2Maû 33 - ÎVUKU RÎA ÛVORO MWARO

Manase, mûthamaki wa Juda

¹ Manase aatuîkire mûthamaki wa Juda arî na ûkûrû wa mîaka îkûmi na îîrî (12). Nîwathanire arî Jerusalemu îvinda rîa mîaka mîrongo îtano na îtano (55).

² Nîwekire maûndû macûku mbere ya Ngai-Mûnene. Nîwarûmîrîre mîtugo mîcûku ya mavûrûri marîa Ngai-Mûnene eengatire kuuma vûrûrirî ûcio mbere ya andû a Isiraeli matonya kuo.

³ Nîwatumire rîngî kûndû gwa kûgoocagîrwa ngai cia mîvuanano kûrîa îthe, Hezekia oomomorete. Nîwatumire metha cia magongoona cia Baali, akîrûtha mîvuanano ya Ashera, ngai ya mûndûmûka na akîgooca ciûmbe cionthe cia îgûrû.

⁴ Nîwatumire metha cia magongoona cia ngai cia mîvuanano hekarûrî kûrîa Ngai-Mûnene aaugîte atîrî, “Jerusalemu nîkuo ngûtûûra ngoocagîrwa tene na tene.”

⁵ Nîwatumire metha cia magongoona cia kûgoocagîra ciûmbe cia îgûrû kûu ivaarorî igîrî cia hekarû.

⁶ Nîwarutire anake ake marî îgongoona rîa kûvîvua Kîamndarî Kîam mûvîcî wa Hinomu. Nîwarûthire maûndû ma ûragûri, kûringa mbûgû, kûringa ciama na nîwaranagîria na oni maûndû na arogi. Nîwekire maûndû macûku mbere ya Ngai-Mûnene na agîtûma arakare.

⁷ Nîwocire mîvuanano îrîa aaumîtie na akîmiga hekarûrî, kûrîa Ngai eerîte Daudi na mûvîcî Solomoni atîrî, “Gûkû Jerusalemu, hekarûrî îno nîkuo nthuurîte gatagatî ka mîvîrîga yonthe ya Isiraeli nîguo ndûûre ngoocagîrwa kuo tene na tene.

⁸ Ndikaareka andû a Isiraeli mengatwa kuuma vûrûrirî ûyû neerîre methe mao rîngî, ethîrwa nîmakaarûmîrîra na kinyi maûndû monthe megiî mawatho monthe na matuîro ma ciira marîa namaathire kûvîtûkîrîra kûrî Musa.”

⁹ Manase nîwaveenererie andû a Juda na a Jerusalemu na nîmeekire maûndû macûku meengî gûkîra marîa meekîtwe nî mavûrûri marîa Ngai-Mûnene aacûkangîtie mbere ya andû a Isiraeli matonya kuo.

Manase nîweririre

¹⁰ Ngai-Mûnene nîwakaanirie mûthamaki Manase na andû ake, nwatî matiamûthikîrîria.

¹¹ Kwoguo Ngai-Mûnene nîwatûmire anene a athigari a mbaara a kuuma Asîria mathiî makatharîkîre Juda. Nîmaanyitire mûthamaki Manase na makîmwîkîra icûvî, makîmwova na mvîngû cia gîcango na makîmûvira Babuloni.

¹² Vîndî îrîa aarî mathînarî, nîwavoire Ngai-Mûnene, Ngai wake na akîînyivia mûno mbere ya Ngai wa methe make nîguo amûtethie.

¹³ Ngai nîwegwire mavoya make na akîmwîguîrîra ntha. Kwoguo Ngai-Mûnene nîwamûvotithirie gûcoka Jerusalemu, ûthamakirî wake. Ûndû ûcio nîwatûmire Manase amenya atî Ngai-Mûnene, nî Ngai.

¹⁴ Vuva wa ûguo Manase nîwatumire rîngî rûthingo rwa mwena wa nja rwa îtûûra rîa Daudi, mwena wa îthûîro wa kîthima Kîam Gihoni kîrîa kîrî Kîamndarî nginya kîvingorî kîrîa gîetagwa Kîvingo Kîam Nthamaki na kûthiûrûrûka nginya Ofeli na nîwarûtumire rûrî rûraca na îgûrû makîria. Wana nîwaigire anene a ikundi cia athigari a mbaara matûûrarî monthe ma Juda marîa maarî mairigîre.

¹⁵ Manase nîwarutire ngai ng'eni na mîvuanano hekarûrî na akîruta metha cionthe cia magongoona irîa aatumîte kîrîmarî kûrîa hekarû yatumîtwe na Jerusalemu, na agîita na kûu nja ya îtûûra.

¹⁶ Nîwacokire agîtuma metha ya kîgongoona ya Ngai-Mûnene na akîrutîra magongoona ma thayû na ma gûcokia ngatho îgûrû rîayo. Nîwacokire akîatha andû onthe a Juda magooce Ngai-Mûnene, Ngai wa Isiraeli.

¹⁷ Kûnarî ûguo, andû nîmaathiîre na mbeere kûrutîra magongoona kûndû kûrîa kwagoocagîrwa ngai cia mîvuanano, nwatî maarutaga magongoona mau kûrî Ngai-Mûnene.

Mûthiia wa wathani wa Manase

¹⁸ Maûndû mengî marîa Manase eekire vîndî îrîa aarî mûthamaki, mavoya make kûrî Ngai wake na ciugo cia mwoni wa maûndû ûrîa wamwarîrie rîîtwarî rîa Ngai-Mûnene Ngai wa Isiraeli, nîmandîke îvukuurî rîa maûndû ma tene ma Athamaki a Isiraeli.

¹⁹ Mavoya ma mûthamaki Manase na ûrîa Ngai aamûcokerie, mevia make monthe na kûrega gûtuîka mwîvokeku, kûndû kûrîa aatumire gwa kûgoocerwa mîvuanano na Ashera, ngai ya mûndûmûka na mîvuanano, monthe nîmandîke rûganorî rwa Maûndû ma tene ma Arathi.

²⁰ Manase nîwakwire na akîthikwa mûciî wa mûthamaki. Nake mûvîcî Amoni nîwatuîkire mûthamaki vuva wake.

Amoni mûthamaki wa Juda

²¹ Amoni aatuîkire mûthamaki wa Juda arî na ûkûrû wa mîaka mîrongo îîrî na îîrî (22) na nîwathanire îvinda rîa mîaka îîrî arî Jerusalemu.

²² Amoni nîwekire maûndû macûku arî mbere ya Ngai-Mûnene wata ûrîa îthe Manase eekîte. Nîwarutire magongoona kûrî mîvuanano yonthe îrîa îthe aarûthîte na akîmîgooca.

²³ Ndenyivia mbere ya Ngai-Mûnene ta ûrîa îthe Manase eekîte, nwatî nîwevirie mûno makîria ya îthe.

²⁴ Ndungata cia Amoni nîciavangire ûrîa ikûmûraga na nîciamûragîre gwake nyomba.

²⁵ Nwatî andû a Juda nîmaaûragire andû arîa maavangire ûrîa makûmûraga na magîcoka magîtua Josia mûvîcî wa Amoni mûthamaki wa Juda vuva wake.