Dalamatia.

¹¹ Luka nîke tu tûrî nake. Oca Maariko mûke nake nîûndû nîmwagîrîru wa kûndungatagîra.

¹² Nînatûmire Tukiko Efeso.

¹³ Ûgîûka mbûkîra na kavuti gakwa karîa naatigîre Karipo kûu Teroa. Ndûkariganîrwe nî kûmbûkîra na mavuku na mûno makîria njûo irîa ciandîkagwa.

¹⁴ Alekisanda mûturi wa cuuma nîwambîkire maûndû meengî macûku. Mwathani nî akaamûrîva kûringana na ciîko ciake.

¹⁵ Îîmenyagîrîreni kuuma kûrî ke nîûndû nîwareganire na ndûmîrîri yetû na vinya mûno.

¹⁶ Rîrîa naavirirwe cirarî vîndî ya mbere ngeyarîrîrie, gûtirî mûndû warî mbarî yakwa, onthe nîmaandiganîrie.

¹⁷ Nwatî Mwathani aarî vamwe nanie na nîwamûvere vinya wa kûvecana ûvoro mwaro kûrî andû onthe a ndûrîrî, kwoguo nînarutirwe magegorî ma simba.

¹⁸ Nake Mwathani nîakûndethûra maûndûrî monthe macûku na amvire Ûthamakirî wa îgûrû amenyererete. Mwathani arokumua tene na tene! Ameni.

Ngethi cia mûthiia

¹⁹ Ngetheria Pirisila, Akula, na andû a mûciî wa Onesiforo.

²⁰ Erasito nîwatigirwe Korinitho na ngîtiga Tirofimo Mileto arî mûrûaru.

²¹ Geria mûno ûke mbere ya vîndî ya mvevo îkinya.

²² Nî mwakethua nî Eubulu, Pundeni, Linaisi Kilaudia na ariû na aarî a îthe wetû. Mwathani nîekare nawe. Wega wa Ngai ûrekara namue.