2Mak 9 - ÎVUKU RÎA ÛVORO MWARO

Ngai-Mûnene nîwaverithirie Anitioku

¹ Kavindarî wa kau Anitioku nîwagarûrûkîte atarî na kîvarîrîro aumîte Perisia,

² nîûndû aatonyete îtûûrarî rîa Perisepoli avangîte kwîa indo cia hekarû na kûrîcunana. Andû a îtûûra rîu nîmoocire indo cia mbaara na makîtharîkîra Anitioku nîguo marîvonokie. Nake Anitioku na athigari ake a mbaara nîmaavootirwe na makîûra magîcokithua maconokete.

³ Anitioku arî vakuvî gûkinya Ekibatana, nîwagwatire ndûmîrîri ya ûrîa athigari a mbaara a Nikanoru na Timotheo mekîtwe.

⁴ Nîwagwatirwe nî marakara manene na agîtua erîvîrîrie na Ayahudi nîûndû nîwavootirwe na akîûra. Kwoguo nîwathire mûndû ûrîa watwarithagia gîkaari gîake Kîam mbarathi amîtwarithie atakûrûngama nginya rîrîa agakinya mûthiia wa rûgendo rwake. Aaririe arî na mwîtîîo akiuga atîrî, “Rîrîa ngaakinya îtûûrarî rîa Jerusalemu ngaarîgarûra rîtuîke mbîrîra ya Ayahudi.” Aaugire ûguo atakûmenya atî îtuîro rîa Ngai rîathiîcanîtie vamwe nake.

⁵ Nwatî Mwathani, Ngai wa Isiraeli ûrîa wonaga kuonthe nîwatûmire agwatwa nî mûrimû ûtangîvonwa na ûtoonekaga. Arîkia kuga ûguo nîwambîrîrie gûturwa nî îvu rîtagûtigithîria.

⁶ Ûguo nîguo kwagîrîrwe gwîkwa mûndû ûrîa waverithîtie andû eengî na maûndû mageni.

⁷ Kûnarî ûguo ndaatiga kwîyamba, nwatî aathiîre na mbere na kwîthûnûra arî na marakara maviû ta mwaki nîndû wa Ayahudi. Akîathana ngari yake ya mbarathi îtwarithue na îvenya mûno. Arî îvenyarî rîu nîwacurûkire gîkaarirî gîake Kîam mbarathi na akîringa nthî na vinya nginya akîgurarua mûno ciîga cionthe cia mwîrî wake.

⁸ Anitioku nîwetîîte mûno wana ageciragia atî aarî na vinya na ûvoti nginya wa gûtûma makûmbî ma manjî ma îriarî mamwathîkîre, na atî nwa avote kûthima ûrito wa irîma irîa ndaca na kîthimi. Aagwîre nthî agîcoka gûkuanîrwa na îtaratî; naguo ûndû ûcio ûgîtûma vinya wa Ngai ûmenywe nî andû onthe.

⁹ Mwîrî wonthe wa mûndû ûyû ûtetigagîra Ngai ûgîcûrwa nî igunyû. Na arî wa mwoyo, nyama cia mwîrî wake ikîambîrîria kwora na ethagîrwa arî na thîna na ûrûrû mwîngî mûno. Mûruke mûcûku ûrîa waumaga kûrî ke nîwatûmaga athigari ake onthe megue kîria Kîam ngoro.

¹⁰ Gûtirî mûndû ûngîavotire kûmûkua amûvire vandû nîûndû wa ûrîa aanungaga. Kavinda kanini atarî arakua Anitioku eciragia atî nwa avote kûnyita njata na njara.

Anitioku nîwevîtire mbere ya Ngai

¹¹ Maûndû marîa Anitioku ekîtwe nî Ngai ma kûmûnyamaria na kwîthagîrwa agîtuurwa nî mwîrî wonthe vîndî cionthe nîmaatûmire athirwa nî mwîtîîo wake. Kwoguo nîwambîrîrie gwîcokera.

¹² Rîrîa aaremirwe nî kûmîrîria mûnungo ûrîa waumaga mwîrî wake ke mwene akiuga atîrî, “Nîkwagîrîre andû menyivagie varî Ngai, na gûtirî mûndû wagîrîrwe nî gwîciria atî nîmeganene na Ngai.”

¹³ Mûndû ûtaarî mûtheru ndegucagîrwa ntha nî Mwathani. Kûnarî ûguo nîwevîtire na akiuga atîrî,

¹⁴ “Îtûûra rînene rîrîa aavinyûrîte kûthiî kûrîomomora na kûrîtua mbîrîra ya Ayahudi, rîu nînarîva wîyathi.

¹⁵ Nao Ayahudi arîa noonaga ciimba ciao na cia ciana itagîrîrwe nî kûthikwa, nwatî navangîte cikîrue nyamû cia kîthakarî na iconi, onthe nîmava rûtha methagîrwe meganene na andû a Athene.

¹⁶ Hekarû ntheru îrîa mbererî naîîte indo ciayo, nîngûmîkîra indo irîa mbaro mûno. Nacio indo irîa nyamûre naaîire nîngûicokia cionthe na nyongerere ciîngî nyîngî makîria, na ndîve mavûthîro monthe na magongoona kuuma mûthithûrî wakwa nie mwene.

¹⁷ Kwonganîrîria na maûndû mau monthe nie mwene nîngûtuîka Mûyahudi, na nthiî kûndû kuonthe kûrîa andû matûûraga nîmere ûrîa Ngai arî vinya.”

Anitioku nîwandîkîre Ayahudi Maarûa

¹⁸ Nwatî rîrîa Anitioku oonire mathîna make matianyivanyivaga nîûndû Ngai aamûverithagia kûringana na ûrîa kwagîrîrîte, nîwathirirwe nî mwîvoko ûrîa aarî naguo. Kwoguo nîwandîkire maarûa îvana ta mavoya, nayo yandîkîtwe atîrî,

¹⁹ “Kuuma kûrî Anitioku, mûthamaki na mûnene wa athigari onthe a mbaara namûtûmîra ngethi cia wendo mue Ayahudi a vûrûri wakwa na mûrî andû a vata mûno. Mûrogîa na maûndû maro na ûgima wa mwîrî na ûthiîi wa na mbere.

²⁰ “Nî gîkeno gîakwa ethîrwa mue vamwe na ciana cienyu mûrî na thayû na maûndû menyu nîmarathiî na mbere waro. Kîîrîgîrîro gîakwa kîrî kûrî Ngai,

²¹ na nîngûririkana nîrî na gîkeno, gîtîîo na maûndû maro marîa mwanambîka. “Nîrî njîrarî njokete ngiuma vûrûrirî wa Perisia, nînaanyitirwe nî ûrwaru mûnene mûno. Kwoguo nîmonete arî waro nîcirie ûvoro wa thayû wa vûrûri wonthe.

²² Nditete mwîvoko wa kûvona, nîrî na wîtîkio atî nîngûvona.

²³ Nwatî nîngûririkana atî vava nîwatigaga athuura mûndû wa kûthamaka îthenya rîake vîndî cionthe akîthiî mbaararî mwena wa îrathîro wa rûnjî rwa Efarati.

²⁴ Eekaga ûguo nîguo kûngîekîkire ûndû ûteerîgîrîrwe, kana gûke ndûmîrîri îtarî mbaro, matigatangîke nîûndû andû onthe vûrûrirî nîmaicî ûrîa atigîrîte ûthamaki.

²⁵ Makîria ma ûguo, nîmbicî ûrîa anene arîa mavakanîte na ûthamaki wakwa mekaraga metererete kûgîa na kamweke nîguo mone ûrîa gûgwîkara. Kwoguo nînathuura mûvîcîwa Anitioku atuîke mûthamaki îthenya rîakwa. Nînaamûtigaga maita meengî na ngamûkathîrîria kûrî andû eengî ngîthiî ng'endo cia na îvenya mîena ya rûnjî rwa Efarati. Nîmwandîkîrîte maarûa ta îno namwandîkîra.

²⁶ Na rîu, nîngûmûthaitha mûno mûririkane maûndû marîa nanamwîkîra mûrî ta mwîngî na ta wa mûndû nîguo mûthiî na mbere gwîkara wa mûndû mûrî na wîgucano kûrî nie na kûrî mûvîcîwa.

²⁷ Nîrî na ma atî nîakûrûmîrîra mwathanîre wakwa na akamwîkaga maûndû ma waragania na arî na ntha.”

²⁸ Kwoguo mûndû ûcio mûragani na warumîte Ngai nîwagîre na mînyamaaro mîngî wata îrîa aanyamarîtie andû engî nayo. Aakwire gîkuû gîa kwîguîrwa ntha mûno arî irîmarî vûrûrirî mûgeni.

²⁹ Mûrata wake wetagwa Filipu nîwenûkirie mwîrî wake. Nîwacokire akîthiî Misiri kwa mûthamaki wetagwa Putolemî Filometori nîûndû nîwetigagîra mûvîcî wa Anitioku.